1 De Yaa Timshiya Mirikisi bure kwaro ni bokwe, anya ma shuru a bisi kankye rebi ni keripi daa. 2 Ayan Ni geni meleku Mirikisi guda bokwe de su ma sakisi a geba Mirikisi, su ba su tapire bokwe.

3 Se meleku Mirikisi daa de keyi gongo zinari ni shuwuta tularee nsu kemeshi e zo sakisi a geba anya beyi sedeka. Su beyi tularee nsu kemeshi nyowa de e yada nja lepa ni guru ntani Mirikisi nja e munka yi a kiya anya beyi sedeka ni zinari de sakisi a geba kingbolo solota Mirikisi. 4 Ayanki tularee ni nja lepa ni ntani Mirikisi su dege a bisi dege nani ni meleku de sakisi a geba Mirikisi. 5 Se meleku Mirikisi ni la gongo ni suwuta tularee ni, e sika yi ni wuta dege anya beyi sedeka, e la sika nya a siki durinya. Se su zi kuruwa nsori nja kala ni akpala, nja wolikiya ni asikye nja zizika kesa.

6 Se meleku Mirikisi bokwe ni su yi shiri de su pula tapire bokwe.

7 Meleku Mirikisi ni pari pula tapire yi. Dunsi nja wuta, yada nja zini, butu yaapi a siki durinya. E suwuta Kunji daa a siki wuku ni kisi guru, nja kunji daa a siki wuku ni ntasi, nja guru sanwa nnyala.

8 Meleku Mirikisi ni bi pula tapire yi. Se mbodaa kankye totolo ogbo de ma si ni wuta butu puari a siki totolo riki. Kunji daa a siki wuku ni totolo riki juyi ma zini. 9 Kunji daa a siki wuku ni daba de mani leyi muntu kpataka. Kunji daa a siki wuku ni kwanto su bebeta a siki totolo riki.

10 Se meleku ni wuku pula tapire yi. Totolo kem, de meyi wuta kankye toti, sonka dege bisi puari a siki kunji daa ni riki nja ndani riki. 11 Seni kem ni ma <<Lasi>>. Kunji daa a siki wuku ni riki juyi ma yi lasi, ntani nyowa de su sha riki ni su muntu, sobon lasi yi.

12 De meleku Mirikisi ni wuru pula tapire yi. Se su bebeta kunji daa a siki wuku ni nana, nja kunji daa a siki ni wonta ma su bebeta, yomuna du kunji daa a siki ni kem bebeta, ari kunji daa a siki wuku ni asikye asu juyi ma dopuwa. Yomuna nana yi asikye a siki akunji daa a siki wuku ni nana ba nja wonta nja kem su beyi asikye a siki kunji daa a siki wuku ni dederi ba.

13 Se Ni kone, Ni zi ashirinwa de e ma dege sisika bisi meyi kuruwa ni totolo murinya nkye, <<Gbotu aku! Gbotu aku! Gbotuma ku oku de kuma a siki durinya a kwanki de sua pula ririgye tapire wuku mu de meleku Mirikisi wuku mu su meyi shiri de su pula!>>