Evangelium Johanes 15

Jesus, de woarhauftje Wienstud

1 Ekj sie de woarhauftje Wienstud, un mien Voda es de Wiengoadna. 2 Jieda Rank aun Mie, dee nich Frucht brinjt, nemt Hee wajch; un jieda eene, dee Frucht brinjt, reinicht Hee, daut dee mea Frucht brinjt. 3 Jie sent aul rein derch daut Wuat, daut Ekj to junt jerät hab. 4 Blieft en Mie un Ekj en junt. Jrod soo aus de Rank nich von sikj selfst Frucht brinjen kaun, buta dee blift aun de Wienstud, jrod soo uk jie nich, buta jie bliewen en Mie.

5 Ekj sie de Wienstud, jie sent de Ranken; wäa en Mie blift un Ekj en am, dee brinjt väle Frucht; wiels jetrant von Mie kjenn jie nuscht doonen. 6 Wan wäa nich en Mie blift, dee woat wajchjeschmäten soo aus de Rank un vedrieecht; un dee woaren jesaumelt un en daut Fia jeschmäten un woaren brennen. 7 Wan jie en Mie bliewen un miene Wieed en junt bliewen, dan woa jie bedden, waut jie wellen, un daut woat junt woaren. 8 Doarenn woat mien Voda veharlicht, daut jie väl Frucht brinjen; soo woa jie miene Jinja woaren.