Lucas 24

Yesʉ ʉkʉigeela antʉ abɨɨlɨ mʉ nzɨla a kʉ Emau

13 Lʉhikʉ lʉlo lʉʉlo antʉ abɨɨlɨ mʉitʉmɨ ang’wa Yesʉ akatula alongoe kʉ kɨsalɨ kɨng’wɨ nɨkʉniino kitangwa Emau, ʉkʉli wakwe anga kilomita ikʉmi na ɨng’wɨ kʉpumɨɨla kʉ Yelusalemu. 14 Akazitambʉlya makani ɨhi naɨ apumɨe. 15 Naɨ akitambʉɨla nʉkigombasɨɨlya nkani nianso, Yesʉ akigela akakʉɨlania nɨenso. 16 Akamʉona kʉmiho ao, nɨitɨga shanga akahuma kʉmʉmanya kɨna ng’wenso. 17 Yesʉ akaakolya, "Makani kɨɨ aya nɨmʉkitambʉɨla kʉnʉ mʉkʉgenda?" Antʉ awa akimɨka akakɨlaga ihɨtwɨ, akahininaala kʉʉkia. 18 Mʉntʉ ʉng’wɨ, linalakwe Kileopa, akamʉsʉkɨɨlya, "Itɨɨ, ʉewe wing’wene nʉimʉzɨɨla mʉnʉ mu Yelusalemu nɨshanga umalingɨle ɨmakani napumɨe mahikʉ yaya mʉnʉ mu Yelusalemu?"

19 Yesʉ akaakolya, "Makani kɨɨ nanso?"

Antʉ awa akamʉsʉkɨɨlya, "Makani naza amuhangɨle ʉ Yesʉ nʉa kʉ Nazaleti. Ingɨ aza mʉmanga wang’wi Itunda aza ʉkete ʉhumi ʉkʉlʉ nʉakitʉma makʉlʉ nʉkʉmanyisa pantongeela ang’wi Itunda nintongeela aantʉ ɨhi. 20 Akulu ipolyo niatemi itu akalamula kumaja nʉ kʉmʉbulaga. 21 Ʉsese ingɨ aza kusumbɨɨye kɨna nʉanso yuyo ʉkʉaponya Aisilaeli. Kukɨla nanso ɨhi, lelo akɨla mahikʉ ataatʉ ɨmakani naya napumiɨlɨla. 22 Nihangɨ, asʉngʉ nɨang’wi akʉtinʉla. Dau maniambwa ɨlelo azaendile kʉkɨbɨɨla, 23 shanga auona umʉimba wakwe. Atʉlya alʉnga kɨna apumiwe nia Malaɨka aatambʉɨla kɨna Yesʉ wainaa mʉpanga. 24 Ang’wi itu azaendile kʉkɨbɨɨla ende iloeela makani ayo iasʉngʉ niamatambue, nʉanso ingɨ shanga amʉona."

25 Sʉnga ʉ Yesʉ akaatambʉɨla, "Ʉnyenye mɨapʉngʉ itɨ ni nkolo yanyu ingɨ nkakʉ kʉnsoko shanga mʉhʉɨɨe aya ɨhi naɨatambʉwe nɨamanga ang’wi Itunda? 26 Itɨɨ, ʉ Kilisito shanga aza ʉtakɨwene kagigwa, nɨitɨ wingɨle mʉʉkulu akwe?" 27 Yesʉ akaalɨngasa ʉandɨkwa wɨhɨ nʉa Nkani Nza nʉʉtambʉe ɨmakani akwe, kandɨɨlya ʉ Musa nianyakidagu ɨhi.

28 Naɨ akihumbeela ɨkɨsalɨ iko naɨ alongoe, Yesʉ akitendisa kɨna ʉkʉ kɨlɨnkania nʉ mʉhɨnzo, 29 ingɨ nɨanso akamʉpepeelya azelʉnga, "Saga palʉng’wɨ nʉsese, kusoko wainiila, nʉʉtikʉ wapikaa." Ʉʉgwa akingɨla mʉkɨsalɨ akikiɨ palʉng’wɨ nɨenso. 30 Naɨ wikiɨ kʉlya indya palʉng’wɨ nɨenso, akaʉhola umukate, akamʉlʉmba Itunda, akauega, akainkɨɨlya. 31 Itungo lɨlo lɨɨlo miho ao akapɨtya, akamʉlinga, nʉanso ingɨ akalimansɨɨla pakatɨ ao. 32 Ʉʉgwa akatʉlitambʉɨla, "Itɨɨ, inkolo yitu shanga aza yɨkʉpɨta kʉʉlowa apo naza ʉkʉʉlɨngasa Ʉandɨkwa nʉa Nkani Nza naza kʉkolɨ mʉnzɨla?"

33 Itungo lɨlo lɨɨlo akahega, akatʉlya kʉ Yelusalemu. Kʉng’wanso akaahanga ɨitʉmɨ awo ni ikʉmi na ʉng’wɨ nawo ɨhi naɨ ɨpalʉng’wɨ nɨenso 34 akalʉnga, "Kʉlʉ kʉʉlʉ Isekʉlʉ wiʉka, ʉmigee ʉ Simoni."

35 Sʉnga, ahʉɨɨlɨ nɨabɨɨlɨ akaapikilya nkani yɨhi naɨ aiine mʉnzɨla, niitɨ naɨ amʉlingɨle naɨ ʉkʉʉega ʉmʉkate.