1 A beyi yomu Ni geni meleku Mirikisi wuru su sakisi a keteri wuru ni durinya, su ka akusuka wuru mu de kede e pula a kiya kesa ko a totolo riki ko a kiya ntasi. 2 Se Ni sakye geni meleku Mirikisi daa e ma zo dege anse ni lomba ni Mirikisi nsu leyi. Ni totolo murinya e sukwa meleku Mirikisi wuru de Mirikisi ba su sori de su bebeta kesa nja totolo riki. 3 Meleku Mirikisi nkye, <<Kede ku bebeta durinya, ko totolo riki, ko ntasi, se mu sa bunwa ni Mirikisi mu alama agaa su tuku.>> 4 Se su geni yowa ni ntani de Meleku Mirikisi su sa su lomba agaa su ntani worosu mu ma dege siki zuriya gom sha bi ni Izireyila su keyi ntani dupu deri ni aribeni ni wuru. 5 Ntani dupu gom sha bi dege kowoni zuriya: Dege zuriya ni Yawuda ntani dupu gom sha bi, zuriya ni Ruben ntani dupu gom sha bi, zuriya ni Gad ntani dupu gom sha bi, 6 dege zuriya ni Asha ntani dupu gom sha bi, zuriya ni Natali ntani dupu gom sha bi, zuriya ni Manasi ntani dupu gom sha bi, 7 dege zuriya ni Saminu ntani dupu gom sha bi, zuriya ni Lawi ntani dupu gom sha bi, dege zuriya ni Isaka ntani dupu gom sha bi, 8 dege zuriya ni Zebulun ntani dupu gom sha bi, zuriya ni Yusupu ntani dupu gom sha bi, dege zuriya ni Biliyaminu ntani dupu gom sha bi.

9 A beyi yomu Ni kone, Ni geni totolo tala ni ntani. De nsedaa yaa yi yaa kiriga ba! Su butu dege kowoni zuriya a durinya, nja arishiya, yare, su sakisi a geba kingbolo solota nja geba ni Yaa Timshiya Mirikisi, su sakisi ni riga peri su keyi opanpo gima a nani su. 10 Su yi sukwa ni totolo murinya sua pala nkye: <<Sila butu dege anya Mirikisi mu, de zunwa a kiya kingbolo solota yi, nja Yaa Timshiya Mirikisi!>> 11 Guru meleku Mirikisi su sakisi gyewe kingbolo solota ni, nja toree, nja daba nsu leyi guda wuru mu. Su dure a geba kingbolo solota mu su ma bowuta Mirikisi nkye, 12 <<Ema yomu! Yobo, nja dereja, nja simi, nja gbede, nja girima, nja yiko, nja sori butu dege anya Mirikisi amu ni gbogbo gbogbo! E ma yomu!>>

13 Daa a siki toree mu minya ni nkye, <<Nsu waa damu de su sa keikei peri mu, dege anga na su butu?>>

14 Ni keleba nkye, <<Male. Ni shina ba, eke na ki shina.>>

E pala gye ni nkye, <<Worede su butu dege siki mumungu Genbeki. Osu na su wonkye keikei su ni zini Yaa Timshiya Mirikisi na su ma peri. 15 E shiya sa su sakisi a geba kingbolo solota Mirikisi su ma bowuta yi ndederi ni nana a siki gizi yi. Nsude zuzunwa a kiya kingbolo solota yaa tengele su kowoni kwanki. 16 Sua sakye zi nyunwa ko kishi riki gagaba; sua sakye zi zapi nana ko ni wuta ba, 17 sobon Yaa Timshiya Mirikisi de ma a sisika kingbolo solota yaa ma nsu kone su, yaa keyi su te anya ni romu riki nsu beyi leyi. Yomuna kuma Mirikisi yaa shire guru anwe dege ndani su.>>