1 <<Rubuta manki te anya meleku Mirikisi ni shoshi de ma Apisa:

<<Da mu nama manki dege anya nsude keyi kemu bokwe a nani dama e yi nja nsude yaa yi tepiya a sisika gwala aziripa bokwe ni anya lete pitila: 2 Ni shina mbode ki yi; Ni shina yiri wuya ni anki de ki yi nja ankuri de ki manshi. Ni shina nkye ka so mungu ntani ba nja ki gwada worede su nkye su ma yayamanki Yesu Kiristi sede su ma yayamanki ba, nja ki geni su ma nsu yaruwa la. 3 Ki kadishiya, ki Genbeki sobon eni, nja ki butu dishiya ba.

4 Sede nsu mu ma mbode Ni ma so ba a kiya ke: Kuzukam ki so Ni yiride ki so ni npari ba. 5 Turunwa ni yiride ki puari! Juyi bila lepi ke nja de ki yi mbode ki yi npari. Nde ki juyi bila lepi ke ba, Na zo anya ke de nla gwala pitila ke bila anya de e manshi. 6 Sede a keteri daa ki yi kyakya: yiride ki ki anki ni Nikolatawa yiride eni ma Ni ki.

7 <<Nkayomu nsude mani kuni zi, se e zi mbode Aworo Mirikisi yaa gye nsu Shoshi. Guru nsude shakiya, Naa beyi dama de suku yaya ntasi ni leyi, de butu a bikiya ni Mirikisi.>>

8 <<Rubuta manki ta anya meleku ni shoshi de su ma Simina:

Nsum na ma manki butu anya nsude e ma pari nja karishe, nsude muntu e kwa dege man leyi jaja. 9 Ni shina wuya ke; Ni shina nkye ki ma potoruwa, sede gaskye ki ma nsu nani la! Ni shina mungu mbode ntani de sua nkye su ma Yawudawa sua pala a kiya ke sede e ma yomu naba; su ma kunji ntani de mani Obiri! 10 Kede ki zi womba ni Genbeki de ka te sha. Ki zi! Obiri yaa gwada ke yaa sa worosu su ku a jaru, se Genbeki ku yaa dede ni nana gom. Ki beigaskye nja ni, ko e ma de sua kisa ke, na ba ke leyi de e ma lende ni nasara ke. 11 <<Nde ki ma kuni zi, to ki zi mbode Aworo Mirikisi ema pala gye shoshi! <<Worede yi nasara sua Genbeki muntu ni bi ba.>>>

12 <<Rubuta manki te nja meleku ni shoshi de ma Pegamu nkye:

<<Nsum nama manki dege anya nseda de mani tokopi nsu si baki bi. 13 Ni shina anya de ku ma. Kuma zunwa anya de obiri mayi solota. Nzun yomu ki beyi gaskye ni, ki bila beigaskye a kiya na ba ko kwanki de Akipa de beyi kyakyawu sheeda a kiya na, su kisa yi anya de obiri ma zunwa. 14 Sede niman worosu mbo piri a kiya ku: worosu a siki ku su biya kokoyi ni Balamu, nsude kokoyi Balaki yiride e sa ntani Izireyila de su yi lepi te anya ka su dole de su si mbosi de su yanka ba boka nja de su ma nsu kwana ni mata ko menza de ma na su ba. 15 A turiki yomu ku mani worosu ntani a siki ku su biya kokoyi ni Nikolatawa. 16 Kuzukam ku juyi bila lepi ku! Nde ku juyi ba, Na zo anya ku seseberi de Ni yi topula ngeba ni ntani woroni nja tokopi de butu a siki baki na.

17 <<Nkayomu nde kuma kuni, se, ku zi mbode Aworo Mirikisi yaa gye guru shoshi!

<<Te anya worede su yi nasara Na ba su mbosi de ma boyi de sua sukwa yi Maana. Na kwa ba kowon da a siki su dunsi peri de su rubuta sabuwa seni a kiya yi ba nse daa de shina ba sede nsude su beyi.

18 <<Ki rubuta manki ba meleku Mirikisi ni shoshi de ma Tiyatira:

<<Da mu na e ma manki dege anya Yaa Mirikisi, de ndani yi ma kankye arishiya wuta, nsude tapi seni yi ma kankye keripi mikila. 19 Ni shina mbode ki yi. Ni shina So de ki ma yi, beigaskye a ke, anki ke nja ankuri ke. Ni shina nkye ki ma yi anki kuzukam de pi ni pari. 20 Sede mbode mma so nja ke ba naka: Ki yeda nja mase Jezebe, de e la nki yi nkye ema yamanki Mirikisi. Te anya kokoyi yi e biya ni bunwa na e sa su bebeta nja sukwa si mbosi de su munka ba boka. 21 Ni beyi kwanki de juyi bila lepi, sede e ki de juyi bila lepi mase ki laki. 22 Sobon yomu Na sa yi de yi suwo e shi nja worede sua kilaki de su Genbeki. Na yi mbo mu kuzukam se nde su juyi bila mungu mbode sua yi nja shi. 23 Na kisa worede sua biya yi, yomu na guru shoshi sua nkye Eni na Ni shina guru bita dishiya nsebeki nja mbode yaa so. Na kwa ba ko nse nani wuta mbode yi.

24 <<Sede ririgye ku a Tiyatira de ku biya mumungu kokoyi ba; ku biya mbode worosu su nsu biya sua kokoyi a boyi ni Obiri ba. Ni gye ku mma taba sa ku woni loni ba. 25 Sede ku keyi beigaskye ku ari Ni zo.

26 Guru nsude yi nasara, de e kwa sigeba ni yi mbode mmaso ari karishe, Na beyi yiko de yi solota a kiya ntani,

27 <Yaa yi solota a kiya su nja anbelemu keripi;

Yaa wokye su buruburu kankye tuni kesa,>

Yiride Ni keleba dege anya ni Adaa na. 28 Nka yiride Ni yi ku anya ni Adaa na, Na beyi yiko. Na kwa beyi kemu nsape. 29 <<Nkayomu nde ki man kuni, se, ki zi mbode Aworo yaa gye ntani shoshi.>>>