1 A beyi daa mu Ni geni Meleku daa ma sonka dege bisi. E mani totolo yiko, nja dereja yi, yi asikye gyowe durinya guru. 2 Meleku mu yi sukwa ni totolo murinya nkye: <<E pauri! Totolo geri Babila e puari! Kuzukam ema anya zunwa arizeni nja anya zunwa mumungu aworo; anya zunwa kowoni nama bikiya mumungu nja anya zunwa kowoni mumungu nsusuwa. 3 Sobon guru ntani durinya su bugu ni ruwa kilaki yi, e sa ntani yi nungwe a turiki de yi kyawu ba. Seleki durinya kwana nja shi, yaya bize durinya su ma nsu mbo nani te turiki bila zunwa zi dadi yi

4 Se Ni zi murinya daa dege bisi, nkye,

<<Ku butu, ntani na! Ku butu a siki yi!

de kede ku yuru a siki lepi yi;

de kede ku keleba poro yi!

5 Sobon lepi yi yi nyisa keyi bisi,

Mirikisi turunwa ni mungu mbo yi.

6 Ku yi poro kyakya yiride e yi ku;

Guru mbode e yi ku, ku lama son bi.

Ku sika koshiya yi ni riki de pi na yi sori son bi

yiride e yi ba ku.

7 Ku beyi Genbeki nja beki siki soseyi,

yiride e ba kiya yi dereja e yi zunwa zi dadi na kin.

a siki dishiyeyi yaa buga geba:

<E ni mma mata seleki na, nzunwa a kingbolo solota!

Mma mase makeyi na ba,

Na taba yi beki siki ba.>

8 Sobon a siki kwana daa sua dukwa Babila ni aloba,

shuwuta, beki siki, nja totolo nunwa.

sua suwuta yi ni wuta,

sobon Obagizi Mirikisi, de yaa yi shiriya, e ma nsu girima la.>>

9 Nsu seleki durinya de su kwana nja shi nja su yi zunwa zi dadi sua yi kuka nja anwe de su geni ayaki ni wuta de ma suwuta yi. 10 Sua sakisi nnyisa, sobon sua zi womba su Genbeki nja shi. Su nkye, <<Gbotuma ke! Gbotuma ke! Eke totolo geri Babila nsu sori! A siki keripi daa su yi ke poro!>>

11 Yaya bije durinya osu ma sua yi anwe nja beki siki a kiya e yi, sobon nseda see keikei su gagaba; 12 ba nsude yaa see keikei su ni zinari nja aziripa, dunsi nsu dereja, nja lulu asu, nja yadi lilin asu nsu kyawu, nja yadi nsu riki ni gawura, nja siliki, nja yadi nsu riki ja, nja ntasi nsu kemeshi yiri yiri, nja keikei ankuri giwa yiri yiri nja guru mbode su yi su dege ntasi nsu gyolo soseyi, nja keikei tagula, nja beki keripi, nja dunsi nsu sheki; 13 ni keyi su ni sinamon, nja keyi kemeshi, nja yaji, nja tularee, nja riki ni inebi, nja mayi, nja atuwa alikama nja saba alikama, nja saa, nja timshiya, nja akuya nja kyekye ni doki, nja bunwa, ko leyi ntani.

14 Yaya bije gye Babila nkye, <<Guru mbo kyakyawu de ki ma nshi su yaa, Guru mbo nani ke nja keikei gyaga ke su yaa, ka taba samu su gagaba!>> 15 Yaya bije de su samu mbo nani a turiki yi bije nja shi sakisi nnyisa, sobon su ma zi womba kede su sa su a siki Genbeki yi. Su mayi kuka! nja beki siki, 16 nkye, <<Gbotuma! Gbotuma oku ntani totolo geri Babila! Kwanki de bise ku sa keyi nsu kyawu, nja riga nsu riki gawura, nja riga zanza, nja keyi de yaa si waliwali nja keyi ni zinari, nja dunsi kyakyawu, nja lulu! 17 A siki keripi daa guru mbo nani yi bebeta!>>

Guru nsu kwanto nja nsu tepiya a siki kwanto, nja nsu tunkwa kwanto nja worede su ma samu mbo zunwa geri su a siki totolo riki, su sakisi nnyisa, 18 su yi kuka de su geni ayanki de suwuta Babila: su ma nkye, <<Su taba yi totolo geri daa kankye Babila ba>> 19 Su nya kula a kiya su, su ma yi kuka ni beki siki su ma nkye, <<Gbotuma! Gbotuma ke totolo geri Babila! Totolo geri de guru nsu totolo kwanto su ma nsu mbo a nani sobon ni dukiya yi! sede a siki keripi ndandaa ki lesa su guru!>>

20 Ku yi perisiki oku worede ku ma a bisi! Ku yi perisiki oku ntani Mirikisi nja yayamanki nja anebi! Sobon Mirikisi yi Babila mbode e yi ku nshi la!

21 Anya ni totolo meleku daa la dunsi de girima yi keyi ni dunsi leda kutiri a siki totolo riki, nkye, <<Yomuna Mirikisi yaa la totolo geri Babila kutiri a kisi yaa taba geni yi gagaba. 22 Sua taba zi nseda wula tapire asiki ke ba, ko nsu wonka, ko nsu pula tapire, ko nsu pula koho! Sua taba geni nsu sana bije daa asiki ke kuma jaja ba; sua taba zi mosi dunsi leda asiki ke gagaba! 23 Sua taba geni asikye pitila yi asiki Babila gagaba; Sua taba yi amere asiki ke gagaba. Yaya bije ake osu na su ma nsu sori a guru durinya, ni yaruwa asiri nja shishirigye ntani durinya guru!>>

24 A kesa Babila na su kisa ntani Mirikisi nja su la zini nsu anebi nya a kisi; e, zini guru worede su kisa a durinya.