1 Takada mu e ma mbode Yesu Kiristi pelesa la. Mirikisi nana bunwa yi mbode yaa paru a geba ndede ba. Nkayomu Kiristi saka Meleku ni manki te anya bunwa e yi Yaaya, 2 se pala kelima Mirikisi. Yaaya pala guru mbode e geni. Manki mu e ma a kiya manki butu anya Mirikisi de pelesa te anya Yesu Kiristi. 3 Anabirika ma nja nsude karanta takada mu, nja peri siki ma nja worede karanta kelima ni manki mbode yaa paru, nja su kiyaye mbode ma rubuta a siki takada mu! Sobon kwanki yi kusa de mbo worosu mu guru yaa paru.

4 Manki butu anya Yaaya te nja shoshi de su ma anya bokwe a kesa ni Asiya:

Aniyeri nja selema ma na ku dege anya Mirikisi, nsude e shiya ma a beyi, nsude ma kuzukam, nsude ma daa nja nsude yaa zo, nja dege aworo bokwe de ma geba kingbolo solota Mirikisi, 5 nja dege anya Yesu Kiristi, nsu beyi sheeda ni aminshi, nsude e shiya ma pari a siki worede su dege a kumsha, nsude e mayi solota seleki ni durinya mu.

E so mu, te anya nya zini nja beyi nki yi sedeka de muntu e sila mu dege lepi mu. 6 E samu de mu ma nsu solota ni pirisi de mu bowuta Mirikisi mu nja Adaa. Te anya Yesu Kiristi girima nja sori e ma ni gbogbo nja gbogbo! Emayomu.

7 Kone, yaa zo a siki gidagida,

kowon nse yaa geni yi,

ari worede su sukwa yi ni masu;

guru ntani durinya sua yi bekisiki sobon nshi.

Yomuna yaa ma. Emayomu!

8 Obagizi Mirikisi nsu girima nkye, <<Eni na ni ma pari nja karishe,>> nsude ma kuzukam, Nsude ma daa, nja nsude yaa zo.

9 Eni ni ma, Yaaya, yayiwa ku, nsu biya Yesu Ni ma oboki anki nsu ankuri ni kadishiya a siki Genbeki ni worede ma nsu solota yi. Su la ni ta Patmos geri de gyewe ni riki sobon ni ma beyi manki kelima beta Mirikisi nja gaskye de Yesu pelesa. 10 A nana ni Obagizi Aworo Mirikisi la ni. Se Ni zi murinya nsori kankye tapire, ema yi beta a beyi na. 11 Se murinya nkye. <<Rubuta mbode ki geni, se ki beyi manki ni takada ta shoshi de su ma totolo geri bokwe ni: Apisa, Simina, nja Angala, nja Tiyatira, nja Sadisu, nja Piladepiya, nja Lawudikiya.>>

12 De ni juyi de ngeni nsude meyi beta nja ni, Se Ni geni gwala zinari bokwe ni pitila sakisi, 13 se mbodaa sakisi a sisika su kankye nsebeki, e sa keikei nnyisa ripe seni yi, nja shompa ni zinari gyewe gebeyi. 14 Gesa kiya yi ma peri kankye oruru, ko peri kankye oruru, ndani yi yaa si waliwali kankye arishiya wuta; 15 Kisi seni yi yi za kankye tagula de su kila yi amikila, murinya yi ma kankye ndani miya de e ma yowa. 16 E keyi kemu bokwe a nani dama yi, nja tokopi nsu baki bi butu a siki baki yi. Pisika yi ema yi asikye kankye nana ma sisika. 17 De Ni geni yi, Ni puari a geba yi kankye gan. Se e sani nani ni dama yi nkye: <<Kede ki zi womba. E ni na ni ma pari nja karishe. 18 Eni na ni ma nsu leyi; Daa Ni muntu, sede kuzukam Ni ma leyi ni gbogbo nja gbogbo. Ni ma yiko a kiya muntu nja anya zunwa worede su muntu. 19 Nkayomu, ki rubuta, guru mbode ki geni kuzukam, nja mbode yaa paru a geba. 20 Da mu e shiya ma maana ni kemu bokwe de ma a boyi a nani dama na, nja gwala keyi pitila bokwe: Kemu bokwe ni ema meleku ni shoshi bokwe, nja gwala pitila bokwe ema shoshi bokwe.