1 ଆପର୍ତମ୍ମୁନ୍ ଇସ୍ୱରନ୍‌ ରୁଆଙନ୍‌ ଡ ପୁର୍ତିନ୍‌ ଗବ୍‌ଡେଲେନ୍‌ । 2 ପୁର୍ତିନ୍‌ ଆରିଙ୍‌ରିଙ୍‌ ଆରି ଆରିକ୍କା* ଡକୋଏନ୍‌ । ଆରି ଜରୁ ଡାଆଲୋଙନ୍‌ ଲୋଙଡ୍‌ ଡକୋଏନ୍‌ ଆରି ଇସ୍ୱରନ୍‌ ଆ ପୁରାଡ଼ା ଡାଆଲୋଙନ୍‌ ଞାର୍ରେ ଡକୋଲନ୍‌ । 3 ଇସ୍ୱରନ୍‌ ଗାମେନ୍‌, "ସାଆରେତୋ ।" ଇସ୍ୱରନ୍‌ ଆବର୍ରନ୍‌ ଅନ୍ତମ୍‌ ସାଆରେନ୍‌ । 4 ଆରି ଇସ୍ୱରନ୍‌ ସନାଆରନ୍‌ ଆଗ୍ରିଜେନ୍‌ ମନଙ୍‌ ଗିୟ୍‌ତାଏନ୍‌, ତିଆସନ୍‌ ଇସ୍ୱରନ୍‌ ଲୋଙଡନ୍‌ ସିଲଡ୍‌ ସନାଆରନ୍‌ ଆନ୍ନାଏନ୍‌ । 5 ଆରି ଇସ୍ୱରନ୍‌ ସନାଆରନ୍‌ ଆଞୁମ୍‌ "ଡିନାନ୍‌" ଆରି ଲୋଙଡନ୍‌ ଆଞୁମ୍‌ "ତଗଲ୍‌" ଅବ୍‌ଞୁମେନ୍‌ । ଆରି ଅରୁବେନ୍‌ କି ସାଆର୍‌ ଡାଲେ ଆପର୍ତମ୍ମୁ ଡିନାନ୍‌ ଡେଏନ୍‌ ।

6 ଇସ୍ୱରନ୍‌ ଗାମେନ୍‌, "ଡାଆନ୍‌ ବାଗୁ ପାଲ୍ଲାଙ୍‌ ଡେଏତୋ ଆରି ବାଗୁ ପାଲ୍ଲାଙ୍‌ ଆଡ୍ରେନ୍‌ ଆମଡ୍ଡି ଆରିକ୍କା ଡକୋଏତୋ ।" 7 ଇସ୍ୱରନ୍‌ ଏନ୍ନେଲେ ଆରିକାନ୍‌ ଆଗ୍ରବ୍‌ଡେଲେନ୍‌ ଆସନ୍‌ ଲାଙ୍‌ଲେଡ୍‌ ଡାଆନ୍‌ ତୋଣ୍ଡୋନ୍‌ ଡକୋଲନ୍‌ ଆରି ଜାୟ୍‌ତାନ୍‌ ଆଡାଆ ସିଲଡ୍‌ ଆନ୍ନାଲନ୍‌ ଡକୋଲନ୍‌ । 8 ଆରି ଇସ୍ୱରନ୍‌ ଆରିକାନ୍‌ ଆଞୁମ୍‌ "ରୁଆଙ୍‌" ଅବ୍‌ଞୁମେନ୍‌ । ଆରି ଅରୁବେନ୍‌ କି ସାଆର୍‌ ଡାଲେ ଆବାର୍ତାନ୍‌ ଡେଏନ୍‌ ।

