1 Se ni kone, ni geni Yaa Timshiya Mirikisi sakisi a kiya ogbo ni siyona. Anya de e sakisi ntani dupu deri daa ni aribeni ni wuru worede su mani seni yi nja seni ni Adaa yi de su rubuta a baki gan su. 2 Se ni zi murinya dege bisi yaa yi mosi kankye ruwa de mma yowa, nja kankye mosi dunsi akpala. Yaa yi mosi kankye sua buga kakaki asu. 3 Ntani dupu deri daa ni aribeni ni wuru sakisi a geba kingbolo solota, mbo nsu la yi wuru nja toree. Sua yi wonka sabuwa, de e se da yaa kokoyi ba se worosu de Mirikisi keleba su shika a durinya. 4 Toree worosu mu osu na su ma menza de su ka nki su sere de su kwana ni mase de ma na su ba; Su taba kwana mase ba. su ma ntani de biya Yaa Timshiya mu kowon anya de yaa te. Su butu su dege siki ntani nkye osu na su ma ntani ni pari de su beyi nki su anya Mirikisi nja Yaa Timshiya ni Mirikisi. 5 Su taba shina su nyaruwa ba; su ma mere lepi.

6 Se ni geni meleku Mirikisi daa yaa dege a bisi akusuka. Yaa beyi manki kyakyawu ba guru ntani durinya, nja kowon juriya, nja yare, nja arishiya nja kesa. 7 E yi beta nja ntani ni totolo murinya e pala nkye, <<Ku yobo Mirikisi ku yobo girima e yi! Sobon kwanki ni yi de yaa poro ntani yi, ku bowuta yi e shi de yi bisi, nja kisi, nja totolo riki nja nda miya.>>

8 Meleku ni bi yeda beta ni pari nkye, <<E puari! E puari Babila totolo geri puari! E sa guru ntani kesa, sha riki inebi, riki nsu sori yaa sa su de su kwana ni mase ko nse minzi de ma na su ba.>>

9 Meleku ni wuku yeda ni beta Meleku ni pari nja ni bi ni totolo murinya yaa pala nkye: <<Worede su bowuta daba nja gunki ari su keleba alama akyiyasu ko a nani su, 10 E shi, du, yaa sha riki inebi ni anwashi Mirikisi, nsude su nya yi ni anwashi a siki koshiya ni anwashi ni Mirikisi! Guru nsude bowuta totolo daba nsu sa womba mu, Yaa sha Genbeki a wuta de sua sukwa yi solpo. A geba Meleku nja Yaa Timshiya ni Mirikisi. 11 Ayanki ni wuta de sa su Genbeki dege ta a bisi ni gbogbo. Du nsude bowuta daba nsu sa womba mu nja gunki, su mani alama ni seni yi agaa su, sua taba butu a siki Genbeki ba ndederi nja nnana.>>

12 Nsum yaa nana nkye ntani Mirikisi su ma kadishiya. Osu na su ma ntani de sua biya doka Mirikisi nja su biya beigaskye Yesu.

13 Se ni zi murinya butu a bisi nkye, <<Rubuta mbo mu: Perisiki ma nja worede su muntu a siki ANKI Obagizi kuzukam ta geba!>>

Aworo Mirikisi nkye, <<Ee yomuna!>> Sua pushe bila ANKI wuya de sua yi, sobon sua samu nani wuta.>>

14 Se Ni kone, Ni geni gidagida peperi. Mbode zunwa a gidagida mu ma kankye nsebeki ni lende ni aziripa a kiya e yi, se e keyi rije de yaa si a nani e yi. 15 Nkayomu se meleku daa butu dege gizi Mirikisi nja kuruwa ni totolo murinya te nja nsude zunwa a siki a gidagida nkye, <<Kwanki ni yaka mbo bikiya yi kuzukam, yi anpani ni rije ake de ki yi yaka. Durinya deta yanka!>> 16 Se nsude zunwa a gidagida kutiri rije yi zo a durinya, se e yanka durinya.

17 Se ni geni meleku daa butu a gizi Mirikisi a bisi, e shi ma du e mani rije de yaa si. 18 Se woni meleku da, nsude yaa kula nwuta, butu dege anya de sua munka sedeka. E yi sukwa ni totolo murinya te nja meleku de mani rije nsude yaa si nkye, <<Yi ampani ni rije ake, de ki yaka yaya inebi ni a durinya, sobon su nunu!>> 19 Se meleku mu mamanga rije te a durinya, yenkye yaya inebi dege ntasi yi, se ki kutiri yi te anya masa yaya inebi ni anwashi Mirikisi. 20 Su masa yaya inebi anya de sua masa inebi a beyi geri. zini butu a siki anya masa yaya inebi yaa yowa kankye ndan miya. E mani meli deri bi nja limiyi yaa keyi nyisa seni biyari.