Salmos 19

GALA ná-kulakɛlɛma felegɔiti

1 Guye loo ɠundiɠii nɔnɔi ʋe. Davide ná-guyei.

2 Geeɠɔlɔgiti kpein ta GALA ná-lɛbiyai lɛɛzu,

somideɠaiti ti geezuʋɛ, naati ta zeei ná-botii lɛɛzu.

3 Folo ɠilagi ɠa zɔɔma voloi ɠalasu ga naa,

kpidi ɠilagi faaɠwɛgi ve zɔɔma ɓidii ya ga naa.

4 Naa la ɠɛɛzu ga wooiti ɓaa kpɔɛzuɠulaiti,

nii nu a zoo mɛnisu.

5 Kɛlɛ ti-ma wooi ɠa laazeelizu eteai zu ná pɛ.

Ti-wooi ɗa zeeli zou ɓela ga.

GALA ge foloi ná-seɠe ɠotai ɓɛtɛʋɛ geeɠɔlɔgi zu.

6 Kɛɛʋɛ eɠɛ anzazini niinɛi, nii é ɠulazu daa ʋɛlɛi wu,

eɠɛ pilɛ sɔlɔɔ nui, é liizu luɠɔ, koozunɛai ga é kpizɛi lɔɔzei!

7 Toɠa ɠulazu geeɠɔlɔgi ɠwɛgi,

é ná-kpizɛi ɠaaɓela zɔɔla ʋelei,

ani nɔpɛ ge la lɔɔɠua ná-diegi ʋa.

8 Ɠɔoɠɔ GALAGI ná-tɔgi laazeeliʋɛ,

toɠa ɗa nu yii niinɛ.

Ɠɔoɠɔ GALAGI ná-zeele wooi ɠa ga gaamai,

toɠa ɗa ɠimalai ve ɠimalala nui ʋɛ.