Iyoobe Maxaafa 35

1 Eelihuy ba haasaya gujjidi hizgides;

2 «Iyoobe ne nena,

‹Tani Xoossa sinththan Xillo›

gizayssi likkee?

3 ‹Nagara ooththontta aggiko

ta ay go7ettanee?

qasseka ay demmanee?› gaada

neni oychchadasa.

4 Tani neessinne nenara dizaytas

zaaro immana.

5 «Dhoqqu gaada pude salo xeella;

neeppe dhoqqu giidi diza

shaara akeeka.

6 Neni nagara ooththiko

Xoossa aazan qohay?

Neni iza darsa darsa qohikko

iza ay ooththanawu dandayay?

7 Neni xillo gidikko izas ay immanee?

Izi neeppe aykkoka koyenna.

8 Ne nagara ooththiko qohanay

ne mala asata xalla.

Ne lo7o miish ooththikoka

ne go7izay as xalla.✝35:6-8 Iyo 22:2-3

9 «Asi haray darssi

qohishin waassees;

baappe wolqqatizaade kusheppe

bana ashshi ekkanaades

magannees.

10 Gido attiin isttafe oonikka,

‹Tana medhdhida

Xoossay awanee?

Leela giddoth

mazamure immizayssi awanee?

11 Mehetappe nuna aaththi

tamaarsida;

salo kafotappeka

aadho eranchchata

ooththiday iza› giday baawa.

12 Istti waasseettes;

izi gidikko istti otoranchchatanne

iitata gidida gishshas

isttas zaaro immenna.

13 Xoossi tuma wozinappe gidontta

waaso siyenna;

Ubbaa Dandayza Xoossay

hessa mala ezgenna.

14 Iyoobee! Neni ta Xoossa aykkoka

be7ikke giikkoka,

ne metoy iza sinththan

de7iza gishshas,

neni dandayan

naagana koshshees.

15 Qasseka Xoossi nena

ba hanqon hanqontta

asa iitateththa co7u giidi

aadhdhana nees misatizee?

16 Iyoobee! Neni coo mela

haasaya darsaasa;

erateththi baynda

coo gaada haasayaasa.»