Hayyoolee 5

Dibooraxxanna Baarqixxa Faaro

1 Eettene barra Dibooranna Abini’aamik belti Baaraqi konneechin butti’a hexxeexxa faaro faarsine:

2 «Sooreessuwwi Isira’eeli’i akeekemmaxxe’e,

ardi kinna ifixxe eeyyan shiqemmaxxe:

Duuchchi Woddika Gootta galateeffatte!

3 «Ha’no moyanjuwwaa laqqee!

Ha’no akeekisano caqasee!

Ani Duuchchi Woddika Gootta faarsaannen:

Isira’eelika Duuchchi Woddika Gootta Mageno saadaannen.

4 «Ee, Duuchchi Woddik Gootti

Seyiirii’n kexxete wodda,

Eedoomike boga’n mammarendette wodda

bogi linqi linqi hiyye:

Iimuwwa xeena uute:

eeti! Duumanchi giddi’n wodi’i yaa’e.

5 Duuchchi Woddike Gootta Isira’eelike Mageni edo,

Siinaxxe koobake Duuchchi Woddike Gootti edo,

koobuwwa linqi linqi hite.✝5:5 Fula. 19:18.

6 «Anaatik belti Shaamigaarina

Yaa’eelike baro’n ori duuchchi urme gate;

Siiraraxxi dadaltuwwa laayyo kuta’ni me’amma bogi giddii’ni sa’namaban:

ora me’ammakiirinna sho’ome laayyo laayyo me’inaaman.

7 Ati Diboorate;

Isira’eeli’a amate kadde kexxattoxxe’e

Isira’eeli’ni kexxeexxi hunnaammeeyye kutti hiteen.

8 Isira’eelki ardi konnechchi edo ege’nebaak

wele bogixxa fakkuwwa fi’linee wodda;

bogake’n bagedi ke’e

shoole tomme kuma Isira’eelike ardanaa’n

wolaantichanna bagedo abixe’ek mitti manjinna hedhemmabaan!

9 Qalbe Isira’eelik loliinke ajajalluwwin weltiten:

eeyante ifixxin gammade qophpho’eekinn weltiten:

Duuchchi Woddika Gootta galati geyoon!

10 «Ha’no kooreexxe golallamma harruwwa’n gulufine mammarendina’neek;

ha’no seense giisineexxe elolla gilaase’n kitindineek,

ha’no lekkati mammarendina’neekiir,

tenneera haaso’we.

11 Faarorka hafuura*5:11 yookaan moqiduwwiinka mannahiyyeme’e tikema dande’aan. laqqe!

tinninna Duuchchi Woddike Goottike qullummatixxi huje

Iikki loliink manninna Isira’eeli giddo asseemmaxxa qalli assaan.

«Ookkoneechchi uduma Duuchchi Woddike Goottik ardi

ookkone qachchibaa*5:11 yookaan olla’uwwinbaahiyyeme tikema dande’aan. adadde dirre.

12 ‹Tee Diboora! Dammaqi!

Dammaqi! Faarotanna kexxe faars!

Koo! Abini’aamike belto Baaraqi ke’i!

Booji’witetteka manna aaxxe ke’i!›

13 «Ookkoneechchi uduma gateek ardi

jalqabuwwiinba’a me’ine:

Duuchchi Woddik Goottik ardi

loliinke worbi manjishsha anibaa dage.

14 Edo Amaaleeqito he’namak Efireemik sannachchuwwi dage:

welkinna Biiniyaamii’n dage.

Makirik sooreessuwwi,

Zabiloni’n moyanjummatixxa siqqo

abixaakiir dage.

15 Yisakoorik sooreessuwwi Dibooranni welti dage:

Yisaakoorinna Baaraqi dage:

duuka isixxa wolo’otiba’a hordonfe:

Yaan kinni Roobelik mini hadi lameba qoodeme:

dagate’e yookaan waalate godoba gure.

16 Gedhebiinxe goodhe giddo maye’e ofoldette?

Gedhebo ye’atixxa fiissa caqasateetee?

Roobelike awurajuwwa’n heddo qalbetixxi qo’nisa hexxemman.

17 Gaadik mini hadi Yordaanoosi wido qubate:

Daanik mini hadi maye’e hobolo giddo hekki hiyye?

Aseerik mini hadi abbaayyatixxe qoonne’n gate:

galaani qarqara’n ofo’le.

18 Zabilonk gosa gosak ardi,

reyote’e ifi sa’isse uwwe.

19 «Megidoke wede’i bira Ta’inak

moyanjuwwi daggeexxi lole:

ookkoneechchi uduma Kenaanika moyanjuwwa lola ibe:

insa’nenna sibiljo birre boojinebaan.

20 Iima urjuwwati lolende:

yaadik Siisaaraanna lolle.

21 Qaran ege’nemeek Qisoonik galaan;

insa’ne’e gure bire;

tee! Lubbo anxe! Itti jabaat!

22 Fadhado gulufeek manni dagaa wodda

hirbi fadhadiink dindinsotishsha kade.

23 Duuchchi Woddik Goottik erganji hiyyee qici:

‹Meerozii’i badde!›

‹Ookko’o hedha’neka arda duuchcha badde!

Jajjaba mannike lolanaa’n Duuchchi Woddik Gootta gargaaratte’e

Duuchchi Woddike Goottixxe gamo kande uurinno’a dangebaan.›

24 «Qenaanichcho Hebeerixxi are Yaa’eeli,

melaalle duuchcha caala ise eebbisendowwaal;

duunkaani giddo hexxa’neexxe melaalle duuchcha irra ise eebbisendeexxe kaddowwaal.

25 Sisaara wode’e a’naa uwwi hiyye:

ise kinn ado isi’aa uute:

lumollake uunammake qoonjo’n itichcha isi’a shiqishshe.

26 Iittanni isenna mitte anganni dunkaaniika chikaala,

middixxe anganni hujalluwwiinxa faase abixxite:

Siisaaraka umo gandeexxi hashakk assite:

guunake’n chikaala gobbe waalde.

27 Lekka isexxi hunda

wabbi hiyye ibe;

Ookkonna lekka isexxe’n gonbiseme;

ookko’o ibemaba reye.

28 «Siisaaraxxi ama masikootetenaa’n uuddaamman:

ceeqqise qo’akenaa’n uudde,

‹Belti ankixxi gaare maye’e turte?

Gaaruwwatike googeessik hirbi maye’e hekki hiyye?› Hite laqqe.

29 Beekkumik ege’nendeexxi isexxi melalle hiisichcho uute:

isenna ifi’aan hiissichcho alfexxe.

30 ‹Boojinemmalcho qoodemate’n he’neba?

Mitte yookaan lame danchalluwa mitte mittenge labbali’a;

Siisaara’a gargaritti hexxeexxe bifan,

danchondeexxa booji’endeexxa seemma

Ani’anna goobiinxa lame dachcha’in

mirqendeexxa borritte seemma?› Hite.

31 «Ee, Duuchchi Woddike Goottaa!

Naapha atika duuchcha konnee qicinn balleessi:

jaaluwwi atik kinn soodimariinxe arishshoshsha wa’a hiyyowwaal.»

Ookkoneechchi uduma bogi shoole tomme wogga’a nage’a alfe.