1 Se Ni kwa geni totolo meleku daa e ma sonka dege bisi. E mani gidagida gyewe nki yi nja omelede gyewe kiya e yi; pisika yi ma kankye nana, seni yi ma kankye wuta. 2 E mani dende takada daa a nani yi de e ma a bure. E sa seni yi ni dama a totolo riki seni guni yi kuma e la sa a kesa, 3 Se e yi kuruwa ni totolo murinya de yi kala kankye kuruwa zaki. A beyi de yi kuruwa, se akpala bokwe su yi keleba ni totolo kala. 4 Dandani de akpala su gama beta, Ni bila de ni rubuta. Sede Ni zi murinya dege bisi yi beta nkye, <<Boyi mbode akpala bokwe su pala mu; kede ki rubuta su ba!>>

5 Se meleku de Ni geni yi sakisi a totolo riki nja a kesa dege nani yi ni dama ta bisi. 6 Meleku ni melese ni seni Mirikisi, de man leyi ari gbogbogbo, de yi bisi, ni kisi, nja totolo riki, nja guru mbode su ma a siki asu. Meleku ni nkye, <<Sua la kwanki ba! 7 Sede meleku ni bokwe ya pula koho yi na, Mirikisi yaa gama mbode yaa bila de yi a boyi, kankye yiri de e pala gye nsu bunwa yi nsu anebi.>>

8 Se Ni kwa zi murinya de yi beta nja ni dege bisi, jaja nkye, <<Te de ki keleba takada de ma a bure a nani meleku de sakisi a kiya totolo riki nja kesa ni.>>

9 Se Ni te anya meleku ni minya yi de e ba ni dende takada ni. Meleku ni gye ni nkye, <<Keleba de ki suku; yaa musha a siki ake, sede a baki ake yaa mani zanki kankye zuma.>>

10 Se Ni keleba dende takada ni dege nani Meleku ni suku, e yi zanki kankye zuma a baki na. Sede a beyi de Ni sherenka yi, e yi lasi a siki na. 11 Se su sakye gye Ni jaja nkye, <<E ma dole na ki gye zuriya, nja ntani nyowa beta Mirikisi, nja nsu yare mbombom, nja nsu seleki nyowa.>>