ଜୋସେପନ୍ ଆଗନୁମ୍ନ୍ତେ
1 ତି ଆଡିଡ୍ ଜାକୁବନ୍ ଆପେୟନ୍ ଆଡ୍ରକୋନେ କିଣାନ୍ ଆଡେସାଲୋଙ୍ ଡକୋଲନେ । 2 କେନ୍ଆତେ ଜାକୁବନ୍ ଆକୁତ୍ତମା ଆକନୋକ୍କୋଡ୍ । ଜୋସେପନ୍, ସତର ବର୍ସେଙ୍ ଆଡ୍ରେନ୍ ଆଡିଡ୍, ଆ ବୋଞାଙଞ୍ଜି ସରିନ୍ ତୁର୍ମେଡ୍ଲନେ; ଆନିଞ୍ଜି ଆପେୟନ୍ ଆତିକିବଜନ୍ ବିଲ୍ଆନ୍ ଡ ସିଲ୍ପାନ୍ ଆ ଡାଙ୍ଗାଡ଼ାଅଞ୍ଜି ଡକୋଏଞ୍ଜି; ଆରି, ଜୋସେପନ୍ ତି ଆବୋଞାଙ୍ଜି ଏର୍ମନଙନ୍ ଆଞନର୍ରମ୍ ଆବର୍ନେ ଆପେୟନ୍ ଆମଙ୍ବା ପାଙ୍ଲଙ୍ବରନେ । 3 ତି ଜୋସେପ ଜାକୁବନ୍ ଆବନୁଡାଇଙ୍ ଆଅନ୍ ଆସନ୍ ଇସ୍ରାଏଲନ୍ ଅଡ଼୍କୋନ୍ ଆଡାଙ୍ଗାଡ଼ାଅନ୍ ସିଲଡ୍ ଆନିନ୍ଆଡଙ୍ ଗୋଗୋୟ୍ ଲୋବଏନ୍, ଆରି ଆନିନ୍ ଆସନ୍ ଆସ୍ନେସ୍ନେନା ଆ ଅଙ୍ଗି ଅବୟ୍ ତୁବ୍ଲେ ତିୟେନ୍ । 4 ବନ୍ଡ ଅଡ଼୍କୋନ୍ ଆଡାଙ୍ଗାଡ଼ାଅନ୍ ସିଲଡ୍ ଆପେୟନ୍ ଜୋସେପନ୍ଆଡଙ୍ ଗୋଗୋୟ୍ ଆ ଡନୁଙ୍ୟମନ୍ ଗିୟ୍ଲେ ଆବୋଞାଙଞ୍ଜି ଆନିନ୍ଆଡଙ୍ ଏଡ଼ୁର୍ମଡେଞ୍ଜି ଆରି ଆନିନ୍ଆଡଙ୍ ଡନୁଙ୍ୟମନ୍ ଆବର୍ନେ ବର୍ରେ ଅରପ୍ତିଲୋଜି ।
5 ତି ସିଲଡ୍ଲ୍ଲନ୍ ଜୋସେପନ୍ ଅବୟ୍ ଗନୁମ୍ତେନ୍ ଗିୟ୍ଲେ ଆବୋଞାଙଞ୍ଜିଆଡଙ୍ ବରେନ୍; ତି ସିଲଡ୍ଲ୍ଲନ୍ ଆନିଞ୍ଜି ଆନିନ୍ଆଡଙ୍ ଆରି ଗୋଗୋୟ୍ ଏଡ଼ୁର୍ମଡେଞ୍ଜି । 6 ଜୋସେପନ୍ ଆନିଞ୍ଜିଆଡଙ୍ ବରେନ୍, "ଞେନ୍ ଅଙ୍ଗା ଆ ଗନୁମ୍ତେ ଗିୟ୍ଲାୟ୍, ତିଆତେ ଅମ୍ଡଙ୍ବା ।" 7 ଗିୟ୍ବା, ଇନ୍ଲେଞ୍ଜି ବସେଙ୍ଲୋଙନ୍ ବିଡାସର୍ଲନ୍ବୋ, ସିଲତ୍ତେ ଗିୟ୍ବା, ବିଡାସର୍ଞେନ୍ ଡୋଲନ୍ ତନଙେନ୍; ଆରି, ଗିୟ୍ବା, ବିଡାସର୍ବେନ୍ ଅଡ଼୍କୋନ୍ ବିଡାସର୍ଞେନ୍ଆଡଙ୍ ଏର୍ରେ ଗେରେଲେ ଲୋମେଞ୍ଜି । 