9 ତି ସିଲଡ୍‌ଲ୍ଲନ୍‌ ଇସ୍ୱରନ୍‌ ଗାମେନ୍‌, "ରୁଆଙ୍‌ଲୋଙନ୍‌ ଆଜାୟ୍‌ତା* ଡକୋନ୍‌ ଆ ଡାଆଜି ଆବଜାଗ୍ଗାଲୋଙ୍‌ ଗିଙ୍‌ଲେ ଡକୋନେତୋ, ଆରି ଲବନ୍‌ ରାଙ୍‌ଡାଏତୋ" ଆରି ତିଅନ୍ତମ୍‌ ଡେଏନ୍‌ । 10 ଆରି ଇସ୍ୱରନ୍‌ ଲବନ୍‌ ଆଞୁମ୍‌ "ପୁର୍ତି" ଆରି ଗିଙ୍‌ଲେ ଆଡ୍ରକୋଲନ୍‌ ଆ ଡାଆ ଆଞୁମ୍‌ "ସମେଁୟ୍‌ଣ୍ଡ୍ରା" ଗାମ୍‌ଲେ ଅବ୍‌ଞୁମେନ୍‌ । ଆରି ଇସ୍ୱରନ୍‌ ଆଗ୍ରିଜେନ୍‌ ମନଙ୍‌ ଗିୟ୍‌ତାଏନ୍‌ । 11 ଇସ୍ୱରନ୍‌ ଗାମେନ୍‌, "ପୁର୍ତିଲୋଙନ୍‌ ଆରଜତେନ୍‌ ଡ ଆରବାୟ୍‌ତେନ୍‌ ଅଡ଼୍‌କୋନ୍‌ ଆରାନୁବ୍‌ଜି ଡ ଅଗାବନ୍‌ ଆରି ଅଆବନ୍‌ ଡୁଙ୍‌ନାୟ୍‌ତୋ" ତି ଅନ୍ତମ୍‌ ଡେଏନ୍‌ । 12 ଆବର୍ନେନ୍‌ ଅନ୍ତମ୍‌ ପୁର୍ତିଲୋଙନ୍‌ ଅଡ଼୍‌କୋନ୍‌ ଆରାନୁବ୍‌ଜି ଡ ଅଗାବନ୍‌ ଆରି ଅଆବନ୍‌ ଡୁଙ୍‌ଲନାୟ୍‌ । ତିଆତେ ଇସ୍ୱରନ୍‌ ଆଗ୍ରିଜେନ୍‌ ମନଙ୍‌ ଗିୟ୍‌ତାଏନ୍‌ । 13 ଆରି ଅରୁବେନ୍‌ କି ସାଆର୍‌ ଡାଲେ ୟାଗି ଡିନା ଡେଏନ୍‌ ।

14 ଇସ୍ୱରନ୍‌ ଗାମେନ୍‌, "ତଗଲନ୍‌ ସିଲଡ୍‌ ଡିନାନ୍‌ ଅନାନ୍ନାନ୍‌ ଆସନ୍‌ ରୁଆଙ୍‌ଲୋଙନ୍‌ ଓୟୋଙନ୍‌, ଆଙ୍ଗାଜନ୍‌, ତୁତୁଜନ୍‌ ଗଡେଲେତୋ; ଆରି ଡିନାନ୍‌ ଅନବ୍‌ସାଆରନ୍‌ ଆସନ୍‌ ଓୟୋଙନ୍‌ ଆରି ତଗଲନ୍‌ ଅନବ୍‌ସାଆରନ୍‌ ଆସନ୍‌ ଆଙ୍ଗାଜନ୍‌ ଆରି ବର୍ସେଙନ୍‌ ଡ ଆଙ୍ଗାଜନ୍‌ ଡିନାନ୍‌ ଜନନାନ୍‌ ଆସନ୍‌ ଡେଏତୋ । 15 ଆରି ପୁର୍ତିନ୍‌ ଆନବ୍‌ସାଆରନ୍‌ ଆସନ୍‌ ରୁଆଙ୍‌ଲୋଙନ୍‌ ଓୟୋଙନ୍‌, ଆଙ୍ଗାଜନ୍ ଡ ତୁତୁଜଞ୍ଜି ଡକୋନେତୋ" ଆରି ତିଅନ୍ତମ୍‌ ଡେଏନ୍‌ । 