MALUKO 5

Yesû wa muhandya muntû wêno minyaga gibê

1 Yesû no baana ba bûganga bage, baikile kûbwala bûnge bwa siba lya Galilaya, mumwalo gwa Bagelasi.*5.1 gerase 2 Kyaba Yesû kyetukile mubwato, muntû gûmo ûbele no minyaga gibê. Uimine kûbilêbû usile mbelê gyage. 3 Gûlya muntû wêkene kûbilêbû, no hakûbele muntû ûnyongwene kûmukwêka midjololo. 4 Mako gangê ûbele no byuma kûmagûlû no midjololo kû maboko, mone utimwine byuma no midjololo gyonse. Kubulile muntû ûbele no bûkome bwa kumunyonghona. 5 Kyaba kyonse bûsigi no djûba, ûbele walelemba lelemba mubilêbû no kûngûlû, mukûbûlûla no kwêkoma koma gee mwine no mabwe.

6 Lwamumwene Yesû kûlampee, ûgêle lûbêlo no kumukutamina mbelê gyage, 7 no kwangûla djuê likata no kwêsamba: "Yesû Mwana wa Kabesha Mpûngû wimwigûlû! Kwê kibalo kêê abûkata bobe gwe no nene? Nankwêsasa musina lya Kabesha Mpûngû, noka nyembia!" 8 Kwakûba Yesû umulombwele: "Munyaga gûbê, muime muntû gûdjo!"

9 Nfulo, Yesû umubulishe: "Sina lyobe wini?"

Noge umuêndwêle: "Sina lyane kibûngo kya Basilêkale,*5.9 Legioni kibalo twê bangê!" 10 Munyaga gûbê gûmwisasile Yesû kwana, nekegikumbi gilya minyaga gibê andje gya mwalo gûlya.

11 No kûko kûlûgûlû kûbele kibûngo kikata, kya ngûlûbê mukûlya. 12 Nfulo, minyaga gibê gimwisasile Yesû gisambile: "Wêtûtakêshe mungûlûbe gilya, tûtwele mo." 13 Yesû wigitakêshe, gilya minyaga gibê giimine munda gya muntû gûlya no gitwelile mu ngûlûbe. Mulongo gûkata gwa ngûlûbe giikile elufu libêlê gitukile lûbelo kuima kûlûgûlû no kûtwela mwisiba nogyo gitobele mumadjê.

14 Baleli bagilya ngûlûbe batinine lûbêlo kuila musahû mukalya no tubibûndê, no bantû basile kûmona bilya bilongekile. 15 Kyaba bantû abamugêlêle Yesû, bamwene gûlya muntû ûbele no minyaga gibe. Mwikane ansê, ûshête bishandê no ngheni gyage gigwane; nobo batudjukile. 16 No balya bamwene biitikile bebalombwele baange bilya bilongikile kûgûlya muntû ûbele no minyaga gibe, no kugilya ngûlûbe.

17 Babambile kumwisasa Yesû asemuke mu mwalo gwabo.

18 Kyaba Yesû abele wabanda mu bwato, gûlya muntû ûbele no minyaga umwisasile, agye amo nage.

19 Yesû umubengelele, mone umulombwele kwana: "Gyata kû nsese gyobe, no kumusoo gobe, wêbalombole bikata byene kûlongela Kolo, no mwakûmwenene lûsa."

20 Gûdjo muntû ûgêle lwege, ûbele wagya watûmbya mumwalo gwa bibûndê kumi.*5.20 Dekapoli Byonse Yesû byemulongêle, no bantû bonse bamutegelele begalagenie biiko.