8 ସିଲତ୍ତେ ଆବୋଞାଙଞ୍ଜି ଆନିନ୍ଆଡଙ୍ ବରେଞ୍ଜି, "ଆମନ୍ ପଙ୍ ଆଜାଡ଼ିନ୍ ରାଜାଲେନ୍ ଡେତମ୍ ? ଆମନ୍ ପଙ୍ ଆଜାଡ଼ିନ୍ ଇନ୍ଲେଞ୍ଜି ଆଉପ୍ରେଙ୍ ଅବ୍ସୋଡ଼ାଡମ୍ତନ୍ ପଙ୍ ?" ସିଲତ୍ତେ ଆନିଞ୍ଜି ଅଡ଼୍କୋନ୍ ଆଗନୁନ୍ତେ ଡ ଆବର୍ନେନ୍ ଆସନ୍ ଆନିନ୍ଆଡଙ୍ ଆରି ଗୋଗୋୟ୍ ଏଡ଼ୁର୍ମଡେଞ୍ଜି । 9 ତି ସିଲଡ୍ଲ୍ଲନ୍ ଜୋସେପନ୍ ଆରି ଅବୟ୍ ଗନୁମ୍ତେନ୍ ଗିୟ୍ଲେ ଆବୋଞାଙଞ୍ଜିଆଡଙ୍ ଅବ୍ଜନାଏଞ୍ଜି, "ଗିୟ୍ବା, ଞେନ୍ ଆରି ଅବୟ୍ ଗନୁମ୍ତେନ୍ ଗିୟ୍ଲାୟ୍, ଗିୟ୍ବା, ଓୟୋଙନ୍ ଡ ଆଙ୍ଗାଜନ୍ ଆରି ବାରଟା ତୁତୁଜନ୍ ଞେନ୍ଆଡଙ୍ ଲୋମ୍ଲିଞ୍ଞ୍ଜି ।" 10 ବନ୍ଡ ଆନିନ୍ ଆପେୟନ୍ ଡ ଆବୋଞାଙଞ୍ଜି ଆତେମଡ୍ ତିଆତେ ଆବର୍ରନ୍ ଆସନ୍, ଆପେୟନ୍ ଆନିନ୍ଆଡଙ୍ ବବ୍ତଙ୍ଲେ ବରେନ୍, "ଆମନ୍ କେନ୍ ଏଙ୍ଗାଗୋ ଆଗନୁମ୍ତେ ଗିଜେନ୍ ? ଞେନ୍ ଡ ୟୁଙ୍ନମ୍ ଆରି ବୋଞାଙ୍ନମ୍ଞ୍ଜି, ଇନ୍ଲେଞ୍ଜି ପଙ୍ ତୁଡ଼ୁମ୍ଲେ ଆମନ୍ଆଡଙ୍ ଆଲନୋମ୍ ଆସନ୍ ଏଇୟ୍ଲାୟ୍ ?" 11 ସିଲତ୍ତେ ଆବୋଞାଙଞ୍ଜି ଆନିନ୍ଆଡଙ୍ ଇସ୍କତ୍ତାଏଞ୍ଜି, ବନ୍ଡ ଆପ୍ପେୟନ୍ ତି ଆବର୍ନେ ମନ୍ନେଲେ ଡକ୍କୋଏନ୍ ।
ଜୋସେପନ୍ ଆତନମ୍ ଡ ମିସର୍ ଆଜନିର୍
12 ସିଲତ୍ତେ ଆବୋଞାଙଞ୍ଜି ଆପେୟଞ୍ଜି ଆମଣ୍ତାମେଡ୍ ଆତନୁର୍ ଆସନ୍ ସିକିମନ୍ ଜିରେନ୍, 13 ଇସ୍ରାଏଲନ୍37:13 ଜାକୁବନ୍ ଜୋସେପନ୍ଆଡଙ୍ ବରେନ୍, "ଆମନ୍ ସିକିମ୍ ଡେସାନ୍ ଇୟା, ତେତ୍ତେ ବୋଞାଙ୍ନମ୍ଞ୍ଜି ଗୋସ୍ସାମେନନ୍ ତୁର୍ତଜି । ଜୋସେପନ୍ ଆପ୍ପେୟନ୍ଆଡଙ୍ ଜାଲଙେନ୍, ଞେନ୍ ଅନିୟନ୍ ଆସନ୍ ଆବ୍ଜାନେଏନ୍ ।" 14 ତିଆଡିଡ୍ ଇସ୍ରାଏଲନ୍ ଆନିନ୍ଆଡଙ୍ ବରେନ୍, "ଆମନ୍ ଇୟ୍ଲେ ବୋଞାଙ୍ନମ୍ଜି ଡ ଆବରନ୍ତବନ୍ ଆ ଜନ୍ତୁଜି ମନଙ୍ ଡକୋଜି ଅଡ଼େ ଇଜା, ତିଆତେ ଗିୟ୍ଲେ ମଙ୍ଞେନ୍ କବରନ୍ ପାଙାୟ୍ ।" 