g kurinṯus
1 beƹdin yeffeγ buwlus seg ṯiyna ireḥ al kurinṯus. 2 aḏ yufa dinet uḏay ismis akiyla seg bunṭus, lliy seddiγ yused seg iyṭalya netta aḏ lehlis briskilla afelxaḍert lqeyṣer kuludiyus izeƹzeq wuḏeyen seg ruwma. yaxy ireḥḥesen buwlus. 3 aḏ afelxaḍert yusi am nihnin iṣenneƹ g lƹecceṯ, yeqqim γarsen ixeddem yiḏesen. 4 aḏ yusi kul sebbeṯ yetkacḥ lliy ḥderren g lmejmeƹ bac aḏemnen wuḏeyen aḏ iyuwnaniyen.
5 mniyn uṣelnas siyla aḏ timuṯawus seg meqduniya, yeqqim buwlus yetbeccer akehaw aḏ yeseḵan y wuḏeyen lliy yesuwƹ d netta d lmesiyḥ. 6 lekenti bbedenas. aḏ uḏellen tsubbun. yaxy yezelz fellasen leḥweyjis yuwayasen: «bekkeḍuwem g teḵrumtuwem. rahiy neči xaṭini. aḏ s ṭuruh tabecreγ lliy muc d wuḏeyen.» 7 aḏ iḥwel al tzaqqa n yjen muc d uḏay yetzella y rebbiy ismis tiyṭus yustus. aḏ tusi tezeqqas tman lmejmeƹ. 8 yaxy yumen s siydneγ krisbus meqqar n lmejmeƹ netta aḏ nnasnis lkul. aḏ slen ggeṯ d midden seg kurinṯus beccer n buwlus. yaxy umennen aḏ ttuzizdin.
uflay, wisusumc
9 ijenyeḍ, yezra buwlus siydneγ g tirjelt yemmalas: «witegeḏec, uflay, wisusumc. 10 rahiy lliγ iḏeḵ. aḏ wiyetquddu ḥetta d yjen afidur afelxaḍert γari midden ggeṯ g ayuh n tmura.» 11 yaxy yeqqim buwlus g kurenṯus suggas aḏ wezgen yesseḥfaḍ g midden g dwiy n rebbiy.