Ɔzhɔnu 15

Ɔzhizɔsi Gba Akwu Uwɛyi Uwu Ovanyi Shɛ Le

1 Akwɛyi Ɔzhizɔsi a za mba tee, <<Imi gba mi kwu uwɛyi uwu ovanyi ureyi le, Adami gba akwu ɔnɛgba le. 2 Kwuwɛyi ungwunanguna ungwu bɔkɔ kwu wa la imuma mo, Ada e kpolo ngwu mo. Kwonde ungwu bɔkɔ kwu wa la imuma ba, aa vyɛ ngwu ma kaa lakwu muma gyɔɔ lakwu kyo. 3 Lunyi lu wuluma kwuwongu iso iyi bɔkɔ mi so yi. 4 Lunyi la lu ŋɔ mami, Imi ba mii yi ma yi. Kwonde ungwu kwu wa la imuma lɛngwu kwu yi mo, akwu mɛga te kwu bɔ mu uwɛyi mafyi ngwu. Tatayi, lunyi lu yi mami mɛga gba luu wa la imuma le.

5 <<Imi mi yi mate utu uwu uwɛyi tayi, lunyi ba lu yi mate ende tayi. Akwiyi gba onzu e yi mami akwɛyi Imi ba mi yi ma wu, onzu awu aa wa la imuma; moo gba akwu mbala mi mo, lu do kiya ikpikpɛnyi te iwomo mo. 6 Akwiyi gba onzu e yi mami mo, oo masa wu mbala kwonde ungwu o ta ngwa pyo akwɛyi kwu shirima; akwɛyi enzu ɔ kwu ende ɛnyi ma akwɛyi oo fu yi mɔyi akwɛyi ipwumo. 7 Akwiyi gba lu yi ma mi akwɛyi lu shi iso mi mu egbo yi, la lu nda kiya ingyinangyina, akwɛyi Ukpo ba ee shi yi ngyi. 8 Adami aa fya inzumbɛku ma gba lu wa la imuma iyɛku, iyi bɔkɔ i zɔ te lu kwu Wavɔngɔkiya mi.