15 ତିଆଡିଡ୍ ଅବୟ୍ ମନ୍ରାନ୍ ଜୋସେପନ୍ ବସେଙ୍ଲୋଙ୍ ଅଡ଼େତେ ଅଡ଼େନେ ଆବନୁଲ୍ଲେ ଗିୟ୍ଲେ ବରେନ୍, "ଆମନ୍ ଇନି ସାୟ୍ତେ ?" 16 ଆନିନ୍ ବର୍ନେ, "ଞେନ୍ ବୋଞାଙ୍ଞେଞ୍ଜିଆଡଙ୍ ସାୟ୍ତାୟ୍, ଆନିଞ୍ଜି ଅଡ଼େଙ୍ଗା ଆବରନ୍ତବନ୍ ଆଜନ୍ତୁ ମଣ୍ତା ତୁର୍ତେଜି, ସାୟୁମ୍ଲେ ଞେନ୍ଆଡଙ୍ ବରିଁୟ୍ ।" 17 ତି ଆ ମନ୍ରା ବରେନ୍, "ଆନିଞ୍ଜି ତେନ୍ନେ ସିଲଡ୍ ଜିରେଞ୍ଜି; ଇନିଆସନ୍ଗାମେଣ୍ଡେନ୍ ଞେନ୍ ଅମ୍ଡଙ୍ଲାୟ୍, ଆନିଞ୍ଜି ଦୋତନନ୍ ଜିର୍ତଜି ଗାମ୍ଲେ ବର୍ଲଞ୍ଜି ।" ତିଆସନ୍ ଜୋସେପନ୍ ଆ ବୋଞାଙଞ୍ଜି ସନ୍ଡୋଙ୍ଲେ ଦୋତନଲୋଙ୍ ଆନିଞ୍ଜିଆଡଙ୍ ରବାଙେନ୍ । 18 ଆନିଞ୍ଜି ଆନିନ୍ଆଡଙ୍ ସଙାୟ୍ ସିଲଡ୍ ଗିଜେଞ୍ଜି, ଆରି, ଆନିନ୍ ଆନିଞ୍ଜି ଆମଙ୍ ଅନ୍ରଙ୍ ଅଡ଼ୋଏନ୍ ଆମ୍ମୁଙ୍ ଆନିନ୍ଆଡଙ୍ ଆର୍ନବୁ ଆସନ୍ ଆନିଞ୍ଜି ଅଲ୍ବରେଞ୍ଜି । 19 ଆରି, ଆନିଞ୍ଜି ଅବୟ୍ନେ ଆରି ବୟ୍ନେନ୍ଆଡଙ୍ ଅଲ୍ବରେଞ୍ଜି, "ଅଡିରେ ଗିୟ୍ବା, ଗନୁମ୍ତେନ୍ ଆଗନିୟ୍ମର୍ ଜିର୍ତାୟ୍ । 20 ୟବା, ଇନ୍ଲେଞ୍ଜି ଆନିନ୍ଆଡଙ୍ ରବୁଲେ ଅନିଙ୍ ଆରନ୍ତଡ଼ୋବ୍ଲୋଙ୍ ଏସେଡ୍ବା; ଆରି, ଅନିଙ୍ ଆକୁନା ଆନିନ୍ଆଡଙ୍ ଜୋମେନ୍ ଗାମ୍ଲେ ଏବର୍ନେବା; ବେଗେଲା ଏଗିୟ୍ବା, ଆଗନୁମ୍ତେନ୍ ଅଡ଼୍କୋନ୍ ଇନି ଡେତେ ।" 21 କେନ୍ ଆବର୍ନେ ଅମ୍ଡଙ୍ଲେ ରୁବେନନ୍ ଆସିଲୋଙଞ୍ଜି ସିଲଡ୍ ଆନିନ୍ଆଡଙ୍ ଡୋବ୍ଲେ ବର୍ନେ, "ଇଜା, ଇନ୍ଲେଞ୍ଜି ଆନିନ୍ଆଡଙ୍ ମେଡ୍ରନ୍ ଅଃରବୁବୋ ।" 