1 A beyi damu Ni zi mosi kankye murinya totolo ntani de tala a bisi, su mayi kuruwa nkye, <<Yobo Mirikisi! Sila, nja dereja, nja sori e mani Mirikisi amu la! 2 Sobon kowoni mbode e yi ema gaskye nja gangasi la! Mirikisi yi totolo mase kilaki mu tala de bebeta durinya ni ali yi ni nungwe. Mirikisi yi poro sobon e kisa bunwa yi.>> 3 Ntani de taala mu kwa yi kuruwa su ma nkye, <<Yobo Mirikisi Obagizi mu! Ayan ayanki wuta de suwuta totolo geri Babila dege ma te ni bisi ari gbogbo!>>

4 Se salaki ashiri ni wuru nja mbo nsu leyi guda wuru kwakwana a kisi su ma yobo Mirikisi, de zunwa a kingbolo solota. Su ma nkye, <<Mu yobo Mirikisi! Ema yomu!>>

5 Se murinya daa butu dege kingbolo solota, ma nkye, <<Yobo Mirikisi amu, guru aku bunwa yi nja ntani yi, worede su mayi womba ni dende nja toree!>>

6 Se Ni zi mosi kankye ni totolo yowa ntani, kankye mosi riki de mayi gudu nja kankye mosi ankpala. Ni zi su ma nkye, <<Yobo Mirikisi! Sobon Obagizi, Mirikisi amu nsu girima, ema seleki! 7 Bila de mu yi peri siki nja muruna nja mu beyi girima! Sobon amere ni yaa timshiya e rigye zowo, Okeshe yi, yi shiri. 8 Mirikisi ba su riga lilin sere nsu asikye, de su sa.>> Riga lilin mu ema nana ANKI gangasi ni ntani Mirikisi de su yi.

9 Se meleku gye Ni nkye, <<Rubuta mbo mu: Anabirika ma nja worede su poyi su a buki ni Yaa timshiya.>> meleku kwa nkye, <<Da mu nama kelima Mirikisi amu ni gaskye.>>

10 Se anya ni Ni dure a kisi a geba meleku ni de Ni bowuta yi, e gye Ni nkye, <<Kede ki yi yomu ba, Eni ni ma bunwa na nja ku nja yayuwa ke de su keyi kelima ni Yesu. Ku bowuta Mirikisi!>>

Sobon gaskye de Yesu pelesa e shiya ema aworo ni pala mbode a paru a geba.

11 Ni geni bisi bure, ayan ni geni peri doki. Nsu nunwa yi su ma sukwa yi nsu aminshi nja nsu gaskye; e mayi shiriya gangasi nja yanki yi. 12 Ndani yi ema kankye arishiya wuta de ma si, e yi lende nyowa a kiya yi. De su rubuta seni asiki yi de nseda shina ba sede e shi dandaa na shina. 13 Riga de e sa juku ni zini. Seni yi ma <<kelima ni Mirikisi.>> 14 Shoja yanki bisi su ma biya e yi, su ma a kiya doki peri nja su sa keikei lilin peri sere. 15 A baki yi obalaba de ma yi sisi butu, de yaa yi ampani nshi e juru kesa durinya. Yaa yi solota a kiya su ni gwala keripi, yaa tataka yaya inebi anya de su ma tapi inebi ni anwashi Mirikisi nsu girima. 16 A siki keyi nja shiriya yi su rubuta seni mu: <<Seleki ni nsu seleki nja Obagizi ni nsu obagizi.>>

17 Anya ni Ni geni meleku daa sakisi a nana, e sukwa guru nsusuwa de su ma dege a bisi ni totolo murinya nkye, <<ku zo ku tala anya totolo buki ni Mirikisi, 18 ku zo de ku suku nama ni nsu Seleki, nja toree shoja nja nama shoja, nja nama doki nja nsu nunwa doki, nja nama guru ntani, bunwa ko ki ma bunwa ba, yaya dende nja toree!>>

19 Anya ni Ni geni daba daa nja nsu seleki durinya nja shoja asu tala anya daakaka de su yi yanki nja nsude zunwa a kiya doki nja shoja yi. 20 Se su ka daba ni nja anebi nsu yaruwa de yi mbo mamanki a geba daba ni, ni mbo mamanki mu na e shirigye ntani de su keleba alama daba ni nja worede bowuta kamani ni daba. Daba nja anebi yaruwa yi Mirikisi la su kutiri nleyi te a siki totolo wuta nsu suwuta ni peri wuta nsu royi. 21 Mirikisi kisa ririgye shoja asu ni obalaba de ma butu a baki nsude zunwa a kiya doki ni; se guru nsusuwa suku nama su ari su koshi.