16 ଏଃନେଲେ ଆନବ୍‌ଞାନେନ୍‌ ଆସନ୍‌ ଇସ୍ୱରନ୍‌ ତମ୍ବାନ୍‌ ଅନବ୍‌ସାଆରନ୍ ଆସନ୍‌ ଓୟୋଙନ୍‌ ଡ ତଗଲନ୍‌ ଅନବ୍‌ସାଆରନ୍‌ ଆସନ୍‌ ଆଙ୍ଗାଜନ୍‌; କେନ୍‌ ବାଗୁ ସୋଡ଼ା ସାନାଆରଞ୍ଜି, ଡ ତୁତୁଜଞ୍ଜି ନିୟ୍‌ ଗବ୍‌ଡେଲେନ୍‌ । 17 ପୁର୍ତିନ୍‌ ଆନବ୍‌ସାଆରନ୍‌ ଆସନ୍‌ ଆରି ତଗଲ୍‌ ତମ୍ୱା ଆଉପ୍ରେଙନ୍‌ ତୁମ୍‌ ଡେନ୍‌, 18 ଆରି ସନାଆରନ୍‌ ସିଲଡ୍‌ ଲନୋଙଡନ୍‌ ଅନାନ୍ନାନ୍‌ ଆସନ୍‌, ଇସ୍ୱରନ୍‌ ରୁଆଙ୍‌ଲୋଙନ୍‌ ତି ଆ ସାନାଆର୍‌ଜି ଗବ୍‌ଡେଲେନ୍‌ । ଆରି ଇସ୍ୱରନ୍‌ କେନ୍‌ ଅଡ଼୍‌କୋନ୍‌ ଆଗ୍ରିଜେନ୍‌ ମନଙ୍‌ ରାଙ୍‌ଡାଏନ୍‌ । 19 ତି ସିଲଡ୍‌ଲ୍ଲନ୍‌ ଅରୁବ୍‌ଡାଲେ ଲୋଙଡେନ୍ କି ତ୍ତଗାଡେନ୍ କି ଉଞ୍ଜି ଡିନା ଡେଏନ୍‌ । 20 ତି ସିଲଡ୍‌ଲ୍ଲନ୍‌ ଇସ୍ୱରନ୍‌ ଗାମେନ୍‌, "ଏର୍ଜାଡ଼ିକାନ୍‌ ଆମେଙ୍‌ ଜନ୍ତୁଜି* ଡାଆଲୋଙନ୍‌ ବରିୟ୍‌ଡେଏତଜି, ଆରି ରୁଆଙ୍‌ଲୋଙନ୍‌ ଅନ୍ତିଡଞ୍ଜି ଏଙେଙ୍‌ଡାନେତଜି ।" 21 ଆରି ଇସ୍ୱରନ୍‌ ଡାଆଲୋଙନ୍‌ ଡକୋନ୍‌ ସୋଡ଼ା ଅୟନ୍‌, ତର୍ଡମ୍‌ ତର୍ଡମ୍‌ ଆଜାତି ଅନ୍ତମ୍‌ ଏର୍ଜାଡ଼ିକାନ୍‌ ଆ ଜନ୍ତୁଜି ଡାଆଲୋଙନ୍‌, ଡ ତର୍ଡମ୍‌ ତର୍ଡମ୍‌ ଆଜାତି ଅନ୍ତମ୍‌ ଅନ୍ତିଡଞ୍ଜି ଗବ୍‌ଡେଲେନ୍‌ । ଇସ୍ୱରନ୍‌ କେନ୍‌ ଅଡ଼୍‌କୋନ୍‌ ଆଗ୍ରିଜେନ୍‌ ମନଙ୍‌ ଗିୟ୍‌ତାଏନ୍‌ । 