1 Se Meleku Mirikisi ni biyari wula koho yi. Ni geni kemu daa dege bisi puari a kisi, se e beyi mukuli ni romu nsu nyisa. 2 Kem bure romu nsu nyisa ni, se ayanki butu dege siki romu anya, kankye ayanki dege totolo wuta. Ayanki de butu a siki romu ni sa nana nja akusuka yi beki kiri. 3 Se ngirinya dege siki ayanki butu zo a durinya su ba su sori ribi kankye ni kunama. 4 Su gye su nkye kede su ribi sanwa ko ntasi ko woni ntasi; sede worede su mani lomba ni Mirikisi a gan su ba. 5 Ngirinya su ba su dama ni kisa ntani woroni ba, sede su ba su waala ni wonta biyari. Zapi ni waala ni yaama kankye ribi de kunama yi nsebeki. 6 A kwanki ni wonta biyari mu ntani sua bila de su muntu, sede muntu yaa zo ba; sua so muntu, sede muntu yaa ki zo.

7 Ngirinya woroni su ma kankye doki la de su yi su shiri ni yanki. Su sa mbodaa a kiya su kankye lende zinari, pisika su e ma kankye ni nsebeki. 8 Gesa kiya su ma kankye ni mata, akuri asu ma kankye ni zaki. 9 Su ripe geba asu ni mbodaa kankye riga beki keripi, kelebeta asu ema yi mosi kankye kyekye yowa doki de su meyi gudu ta anya yanki. 10 Su mani awusiya de su meyi ribi kankye kunama, su mani sori a wusiya su de sua zi ntani suwo ari wonta biyari. 11 Su mani Seleki de meyi solota a kiya su. e shiya ma meleku Mirikisi de e ma kone romu nsu nyisa ni. su beyi sori a kiya romu nsu nyisa ni, seni yi ni yare Yawudawa e shiya ma Abadon, ni yare Helenawa e ma Apoliyo, maana yi ma <<Nsu bana.>>

12 Totolo waala ni pari bise wo; a beyi da mu jaja waala nsu bana bi su ma zo.

13 Se meleku ni shida wula koho yi, se Ni zi murinya daa yi beta te nja shi dege keteri wuru ni anya beyi sedeka zinari de sakisi a geba Mirikisi. 14 Murinya de gye meleku ni shida ni nkye, <<Ki shika meleku guda wuru de su domuna su a siki totolo riki ni Yupiretis!>> 15 Se su shika meleku wuru; sobon kwanki mu nja nana mu nja wonta mu nja shekera mu su shika su de su kisa kunji wuku ni guru ntani de ma durinya mu.

16 Anya ni se Ni geni shoja nyowa a kiya doki de su keyi miliyan deri bi. 17 A siki geni geba na Ni geni doki nja nsu nyunwa su: su mani riga keripi ja kankye wuta, riki zerigina, nja ruwa kwa yi de sua sukwa yi sulpo. Kowoni doki mani kiya kankye ni zaki, wuta butu a baki su nja ayanki nja jaa angoshi de sua sukwa yi solpo. 18 Aloba guda wuku su ma wuta, nja ayanki, nja angoshi wuta de su ma sukwa yi solpo de su ma butu a baki doki, su kisa ntani kunji daa butu a siki kunji wuku. 19 Sobon sori doki worosu mu e ma a baki su nja awusiya asu. Awusiya asu e ma kankye mesi nsu kiya, e shiya su ma zi ntani suwo nshi.

20 Ririgye ntani beki de aloba kisa su ba su juyi bila mumungu mbo de su meyi ba; su ma bowuta arizeni, nja boka ni zinari asu, ko boka ni azuripa su, ko ni keripi, ko ni dunsi, nja ni ntasi, worede su ma geni ba, su ma zi beta, ko yi tepiya ba. 21 Ntani worosu mu su bila kisa nki su ba, nja ANKI asiri de su meyi, ko bila kwana minzi ko mase de ma na su ba, ko bolowa.