1 Guye loo ɠundiɠii nɔnɔi ʋe. Davide ná-kidafaawui. 2 Siɛgi zu Edɔme nui Dowɛge liini la, é ɠɛ Sayile ma, Davide liiʋɛ Ayimelɛke ná-pɛlɛi wu.

3 Ɗɛi è zuɓaai, leeni vaa zu è wasosu ɗa-zuɲɔi zu?

Wɛlɛ, GALA ná-wooɠɛɠiladai ɠa ɠulazu kɛlɛma folo-o-folo.

4 Yaavai nɔ ɠa è-nɛgi kpɛtɛzu, kpeka ɠaaligi,

ɗa ga yaava nui!

5 Faa ɲɔi nɛɛʋɛ è ʋɛ, é leʋe faa ʋagɔi ʋa,

zɛɛ vai nɛ è ʋɛ, é leʋe sɔle kpɔɛi ʋa.

Lo!

6 Nu ɠoloɠolo gooiti nɛɛʋɛ è ʋɛ,

è-nɛgi yaavaʋɛ!

7 Naa ɠa é ba, GALA ka è lokasu eyɛsu ɠɔ.

Toɠa è zosu ɗa-zeɠe ɠotai wu, é è lɔɔɠula,

é è-ma zapei lɔɔɠula fulu nuiti ta-yooi ɠa.

Lo!

8 Telebo nuiti ta naa ɠa, dualuagi ti zo,

ti ɲɛɛɠula è zu, ti ɠɛ ma:

9 «Wɛlɛ zunui ʋa, nii é la ɠɛni GALA kɛɛni ga makɛ nui,

kɛlɛ é ɓɔɠɔ ɠalivaani ná-naavolo wolai ma,

é ɗa ɓaa ɓɔɠɔ maazu ga ná-keleɠele ɲɔi!»

10 Nɔ̀un nà, nà GALA ná-pɛlɛi wu eɠɛ wolive wului ma wundui,

gè ɓɔɠɔ ɠalivaaʋɛ GALA ná-wooɠɛɠiladai ma eyɛsu ɠɔ.

11 Nà è maamusɛ eyɛsu ɠɔ, è-ɠɛɛ vai ʋɔ, nii è kɛai.

Nà ɠitosu è-laaseigi ʋa, tɔɔzei è ʋagɛ ɗa-wooɠɛɠila nuiti bɛ.