1 Se Ni geni meleku daa ma sonka dege bisi, e mani mukuli bure kopa ni romu de mani karishe ba mu nja e kuma keyi totolo serika anani yi. 2 Meleku ka totolo daba de ma kankye mesi mu, de ma tun daa, e shiya ma mungu nse ko obiri, meleku ni domuna yi ari shekera dupu. 3 Meleku mu la yi kutiri te a siki totolo romu nsu nyisa mu, e ripe romu ni e kwa kule, de e nana obiri shirigye ntani durinya jaja ari shekera dupu e bise. A beyi yomu, sua shika yi ni kwanki piri.

4 Se Ni geni kingbolo solota, worede zunwa akyiyasu su ba su yiko de su yi shiriya. Ni kwa geni worede su kisa su sobon beyi shida a kiya Yesu nja kelima Mirikisi. Osu na su ma ntani de bowuta daba mu ba ko su bowuta kamani yi ba, su keleba alama yi a baki gan su ko a nani su ba. Su kwa man leyi, su yi solota kankye nsu seleki nja Kiristi ari shekera dupu. 5 Ririgye worede su muntu su dege nleyi ba se shekera dupu mu bise. Da mu nama dege a kumsha ni pari. 6 Nsu anabirika nja nsuseki na worede su man lobo a siki dege a kumsha ni pari. Muntu ni bi ma ni sori a kiya su ba, sede su ma pirisi ni Mirikisi nja ni Kiristi, sua yi solota nja shi ari shekera dupu.

7 A beyi de shekera dupu mu bise, Meleku Mirikisi yaa shika Obiri dege anya de su ripe yi.

8 Obiri yaa butu awuje de e shishirigye guru ntani kesa durinya, de ma, Gog nja Magog. Obiri yaa tala su de su yi yanki, yowa su ma kankye nyashi ni baki totolo riki. 9 Su butu yaapi a durinya su gyewe anya de ntani Mirikisi ma zunwa, nja geri de Mirikisi ma so. Sede wuta butu dege bisi suwuta su. 10 Se Obiri de shishirigye ntani, Meleku Mirikisi la yi kutiri a siki odum wuta nsu suwuta ni peri wuta, anya de la daba nja nsu anebi yi ni yaruwa kutiri; anya ni sua Genbeki dederi nja nana ari gbogbogbo.

11 Ayani Ni geni totolo kingbolo ni solota peri nja nsude zunwa a kiya yi. Bisi nja kisi beta bila geba yi su sakye geni su gagaba. 12 Se Ni geni worede su muntu, toree nja yaya dende, sakisi a geba kingbolo solota. Su bure worosu takada, se su kwa bure takada daa de ma takada leyi. Se worede muntu su yi su shiriya kyakya ni mbode su yi, yiride ema a rubutu a siki takada woromu. 13 Totolo riki beyi mbode su muntu a siki yi, muntu nja anya zunwa worede su muntu osu ma su beyi worede su muntu a siki su du. Mirikisi yi konwawa shiriya kyakya ni mbode e yi. 14 Se Mirikisi la muntu nja anya zunwa nsu muntu kutiri te a siki totolo wuta. Totolo romu wuta mu e shiya ma muntu ni bi. 15 Guru nsude su rubuta seni yi a siki takada ni leyi mu ba, su la yi kutiri te a siki totolo romu wuta mu.