Marcos 11

Yesu Yuru A Wurishelima Kankye Seleki

1 De Yesu nja yayagizi e yi su zo kusa ni Wurishelima nja Betapaji nja Betani anya dunsi zetu, se Yesu saka yayagizi e yi bi su la geba, 2 e gye su nkye, <<Ku yuru a siki dende geri de ma a geba ku, kwa geni yaa janki de su domuna e yi ba nsude taba nyunwa e yi wo ba. Ku konse yi zo nshi. 3 Nde nseda minya ku nkye, <Mina sa kwa yi yomu?> ku gye yi nkye, Nsugizi amu nkye mu konse te nshi yaa kuma ku nshi kuzukam.>>>

4 De su te su geni yaa janki a woze a baki turiki, su domuna a kopa gizi. Se su konse yi, 5 worosu su ntani sakisi anya ni su minya nkye, <<Mina yi, de kuma konse yaa janki?>> 6 Su keleba kyakya yiri de Yesu gye su nkye su pala, se woroni bila su te ma su. 7 De su zo ni yaa janki keyi Yesu su kwa yi riga su nya ANKI janki ni, Yesu zunwa a kiya yi. 8 Ntani nyowa nya ogbodo asu a turiki, worosu su nya genya de su sala dege bikiya. 9 Worede su ma a geba nja worede su ma biya e yi a beyi su dege murinya asu su ma nkye,

<<Osana!>>

<<Anabirika ma nja nsude e ma zo a siki seni Obagizi!>>

10 <<Anabirika ma nja solota ni Adaa amu Dowuda!>>

<<Osana te nja Mirikisi a siki Bisi!>>

11 Yesu yuru a Wurishelima e bise a Laki Lepa. E kone guru mbo, sede tunde nyema yi, Yesu butu te ni Betani nja yayagizi e yi.