1 Se Meleku ba ni gwala de ma kankye angwe gonta, se su gye ni nkye, <<Te de ki gonta laki Mirikisi nja anya beyi sedeka, se ki kwa kiriga ntani de meyi bowuta a siki laki Mirikisi. 2 Sede kede ki gonta pili woze ni gizi Mirikisi ba, sobon su la yi ba worede shina Mirikisi ba, sua tataka yi a kisi Geri Nsuseki ari ni shekera wuku ni wonta shida. 3 Na saka sheeda na bi ni keikei sasa, se sua beyi manki Mirikisi ari kwanki dupu daa ni deri bi ni sitin.>>

4 Sheeda bi mu osu na su ma ntasi zetu bi nja gwala keyi pitila bi de su sakisi a geba Obagizi ni durinya. 5 Nde nsude yaa bila de bebetasu, wuta yaa butu dege baki su yaa kisa nsu oboki geba su; du nseda de yaa bila bebeta su yaa muntu. 6 Sheeda worosu mu su mani yiko de sua tele bisi de kede riki e zo ba a kwanki de su ma beyi manki beta Mirikisi. Su kwa ma yiko a kiya ndan miya, de su juyi su ma zini; su kwa mani yiko de su sa durinya ni kowoni yiri mungu mbo guru kwanki yiride sua bila.

7 De su gama beyi manki, nama bikiya de butu dege siki romu nsu nyisa mu yaa yi topula nja su. Yaa si nasara a kiya su yaa kisa su. 8 Sua bila ganga nki nsu sheeda mu a kiya turiki ni totolo geri de su gidiri Obagizi su. Totolo geri de maana yi ma geri ni Sodom, ko Masa. 9 Ntani dege guru kesa, nja yare, nja arishiya mbombom, sua sa ganga nkisu ndani ari kwana wuku ni rebi sua kwa nana de kede su bishina su. 10 Guru ntani durinya sua yi peri siki sobon muntu ni anebi bi mu. Sua yi buki su ma saka kyawuta te nja nkya su, sobon anebi bi mu su sa ntani durinya a siki waala. 11 A beyi kwana wuku ni rebi mu se amusi ni leyi butu dege anya Mirikisi zo yuru ANKI su, se su dege a bisi; guru worede geni su su yi womba soseyi. 12 Se anebi bi mu zi murinya daa nsori dege bisi nkye, <<Ku zo anya mu!>> Ayan su nunwa te a bisi a siki gidagida, nsu oboki geba su ma kone su.

13 Dandani su yi totolo zizika kesa; kunji da a siki gom ni geri juru, ntani dupu bokwe na su muntu. Ririgye ntani zi womba se su yobo girima Mirikisi ni bisi.

14 Wuya ni bi bise, sede mbo nsu beyi womba de biya ni bi yaa zo ndede ba!

15 Se meleku ni bokwe wula koho yi, se su zi totolo murinya dege bisi, nkye, <<Sori ni solota durinya e mani Obagizi mu nja Kiristi yi la, yaa yi solota ari gbogbo gbogbo!>> 16 Se salaki ashirin ni wuru de zunwa a kiya kingbolo solota a geba Mirikisi su dure kone kisi sua bowuta Mirikisi. 17 Sua nkye:

Obagizi Mirikisi nsu Girima, nsude e ma kuzukam e kwa ma jiya!

Mu gbede ke de ki la girima sori ke

ki sigeba ni solota!

18 Worede shina Mirikisi ba su sika ni anwashi,

sobon kuzukam na ma kwanki anwashi ke yaa zo,

kwanki de sua yi worede su muntu shiriya.

Kwanki zo de ka ba nsu bunwa ke, anebi nani wuta asu,

nja guru ntani ke, worede su ba ke girima,

toree nja yaya dende yiri daa.

Kwanki zo de sua alaka worede su alaka durinya!>> 19 Laki Mirikisi a bisi bure. Se su geni akpati seda a siki yi. Se su geni asikye Genbeki Genbeki, nja kala nja akpala, nja zizika kesa, se totolo akusuka wula, ni kankara.