22 ଆରି ଇସ୍ୱରନ୍‌ ଆନିଞ୍ଜିଆଡଙ୍‌ ଆସିର୍ବାଦଲେ ବର୍ରନେ, ଗୋଗୋୟ୍‌ବେନ୍ତୋ ଆରି ସମେଁୟ୍‌ଣ୍ଡ୍ରାନ୍‌ ଆ ଡାଆଲୋଙ୍‌ ବରିୟ୍‌ ଡେବା, ଆରି ପୁର୍ତିଲୋଙନ୍‌ ଅନ୍ତିଡଞ୍ଜି ଗୋଗୋଜେତଜି । 23 ତି ସିଲଡ୍‌ଲ୍ଲନ୍‌ ଅରୁବ୍‌ଡାଲେ ଲୋଙଡେନ୍ କି ତଗାଡ୍‌ଲେ ଆରି ମନ୍‌ଲୟ୍‌ ଡିନା ଡେଏନ୍‌ । 24 ଆରି ଇସ୍ୱରନ୍‌ ଗାମେନ୍‌, "ପୁର୍ତିଲୋଙନ୍‌ ତର୍ଡମ୍‌ ତର୍ଡମ୍‌ ଆଜାତି ଅନ୍ତମ୍‌ ଜନ୍ତୁଜି, ସାଇନ୍‌ ଆଜନ୍ତୁ ଡ ଆର୍‌ଲାମ୍‌ଲାମ୍‌ତନ୍‌ ଆଜନ୍ତୁ ଡ ତର୍ଡମ୍‌ ତର୍ଡମ୍‌ ଆଜାତି ଅନ୍ତମ୍‌ ପୁର୍ତିଲୋଙନ୍‌ କିନ୍‌ରେଙ୍‌ ଜନ୍ତୁନ୍‌ ଗଡେଲେତୋ," ତି ସିଲଡ୍‌ଲ୍ଲନ୍‌ ତିଅନ୍ତମ୍‌ ଡେଏନ୍‌ । 25 ଇସ୍ୱରନ୍‌ ତର୍ଡମ୍‌ ତର୍ଡମ୍‌ ଆଜାତି ଅନ୍ତମ୍‌ କିନ୍‌ରେଙ୍‌ ଜନ୍ତୁନ୍‌ ଡ ସାଇନ୍‌ ଆଜନ୍ତୁ ଡ ଆର୍‌ଲାମ୍‌ଲାମ୍‌ତନ୍‌ ଆଜନ୍ତୁଜି ଅଡ଼୍‌କୋନ୍‌ ଗବ୍‌ଡେଲେନ୍‌; ଆରି ଇସ୍ୱର କେନ୍‌ ଅଡ଼୍‌କୋନ୍‌ ଆଗ୍ରିଜେନ୍‌ ମନଙ୍‌ ଗିୟ୍‌ତାଏନ୍‌ ।

26 ତି ସିଲଡ୍‌ଲ୍ଲନ୍‌ ଇସ୍ୱରନ୍‌ ବର୍ରନେ, ମୁକାଞେନ୍‌ ଅନ୍ତମ୍‌ ଡ ଞେନ୍‌ଡମ୍‌ ଅନ୍ତମ୍‌ ମନ୍‌ରାନ୍‌ ଗବ୍‌ଡେଲ୍‌ତାୟ୍‌ । ଆନିଞ୍ଜି ଡାଆଲୋଙନ୍‌ ଆୟଜି ଡ ରୁଆଙ୍‌ଲୋଙନ୍‌ ଆ ଅନ୍ତିଜି ଡ ଜନ୍ତୁଞ୍ଜି ଡ ସମ୍ପରା ପୁର୍ତିନ୍‌ ଡ ଲବଲୋଙନ୍‌ ଆର୍‌ଲାମ୍‌ଲାମ୍‌ତଞ୍ଜି ଆଜନ୍ତୁଜି ଆସିଲୋଙଞ୍ଜି ସୋରୋପ୍ପାୟ୍‌ଲାଜି । 