Mateus 26

Masɨgo akʉmʉbʉlaga ʉ Yesʉ

1 Yesʉ naɨwakondya kʉtambʉla nkani yɨhi, wɨkaaɨla amanyisigwa akwe, 2 "Mʉlɨngile kɨna asiga mahikʉ abɨɨlɨ itule iloeelye nɨla pasaka, Ng’waa Mʉntʉ nʉyo ʉkʉkononteelwa mʉ mʉsalaba."

3 Itungo nɨlanso Apolyi nɨakʉlʉ nɨatongeeli aayahudi ɨkaɨka ianza mizʉmba lang’wa Kayapwa, mʉpolya nʉ mʉkʉlʉ. 4 Ɨkisɨja akʉmʉamba ʉli ʉ Yesʉ kisuɨ amʉbʉlage. 5 Ingɨ ɨkigombasɨɨlya ɨkani ɨlɨ lɨleke kitung’wa mʉ mahikʉ iloeelya nɨla pasaka, antʉ aleke kʉleta minyomo.

Yesʉ ʉkʉdubunkɨligwa makʉta kʉ Betanɨa

6 Yesʉ naʉmolɨ kʉ Betania, mʉnyʉmba ang’wa Simoni, naɨ mʉnyambili, 7 mʉsʉngʉ ʉng’wɨ nsʉpa a nɨnonigwe nigwe nɨlitangwa alabasita ɨkete makʉta aɨgʉlwɨ nʉwa mpɨa yɨdʉ, wɨkamʉdumbʉnkɨlya imakʉta nanso mitwe. 8 Amanyisigwa akwe naɨaona iti ɨkataka, ɨkalʉnga, "Ʉpʉngʉ wantʉni ʉwʉ? 9 Makʉta aya azahʉmile kʉgʉligwa mpia yidʉ, apegwe ahimbɨ impɨa niyanso."

10 Yesʉ wɨkalinga mʉakʉsɨga, wɨkaaɨla, "Niki mʉkʉmʉnyoma ʉmʉsʉngʉ ʉyʉ? Nʉanso wɨtʉmile ɨkani niziza. 11 Ahimbɨ ɨzamine mahikʉ ɨhi, ilagwa ʉnene shangakikiɨ nʉnyenye mahikʉ nɨhi. 12 Mʉsʉngʉ ʉyʉ ʉndʉbʉnkɨɨye ɨmakʉta ʉkʉnoneelya mʉɨlɨ wane kʉnsoko kʉikwa kʉng’waane. 13 Kʉmʉtambʉila taɨ, ga yɨhi mʉʉnkʉmbigʉlʉ Nkani Nziza ikʉtanantigwa, iti nʉtendile ʉmʉsʉngʉ ʉyʉ ikʉtambʉlwa kʉmʉkimbʉka ng’wenso."

Yʉda wɨkagomba kʉmʉsuɨpa ʉ Yesʉ

14 Sʉnga, Yʉda Isikaliote ʉng’wɨao mʉamanyisigwa awo nikʉmi naabɨɨlɨ, wɨkalongola kʉapolya nɨakʉlʉ, 15 wɨkaaɨla, "Mʉkʉmpa ntʉni anga nʉmʉletele ʉ Yesʉ?" Ɨkamʉpa makʉmi ataatʉ a mpia. 16 kʉpuma itʉngo lɨlo ʉ Yʉda wɨkatʉladumɨɨla lyoma nɨlakʉaletela ʉ Yesʉ.

Yesʉ ʉkʉlya ndya yiloeelya nɨla pasaka nɨ amanyisigwa akwe

17 Lʉhikʉ nʉla ng’wandyo nʉliloeelya nɨla mɨkate nɨshanga ɨgahɨigwe, amanyisigwa akwe ɨkamʉhanga ʉ Yesʉ ɨkamʉkolya, "Ʉloilwe kʉkʉnonelelye pɨ indya niyiloeelya nɨla pasaka?"

18 Yesʉ wɨkaasʉkɨɨlya, "Longoli kʉkɨsalɨ kʉmʉntʉ ʉng’wɨ, mʉmʉile: ‘Mʉmanyisi ʉlʉngile, itʉngo lane lapika; nɨkʉlɨla ɨpasaka palʉng’wɨ nɨamanyisigwa ane kʉng’wako.’"

19 Amanyisigwa ɨkatenda ʉʉ anaga ʉ Yesʉ naʉalagiiye, ɨkanoneelya indya niyiloeelya nɨla pasaka.

20 Naɨyatula mpindi, Yesʉ palʉng’wɨ nɨamanyisigwa akwe ikumi abɨɨlɨ ɨkikiɨ ahume kʉlya indya. 21 Naɨakʉlya, Yesʉ wɨkalʉnga, "Kʉmʉtambila taɨ, ʉng’wɨanyʉ ʉkʉmpɨlʉka.

22 Amanyisigwa akwe ɨkaalɨka mʉnkolo, ɨkatulakolya, ʉng’wɨ ʉng’wɨ, "Isekʉlʉ! Itɨ, nenene?"

23 Yesʉ wɨkaasʉkɨɨlya, "Ʉyʉ nʉkʉlɨɨlya ɨntonge mibakuli palʉng’wɨ nʉnene, yʉyo ʉkʉnsuɨpa. 24 Ɨtai, Ng’waa Mʉntʉ ʉkʉsha anga ʉandɨkwa wang’wi Itunda nʉʉandikilwe, ingɨ ʉkɨa wakwe mʉntʉ ʉyʉ nʉkʉmʉsuɨpa ʉ Ng’waa Mʉntʉ! Aibahʉ mʉntʉ nʉanso aɨwaleke kʉtʉgwa."

25 Yʉda ʉyʉ nʉmʉsuɨpi, wɨkamʉkolya, "Mʉmanyisi, itɨ nenene?" Yesʉ wɨkamʉsʉkɨɨlya, "Ʉlʉngʉle wewe."

Lʉdya nʉliloeelya lang’wɨ Isekʉlʉ

26 Naɨakʉlya, Yesʉ wɨkahola mʉkate, wɨkamʉsongelya Itunda, wɨkaega, wɨkaapa ɨamanyisigwa akwe wɨkaaɨla, "Holi mʉlye; ʉwʉ wʉwʉ mʉɨlɨ wane."

27 Sʉnga wɨkahola kikombe nɨka dibai, wɨkamʉsongelya Itunda, wɨkaapa amanyisigwa akwe, wɨkalʉnga, "Ng’weli mɨhi ɨkɨkombe ɨkɨ; 28 kʉnsoko ɨyɨ ingɨ sakami ane nɨkʉkamɨnkɨɨlya kɨna ilago ingɨ tai, sakami nɨkʉhʉnʉka kʉnsoko aantʉ ɨdʉ ahume kʉhegeligwa mɨlandʉ.