Lucas 1

Zacharias siene Profezeiunk

67 Un sien Voda Zacharias wort met däm Heiljen Jeist jefelt un profezeid un säd: 68 Jesäajent es de Har, de Gott von Israel, wiels Hee haft sien Volkj Israel besocht un Erleesunk veschauft; 69 Hee haft ons een Heils-Huarn oppjerecht em Hus von sien Deena David, 70 soo aus Hee jerät haft derch daut Mul von siene heilje Profeeten von oole Tieden häa: 71 Radunk von onse Fiend un von de Haunt von aul dee, dee ons hoten; 72 Boarmherzichkjeit to vollbrinjen aun onse Vodasch un aun sienen heiljen Bunt to denkjen, 73 dän Eit, dän Hee onsem Voda Abraham jeschwuaren haud, ons to jäwen, 74 daut wie, ut de Haunt von onse Fiend jerat, Am onen Forcht deenen sullen 75 en Heilichkjeit un Jerajchtichkjeit ver Am aul de Doag von ons Läwen.

76 Un du, Kjint, woascht däm Aulahechsten sien Profeet jenant woaren; wiels du woascht ver däm Harn gonen, siene Wäaj reed to moaken, 77 sien Volkj Erkjantnis to jäwen von de Radunk, en de Sinden-Vejäwunk, 78 derch de ennaliche Boarmherzichkjeit von ons Gott, en woone ons de Dach-Aunbruch vom Huagen besocht haft, 79 om äwa dee to schienen, dee en Diestanis un em Doodes-Schauten setten, om onse Feet opp dän Frädens-Wajch nopp to stieren.