1 Se su geni totolo mbo mamanki butu a bisi. Mase daa, yi gyaga kankye nana, wonta ma a kisi seni, yi nja lende ni kemu gom sha bi a kiya e yi. 2 Ema bila de yapu ya, Genbeki ni yapu ya e sa yi, yi mayi kuka. 3 Se mbo mamanki daa saki butu a gidagida. Se woni totolo meshi de ma zanza kankye daba de sua sukwa yi nkye <<Dragon>> e ma ayan. e man kiya bokwe nja koho gom nja lende da a kowon a kiya yi. 4 Daba ni yi anpani ni awushiya e yi e ja kunji wuku ni kemu kutiri a kisi a durinya. E sakisi a geba mase de mani siki ni, de e suku yi yaa dandani nde e yapu. 5 Se mase ni yapu yaa minji, nsude yaa yi solota ni guru ntani durinya ni gwala solota. Sede su keleba yaa mu abenshi anya Mirikisi a kingbolo solota yi. 6 Mase mu yi gudu te a siki denka, te anya de Mirikisi shiriya yi nshi, anya de sua kula nshi ari shekera wuku ni wonta shida 1,260.

7 Se yanki dege a bisi. Mikayelu nja meleku yi su yi yanki nja totolo daba de sua sukwa yi dragon, e juyi yi yanki ni Mikeyilu nja meleku e yi. 8 Sede totolo daba de sua sukwa yi dragon, su yi nasara a kiya yi nja meleku e yi, su bila su zunwa a bisi ba. 9 Se Mikayilu nja meleku yi la totolo Ododo nsu nki meshi mu ni tun da kutiri a kisi, meshi de sua sukwa yi Obiri, meshi ni e ma susupe meshi tun daadaa, de sua sukwa yi mungu ko Obiri, nsude yaa shishirigye guru ntani durinya. Su kutiri yi ta durinya, e shi nja guru meleku yi.

10 Se ni zi murinya nsori butu a siki bisi nkye,

<<Kuzukam Sila Mirikisi e zo! Kuzukam Mirikisi nana sori yi ni seleki! Kuzukam Kiristi e yi nana yiko yi! Sobon nsu de sakisi a geba Mirikisi mu yaa yi kara nsu yayuwa mu nnana nja ndederi su kutiri butu a bisi zo a kisi. 11 Yayuwa mu su yi nasara a kiya yi sobon su yi anpani ni zini ni Yaa Timshiya ni Mirikisi nja te anya gaskye de su pala; su yeda de su muntu. 12 Sobon yomu, guru aku de kuma a bisi, nja oku de kwa zunwa a siki e yi ku yi peri siki! sede kuzukam gbotu aku kesa nja totolo riki, sobon Obiri sonka zo anya ku a kisi ni anwashi a dishiya yi, sobon e shina nkye e man kwanki piri!>>

13 De totolo daba de sua sukwa yi <<Dragon>> shina nkye su kutiri yi zo kisi, e para biya mase de yapu ya minzi mu. 14 Sede su ba mase mu pinikiya bi ni a kunka yiri ni ashirinwa de dege te anya yi adenka, anya de sua kula nshi ni shekera wuku ni rebi, de kede daba ni e geni yi gagaba. 15 Se totolo daba de sua sukwa yi <<Dragon>> mu buburi riki a baki yi kankye ndaruwa a beyi mase mu, de e la mase mu sherenka. 16 Sede kesa sua mase mu nto. Kesa bure baki yi e sherenka riki de butu dege baki totolo daba de sua sukwa yi <<Dragon>> mu. 17 Da mu sa totolo daba nsu sa womba de sua sukwa yi <<Dragon>> mu yi anwashi nja mase. se e si geba ni topula nja ririgye juriya mase mu, guru worede sua biya doka Mirikisi nja nsu biya gaskye de su zi anya Yesu. 18 Nkayomu totolo daba de nsu sa womba de sua sukwa yi <<Dragon>> mu sakisi a baki ndan miya.