1 <<Rubuta takada ba meleku Mirikisi shoshi de su ma Sadisu nkye:

Nsum na ma manki dege anya nsedaa de mani aworo bokwe ni Mirikisi nja kemu. Ni shina mbode ki ma yi; Kode sua geni ke nkye ki ma nsu leyi, sede ki ma mumuntu. 2 Sobon yomu dege a bisi, ka mbo de ki manshi nsori sobon kede e muntu kpataka. Sobon Ni geni anki ke ema kyakya anya Mirikisi ba. 3 Nkayomu, turunwa mbode ki keleba nja mbode ki zi; ki yi biyaya nshi, se ki juyi. Sede nde ki dege a bisi ba, Naa zo ke kankye bolowa, ka shina kowoni kwanki na Naa zo ba. 4 Sede worosu su piri a siki ku a Sadisu de su yi mbo mumungu ba. su wonkye keikei su ma peri shari, sua yi tepiya nja ni, ni keikei peri, sobon ku deta de ku yi. 5 Worede su yi nasara sua sa keikei peri yomu kankye su, Na taba shire seni su a siki takada ni leyi ba, sede Na sheeda seni asu anya ni Adaa nja meleku yi nkye ntani woromu su ma nnaa. 6 Nkayom, nde ki man kuni zi e zi mbode Aworo Mirikisi gye shoshi.

7 <<Rubuta takada te nja meleku Mirikisi ni nsubiya Yesu de su ma Piladepiya nkye:

<<Nsum e shina ma manki dege nsude man seki nja gaskye. De keyi mukuli de mani Dowuda, nde e bure kopa nseda yaa kule ba, nja mbode e kule nse da yaa bure ba. 8 Ni shina mbode ki yi; Ni shina nkye ki mani sori piri; ki biya kokoyi na nja ki ma beigaskye nja ni. Ni bure kopa a geba ke, de nse daa yaa ripe ba. 9 Zi! a kiya worede ma akunji ni Obiri, worede su mayi yaruwa nkye su ma Yawudawa, sukwa ma Yawudawa ba, Na sa sua zo puari a geba ke. De su shina nkye mma so ke. 10 Sobon ki ka doka de Ni ba ke ni ankuri, Eni ma na kiyaye ke a siki mungu kwanki ni gwada de yaa zo a kiya guru ntani de su ma a durinya.

11 Mma zo nseberi. Keyi mbode ki ma nshi nsori, sobon kede nseda e keleba lende ni nasara ke ba. 12 Na sa worede yi nasara de su ma mbo ka gizi ni Mirikisi na. Yaa saka butu bila siki yi ba. Na rubutu seni Mirikisi na nja seni kesa Mirikisi na a nki yi, wato sabuwa Wurishelima, de ma sonka dege bisi anya Mirikisi na; nja Naa rubuta sabuwa seni na nkyasu. 13 Nsude mani kuni e zi, bila de e zi mbode Aworo Mirikisi yaa pala gye guru shoshi.

14 <<Rubuta ba meleku Mirikisi ni shoshi de su ma Lawudiyawa nkye:

<<Manki mu butu anya nsude sua sukwa yi Emayomu! Nsu beigaskye nja nsu sheeda gaskye, nsude ma kamkiya ni guru mbode Mirikisi yi. 15 Ni shina mbode ki yi; Ni shina nkye ki seeni ko ki yi dimi ba. E yi kyawu de ki seeni ko ki yi dimi! 16 Sede sobon ki ma sisika, ki seeni ko ki yi dimi ba, Na butu ke bila baki na! 17 Ki nkye, <Ni mani mbo nani; Ni mani guru mbode na bila.>> Sede ki shina nkye eke ki ma mbo toseyi naba! Ki ma potoruwa, totombolo, nja makapi. 18 Nkayom, Ni ba ke shewura, ki see aziripa dege anya na, aziripa sere, sobon de ki mani mbo nani. See keikei peri de ki sa nki ke nja de ki ripe totombolo de yaa sa kumnya. De ki kwa see mangeni sa ndani ke, sobon de ka yi yaa geni. 19 Mma kobe nja poro worede Na so. Nkayomu, ki yi gaskye, se, ki juyi bila lepi ake. 20 Ku zi! Ni sakisi a baki kopa mma kwala; nde nsude zi murinya na de e bure kopa, Na zo a gizi yi de nsi mbosi nja shi, nja osu sua si nja ni. 21 Worede su yi nasara Naa ba su dama de su zunwa a keteri a gizi solota na, yiride ni yi nasara kuzukam Ni zunwa a keteri Adaa na a gizi solota yi.

22 <<Nde kuman kuni zi, se, ku zi mbode Aworo Mirikisi ma gye guru shoshi!>>