22 ଆରି ରୁବେନନ୍ ଆସିଲୋଙଞ୍ଜି ସିଲଡ୍ ଆନିନ୍ଆଡଙ୍ ଡୋବ୍ଲେ ଆପେୟଞ୍ଜି ଆମଙ୍ବା ଆନାପ୍ପାୟ୍ ଆସନ୍ ଆନିଞ୍ଜିଆଡଙ୍ ବରେନ୍, "ଆମ୍ୱେଞ୍ଜି ଏରବ୍ବୁମର୍ଡଙ୍ନେ; ଆରିଙ୍ରିଙ୍ବସେଙନ୍ କେନ୍ ଆରନ୍ତଡ଼ୋବ୍ଲୋଙ୍ ଆନିନ୍ଆଡଙ୍ ଅବ୍ସେଡ୍ବା, ବନ୍ଡ ଆନିନ୍ଆଡଙ୍ ଏରବ୍ବୁଡଙ୍ ।" 23 ତି ସିଲଡ୍ଲ୍ଲନ୍ ଜୋସେପନ୍ ଆବୋଞାଙଞ୍ଜି ଆମଙ୍ବା ଆରଡ଼ୋଏନ୍, ଆନିଞ୍ଜି ଆ ଅଙ୍ଗିନ୍, ତି ତରଙ୍ଆନାନ୍ ଆ ନିଡ଼ି ଆଅଙ୍ଗି, ଆଡଅଙ୍ଲୋଙ୍ ସିଲଡ୍ ଓଜେଞ୍ଜି; 24 ଆରି ଆନିନ୍ ଞମ୍ଲେ ଲୋଓଙ୍ଲୋଙନ୍ ପିଡେଞ୍ଜି, ତି ଆଲୋଓଙ୍ ଆରିକ୍କା, ଡାଆନ୍ ଅଡ୍ଡକୋଲୋ । 25 ସିଲତ୍ତେ ଆନିଞ୍ଜି ଗାଗାନେନ୍ ଆସନ୍ ଆତ୍ରଙ୍କୁମେଞ୍ଜି ଆଡିଡ୍, ଆନିଞ୍ଜି ଆଗ୍ରିଜେଞ୍ଜି ଇସ୍ମାଏଲିଅବାଜି ତି ଆତଙର୍ଗଡ୍ ଗିଲିଅଦନ୍ ସିଲଡ୍ ମିସରନ୍ ଜିର୍ତଜି । ଆ ଓଟଲୋଙଞ୍ଜି ଏର୍ଜାଡ଼ିକାନ୍ ଲଙିଡ୍ ଜିନିସଞ୍ଜି, ଗୁଗ୍ଗୁଡ଼ନ୍, ଆରି ଲଙିଡ୍ମେନ୍ ଆଜିରା ଡକୋଏନ୍ । 26 ତିଆଡିଡ୍ ଜିଉଦାନ୍ ଆବୋଞାଙଞ୍ଜିଆଡଙ୍ ବରେନ୍, "ବୋଞାଙ୍ଲେନ୍ଆଡଙ୍ ରବ୍ବୁଡାଲେ ରବ୍ବୋବ୍ମର୍ତଡ୍ ଗାମ୍ଲେ ସସଲନ୍, ଞେନ୍ ଇନି ଞାଙ୍ବୋ ? 27 ୟବା, ଇନ୍ଲେଞ୍ଜି ଆନିନ୍ଆଡଙ୍ କେନ୍ ଆ ଇସ୍ମାଏଲିଅନ୍ ଆମନ୍ରାଜିଆଡଙ୍ ଆମଙ୍ ଏତମ୍ବା, ଅସିଲେନ୍ ଆନିନ୍ଆଡଙ୍ ଇନିବା ଅବ୍ଡୋବୋ; ଇନିଆସନ୍ଗାମେଣ୍ଡେନ୍ ଆନିନ୍ ବୋଞାଙ୍ଲେନ୍ ତ ଜେଲୁଲେନ୍ ଅନ୍ତମ୍ ।" ସିଲତ୍ତେ ଆବୋଞାଙଞ୍ଜି ଅଡ଼େଏଞ୍ଜି । 28 ତିଆଡିଡ୍ ତି ଆ ମିଦିୟନିୟନ୍ ଆବେବାରମର୍ଜି ଆମଙ୍ବାଞ୍ଜି ଆରଡ଼ୋଏଞ୍ଜି, ଜୋସେପନ୍ ଆବୋଞାଙଞ୍ଜି ଅମଲୋଓଙ୍ଲୋଙନ୍ ସିଲଡ୍ ତବ୍ଲେ ପାଙ୍ଲାଜି; ଆରି, ଇସ୍ମାଏଲିଅନ୍ ଆମଙଞ୍ଜି ସିଲଡ୍ ବକୁଡ଼ି ସେରେ37:28 ଆଗ୍ରାମ୍ଗାମ୍ ୨୩୦ ଗ୍ରାମ୍ ରୁପାନ୍ ବମନ୍ରା ଆ କମ୍ୱାରି ଡାବ୍ ରୁପାଡାବନ୍ ପାଙ୍ଲେ ଜୋସେପନ୍ଆଡଙ୍ ତମେଞ୍ଜି; ସିଲତ୍ତେ ଆନିଞ୍ଜି ଜୋସେପନ୍ଆଡଙ୍ ମିସର୍ ଡେସାନ୍ ଓରୋଙେଞ୍ଜି । 