Marcos 9

17 Muntû gûmo mukibûngo umuêndwêle: "Mulangi, namusisha mwanane kolê, wakûdjembibwa no minyaga gibê no gyakumusibêla kwêsamba. 18 No kyaba kyonse gilya minyaga gya kumutubigania no kumuta ansê, noge wakuimwa no fuluu, nokwêhela meno, no kuumibwa. Nibalombile baana babûganga bobe bamuimie gilya minyaga gibê mone habanyonghwene."

19 Yesû wêbalombwele: "Benywe bantû balûbyalo lusi no lwêtabêsho! Kuikêla kyaba kêê kyandê kaba nenyu? Kuikêla kyaba kêê kyandê kemilêndêla? Mumusishe gûdjo nsongwa lûme ano andê!" 20 Nobo bamwilile gûlya mwana kwê Yesû.

No lwendo lûmo, gûlya mwana lwamumwene Yesû, gilya minyanga gibê gimudjugumbishe gûlya nsongwa lûme gumutele ansê, no mwana ûbambile kwêgalamuna galamuna, no kuimimwa no fuluu. 21 Yesû umubulishe shage wa mwana, "Emulû! Bino bimubambile kyaba kêê? Shage umuêndwêle.

"Ubambile kûlongeka nansino kûbambêla bwanike bwage." 22 "No makwe gangê minyaga gya kumugwêsha mukaya no mumadjê, kibalo gimutobeshe. Ntêê wêbûnyonghona kûlonga kintû, wêtûkyêle lûsa no kwêtûkwasha!"

23 Yesû umuêndwêle walisamba kêê, "Kuana wêbûnyonghona! Byonse byanyonghokela kwa gûlya wakwêtabêsha."

24 Lwendo lûmo, shage no gûlya nsongwa lûme ûtele kahundû wêsambile: "Nangitabêsha, mone lwêtabêsho lwane alûgwane, nkwashe kwakûbûla kwêtabêsha kwane!"

25 Noge Yesû lwamwene kûba kibûngo kyabûngakana bûkêlê, wêgikankêle minyaga gibêê. Wenine: "Ginywee minyaga gya bûmeme no gyampokoto, nene namitakêsha mumuime gûdjo nsongwa lûme namukamutweli byonka!"

26 Gilya minyaga gibûlwêle, no gimudjugumbishe gûndjo musongwa lûme byonka, no gimwimine. Gûdjo nsogwalûme umonekile nagwe mukye, no bange besambile: "Wakya!" 27 Mone Yesû umukwatile kûkûboko umwimikile, noge wêmene.