1 Se Ni geni takada Mirikisi a nani dama ni nsude zunwa a kingbolo solota; e mani rubuta a guru keteri yi nja su kule yi ni kwaro bokwe. 2 Se Ni geni totolo meleku ni Mirikisi de yaa yi doka ni murinya nsu sori nkye, <<Waa deta de yaa bure kwaro de kule takada Mirikisi mu?>> 3 Sede ba nse daa a siki bisi ko kisi ko sikisiki kisi de yaa yi yaa bure takada Mirikisi ko e kone siki yi ba. 4 Ni yi kuka soseyi sobon ba nsude deta de yaa bure takada Mirikisi ko e kone siki yi ba. 5 Se daa a siki salaki gyeni nkye, <<Kede ni yi kuka ba. Kone! Zaki ni ntani Yawuza, de butu a juriya ni Dowuda, e yi nasara, E shina mani yiko de yaa bure kwaro bokwe de su kule takada Mirikisi.>> 6 Se Ni geni Yaa Timshiya Mirikisi sakisi a sisika kingbolo solota, daba wuru nja toree sakisi gyewe yi. Yaa timshiya ni Mirikisi ma kankye su yanka yi. E mani koho bokwe nja ndani bokwe, de e shina ma aworo Mirikisi bokwe de e saka su zo anya guru a durinya. 7 Se Yaa Timshiya Mirikisi te la takada a nani dama ni nsude zunwa a kingbolo solota. 8 De e la takada, mbo nsu leyi wuru de Mirikisi yi nja salaki ashirin ni wuru su puari a geba Yaa Timshiya Mirikisi. Kowon nse a siki asu keyi molo nja gongo ni zinari sika ni tularee nsu kemeshi, de ma lepa ni ntani nsuseki ni Mirikisi. 9 Su yi sabuwa wonka nkye:

<<Eke na ki deta la takada mu

nja de ki bure kwaro,

sobon su kisa ke, nja te anya sedeka zini de ki muntu ki keyi ntani zo anya Mirikisi

dege kowon yare nja kowon arishiya nja kowon ntani nja kowon kesa.

10 Ki sa su ma nsu solota ni pirisi nsu ANKI bowuta Mirikisi mu,

Sua yi solota a kiya ntani durinya.>> 11 De Ni kwa kone, se Ni zi murinya meleku Mirikisi nyowa, osu dubu nja miliyo! Su sakisi gyewe kingbolo solota, nja daba wuru de Mirikisi yi, nja toree, 12 sua yi wonka ni murinya nsori:

<<Timshiya de su kisa yi e deta

de keleba sori, mbo nani, simi, nja sori,

girima, dereja, nja yobo!>>

13 Se Ni kwa zi guru mbode Mirikisi yi a bisi, a kisi, a siki durinya a kisi kisi, nja a siki totolo riki nja guru mbo nsu leyi sua yi wonka nkye:

<<Yobo, nja girima, nja sori, ni yiko,

te nja nsude zunwa a kingbolo solota yi,

nja Yaa Timshiya Mirikisi ni gbogbo!>>

14 Se daba wuru de Mirikisi yi nsu leyi keleba nkye, <<E ma yomu!>> Se toree puari a kisi bowuta yi.