27 ଆରି ଇସ୍ୱରନ୍‌ ଆ ଗୁନଡମନ୍‌ ଅନ୍ତମ୍‌ ଆନିଞ୍ଜିଆଡଙ୍‌ ମନ୍‌ରାନ୍‌ ଗଡ଼େଏନ୍‌ । ଇସ୍ୱରନ୍‌ ଆନିଞ୍ଜିଆଡଙ୍‌ ଓବ୍ବାମରନ୍‌ ଡ ଆଇମରନ୍‌ ଏମ୍ମେଲେ ଗଡ଼େଏନ୍‌, 28 ଆରି ଇସ୍ୱରନ୍‌ ଆନିଞ୍ଜିଆଡଙ୍‌ ଆସିର୍ବାଦଏଞ୍ଜି ଆରି ବରେଞ୍ଜି, "ଗୋଗୋୟ୍‌ବେନ୍ତୋ ଆରି କେଜ୍ଜାବେନ୍‌ ଗୋଗୋଜେତୋ ଆରି ପୁର୍ତିଲୋଙନ୍‌ ବରିୟ୍‌ଡେବା ଆରି ଜନ୍ତୁଞ୍ଜିଆଡଙ୍‌ ଅବ୍‌ଞାନାଆଜି । ଆରି ଡାଆଲୋଙନ୍‌ ଆୟଜି, ଅନ୍ତିଡଞ୍ଜି, ଆର୍‌ଲାମ୍‌ଲାମ୍‌ତନ୍‌ ଆ ଜନ୍ତୁଜି ଅଡ଼୍‌କୋନ୍‌ ଅସିଲୋଙ୍‌ବେନ୍‌ । 29 ଇସ୍ୱରନ୍‌ ଗାମେନ୍‌, ଗିୟ୍‌ବା, ଞେନ୍‌ ଅଡ଼୍‌କୋନ୍‌ ଆ ଅଆବ୍‌ଜି ଡ ଅଡ଼୍‌କୋନ୍‌ ଆନୁବ୍‌ ଆ ଜଅଜି ଆମ୍ୱେଞ୍ଜିଆଡଙ୍‌ ଏତିୟ୍‌ଲବେନ୍‌ । ତିଆତେ ଜନୋମ୍‌ଜୋମ୍‌ବେନ୍‌ ଆସନ୍‌ ଡେତେ; 30 ଆରି ପୁର୍ତିଲୋଙନ୍‌ ଅଡ଼୍‌କୋନ୍‌ ଆ ଜନ୍ତୁ ଡ ଆ ଅନ୍ତିଡ୍‌ ଡ ଲବଲୋଙନ୍‌ ଆଡ୍ରକୋତଞ୍ଜି ଆ ଜନ୍ତୁ, କେନ୍‌ ଅଡ଼୍‌କୋନ୍‌ ଆଜନ୍ତୁଜି ଆଜନୋମ୍‌ ଆସନ୍‌ ଞେନ୍‌ ଅଡ଼୍‌କୋନ୍‌ ଅଜିଙଞ୍ଜି ଡ ଅରାନୁବନ୍ ଏତିୟ୍‌ଲବେନ୍‌" ତି ସିଲଡ୍‌ଲ୍ଲନ୍‌ ତିଅନ୍ତମ୍‌ ଡେଏନ୍‌ । 31 ଇସ୍ୱରନ୍‌ ଆନିନ୍‌ଡମ୍‌ ଆଗ୍ରବ୍‌ଡେଲେନ୍‌ ଅଡ଼୍‌କୋନ୍‌ ଆତେ ଆଗ୍ରିଜେନ୍‌, ଅଡ଼୍‌କୋନ୍‌ ଆତେ ଗୋଗୋୟ୍‌ ମନଙ୍‌ ରାଙ୍‌ଡାଏନ୍‌ । ତି ସିଲଡ୍‌ଲ୍ଲନ୍‌ ଅରୁବ୍‌ଡାଲେ ତଗାଡେନ୍‌ କି ସାଆରେନ୍‌ ଆରି ତୁଡ୍ରୁ ଡିନା ଡେଏନ୍‌ ।