1 Se Ni geni sabuwa bisi nja sabuwa kisi. Sobon bisi ni pari nja kisi ni pari beta ma su, totolo riki ma du beta. 2 Ni geni totolo geri Nsuseki, sabuwa Wurishelima, ma sonka dege bisi anya Mirikisi, Mirikisi shiriya yi kankye okeshe de su yi gyaga kyakyawu ma pekye de e gom nja minji yi. 3 Se Ni zi murinya daa yi beta nsori dege kingbolo solota: nkye, <<Kuzukam anya zunwa Mirikisi ma nja ntani yi! yaa zunwa nja su, sua ma ntani yi. Mirikisi nkiya yi yaama nja su, yaa kwa ma Mirikisi asu, 4 Mirikisi yaa shire su anwe a ndani asu. muntu yaa ma kuma gagaba ko beki siki ko kuka ko Genbeki, sobon wuri mbo rigye bise wo.>>

5 Mirikisi de zunwa a kiya kingbolo solota nkye, <<Kuzukam Na yi guru mbo sabuwa!>> E kwa gye ni nkye, <<Rubuta mbomu, sobon kelima mu ema gaskye nja mbo tebeshi la.>>

6 E gye ni nkye, <<Su gama! Eni na ni ma Alipa nja Omega, Pari nja karishe. Guru nsude yaa bila sha riki Na beyi de e sha dege ndani riki de ma beyi leyi yaa beyi gyolo. 7 Guru worede shakiya sua keleba nani wuta su anya na: Na ma Mirikisi asu, osu sua ma yaya na. 8 Sede worede su ma zi womba, worede su ki beigaskye, nsu yi mbo kazanta, nsu kisa ntani, worede sua nungwe a turiki mumungu, worede sua yi asiri, worede sua biya boka nja guru nsu yaruwa anya zunwa su ma a siki totolo romu wuta de ma suwuta ni peri wuta nsu royi, da mu nama muntu ni bi.>>

9 Daa a siki meleku bokwe de su mani gongo bokwe sika ni aloba bokwe ni karishe zo anya na nkye, <<Zo, Na nana ke Okeshe de ma mata ni Timshiya.>> 10 Aworo Mirikisi biya nja ni, Meleku Mirikisi la ni ta a kiya totolo dunsi nsu nyisa. E nana ni Wurishelima, totolo Geri Nsuseki, butu dege bisi ma sonka a kisi dege anya Mirikisi 11 ema yi asikye ni dereja Mirikisi. Totolo geri ni mayi asikye kankye dunsi nsu dereja, kankye jesipa, yaa yi asikye sere kankye gilasi. 12 E mani totolo golonwa de gyewe yi ni kopa gom sha bi, nja ni meleku gom sha bi a kowoni kopa. A kowoni kopa su rubuta seni kowoni zuriya gom sha bi ni Izireyila. 13 A kowoni keteri totolo geri mu eman kopa wuku, te ni anse kopa wuku, te ni nyema kopa wuku, te ni kudu kopa wuku, te ni arewa kopa wuku. 14 Golonwa ni totolo geri e mani kutiri laki gom sha bi, a siki kowoni daa su ma nseni yayamanki gom sha bi ni Timshiya Mirikisi.

15 Meleku de yi beta nja ni e mani angwe gonta ni zinari, de agonta totolo geri mu, baki kopa yi nja golonwa yi. 16 Totolo geri e mani keteri, nyisa yi nja bure yi ma yiri daa, se meleku gonta totolo geri ni gwala gonta nyisa yi ema seni dubu gom sha bi: Bure yi nja nyisa yi ema yiri daa la. 17 Meleku Mirikisi kwa gonta golonwa ni geri ni, se nyisa yi ema seni deri bi ni gom shaashida, yiride nsebeki ma gonta na meleku gonta du. 18 Su gina golonwa mu ni dunsi jesipa. Su gina geri mu ni zinari nsu asikye sere kankye gilasi. 19 Totolo dunsi de su kapa kutiri ni golonwa ni totolo geri su yi gyaga kowoni yiri dunsi kyakyawu. Dunsi pari de su kapa kutiri ma Jesipa, ni bi ma Sapaya, ni wuku Agat, ni wuru ma zumurudu; 20 Ni biyari ma Oni, ni shida kameliya. ni bokwe ma kirisodo, ni takusi ma bereli, ni tera ma topazi, ni gom ma damon, ni gom shaada ma Yaa si, ni gom sha bi ma amitis. 21 kopa ni totolo geri gom sha bi mu su yi lulu gom sha bi mu. Turiki ni totolo geri mu su yi ni zinari de ma sere. 22 De Ni kone, Ni geni laki Mirikisi a siki totolo geri ni ba, sobon Obagizi Mirikisi nsu yiko nja timshiya. 23 Totolo geri mu yaa bila asikye nana ko ni wonta ba, sobon dereja ni Mirikisi e shiya yaa ba yi asikye, nja Timshiya na ema kankye pitila yi. 24 Ntani durinya guru sua yi tepiya a siki asikye nja nsu seleki ni durinya sua zo ni guru girima dereja su a siki geri ni. 25 Kopa ni totolo geri mu yaama bure kowon nana, sua ripe yi ba, sobon dopuwa yaama anya ni ba. 26 Dereja nja girima ni kesa guru sua zo nshi a siki yi. 27 Sede ba mbode ma nsu dola de yaa yuru a siki yi ba, ko nsude yaa yi mbo ni kumnya ko nsu yaruwa, sede worede seni su ma a siki takada leyi ni Timshiya.