1 Se meleku Mirikisi nana ni totolo riki ni leyi, de ma yi asikye kankye gilasi, de ma sonka dege kingbolo solota ni Mirikisi nja ni Yaa Timshiya ni 2 ma yi gudu a sisika turiki totolo geri. A kowoni keteri ni riki mu ema ni ntasi leyi, de ma yapu yaya son gom sha bi a shekera, ntasi ni yapu son daa a kowoni wonta; genya ntasi ni ema sobon worikye guru ntani durinya. 3 Ba mbodaa de ma ni arigbotu a totolo geri ni ba. Sede kingbolo solota ni Mirikisi nja ni Timshiya na yaa ma totolo geri ni, se nsu bunwa yi sua bowuta yi. 4 Sua geni pisika yi nja sua rubuta seni yi a baki gan su. 5 Sua sakye yi dederi ba, nseda yaa bila pitila gagaba ko asikye nana, sobon Obagizi Mirikisi yaa ma asikye su, nja sua yi solota ni gbogbo.

6 Se meleku Mirikisi gye Ni nkye, <<Kelima woromu ma gaskye na kuma ema yomu na. Obagizi Mirikisi, de ba Anebi Aworo yi, e shiya saka meleku yi de nana bunwa yi mbode yaa paru a geba.>>

7 Yesu nkye,<<Ku zi!>>Mma zo seseberi! Anabirika ema nja worede su biya kelima de su rubuta a siki takada mu.

8 Eni, Yaaya na, Ni zi nja ni geni guru mbo woromu. De Ni gama zi nja geni mbo woromu, Ni puari a kisi de ni yii bowuta meleku de nana Ni mbo woromu. 9 Sede e gye Ni nkye, <<Kede ki yi ni bowuta! Eni mma bunwa ni Mirikisi la nja ke nja yayuwa ke de su ma nsu anebi nja guru worede su keyi kelima de ma a takada mu. Yi Mirikisi bowuta!>>

10 Se meleku gye ni nkye, <<Kede ki boyi kelima beta Mirikisi de ma a siki takada mu. sobon kwanki yi kusa de guru mbo woromu yaa paru. 11 Bila de du nsude yaa yi mumungu mbo e sigeba ni yi; bila de du nsude yaa yi mbo rebi a sigeba ni yi; bila de du nsude yaa yi mbo gangasi a sigeba ni yi mbo gangasi, bila de du nsude yaa yi mbo nsuseki a sigeba ni yi mbo nsuseki.>>

12 Yesu pala nkye, <<Ku zi>> <<Yaa dede ba na zo, ni nani wuta na, na ba konwawa kyakya mbode yi. 13 Eni na mma Alipa nja Omega, Ni Pari nja Karishe.

14 Anabirika ema nja worede su wonkye riga asu, de sua samu dama de su suku ntasi de ma ba ntani leyi nja sua yuru a siki totolo geri te baki kopa. 15 Sede worede su ma a woze osu na su ma worede ma mere seki, nja nsu yi asiri, nsu yi ali nungwe berikete, nsu kisa ntani, nsu kwana nja mata de ma na su ba nja mata nsu kwana nja menza de ma na su ba, nsu yaruwa nja worede su so ali yaruwa.

16 <<Eni Yesu, Ni saka meleku na de e ba ke manki mu sobon ntani shoshi. Eni mma dege zuriya ni seleki Dowuda, Eni na Ni ma kemu nsu asikye.>>

17 Aworo Mirikisi nja ntani Mirikisi nkye Yesu, <<Zo!>> Guru nsude zi nsum e shi ma e pala nkye, <<zo!>>

du nsude yaa bila de sha riki, e zo; du nsude yaa bila riki nsu beyi leyi kyawuta.

18 Ni gila du nsude e zi kelima ni takada mu: du nsude ja mbodaa a siki yi, Mirikisi yaa yi taala de ma a siki takada mu. 19 Nja nde nseda butu mbodaa dege siki takada mu, Mirikisi yaa la anya ni lobo ni ntasi leyi nja sua zunwa nja totolo Geri Nsuseki mu ba. mbode su rubuta a siki takada mu.

20 Nsude beyi sheeda ni mbo woromu guru nkye, <<Gaskye! Na dede ba na zo!>>

Ema yomu. zo, Obagizi Yesu!

21 Bila de Aniyeri ni Obagizi amu Yesu ema nja ku guru. Ema Yomu.