29 ତି ସିଲଡ୍ଲ୍ଲନ୍ ରୁବେନନ୍ ଲୋଓଙ୍ବାନ୍ ୟର୍ନେ ଇୟ୍ଲେ ଗିଜେନ୍ ଜୋସେପନ୍ ଅଃମଲୋଓଙନ୍ ଅବୟ୍ ତଡ୍, କେନ୍ ଗିୟ୍ଲେ ଆ ଅଙ୍ଗିନ୍ ପେଏନ୍ ।
30 ଆରି, ଆବୋଞାଙଞ୍ଜି ଆମଙ୍ବା ୟର୍ରନ୍ ବର୍ନେ, "ପସିଜନ୍ ଅବୟ୍ ତଡ୍; ଆରି ଞେନ୍ ଅଡ଼େଙ୍ଗା ଜିରେ ?" 31 ତି ସିଲଡ୍ଲ୍ଲନ୍ ଆନିଞ୍ଜି ଜୋସେପନ୍ ଆଅଙ୍ଗିକାବ୍ ପାଙ୍ଲେ ଅବୟ୍ କିମେଡନ୍ ରବୁଲେ ଆମିଞାମ୍ଲୋଙ୍ ତବୁବେଞ୍ଜି । 32 ଆରି ଆନିଞ୍ଜି ଆପ୍ପେୟଞ୍ଜି ଆମଙ୍ବା ତି ଆତିର୍ଗଡ଼େୟ୍ ତିର୍ଗଡ଼େୟ୍ଜନ୍ ଆ ଅଙ୍ଗିକାବ୍ ଆପ୍ପାୟ୍ଡାଲେ ବରେଞ୍ଜି, "ଇନ୍ଲେନ୍ ଆଡିୟ୍ନେନ୍ ତୁମ୍ ଏଞାଙ୍ଲାୟ୍ । କେନ୍ଆତେ ଡାଙ୍ଗାଡ଼ାଅନ୍ନମ୍ ଆ ଅଙ୍ଗିକାବ୍ ଅଡ଼େ ଇଜା, ଅଃମଡା ?"
33 ସିଲତ୍ତେ ଆନିନ୍ ତିଆତେ ଅଃମଡ୍ଲେ ବର୍ରନେ, "ଓଓ, କେନ୍ ଆଅଙ୍ଗି ଡାଙ୍ଗାଡ଼ାଅନ୍ଞେନ୍ ଆତେ; ଅନ୍ନିଙ୍ ଆ ଜାଡ଼ିଆ ଜନ୍ତୁନ୍ ଆନିନ୍ଆଡଙ୍ ରବ୍ବୁଏନ୍ । ଡାଙ୍ଗାଡ଼ାଅନ୍ଞେନ୍ ଜୋସେପନ୍ଆଡଙ୍ ସିରଡ୍ ପାରଡ୍ ଏମ୍ମେଏନ୍ ।" 34 ସିଲତ୍ତେ ଜାକୁବନ୍ ଆ ଅଙ୍ଗି ପେଲେ ଅକ୍କାନ୍ ଜିଜିଲନ୍ ଆଡାଙ୍ଗାଡ଼ାଅନନ୍ ଆସନ୍ ଗୋଗୋୟ୍ ଡିନା ଜାୟ୍ ୟେୟେଡାଲନ୍ । 35 ତି ସିଲଡ୍ଲ୍ଲନ୍ ଅଡ଼୍କୋନ୍ ଆ ଡାଙ୍ଗଡ଼ାଅନନ୍ ଡ ଅଡ଼୍କୋନ୍ ଆ ଡାଙ୍ଗଡ଼ିଅନ୍ ଡୋଲନ୍ ଆନିନ୍ଆଡଙ୍ ମନବ୍ଡ଼ଞନ୍ ଆସନ୍ ଏରେଞ୍ଜିଗୋଜେଞ୍ଜି; ବନ୍ଡ ଆନିନ୍ ଅମ୍ମାନେଲୋ; ଆରି, ଆନିନ୍ ବର୍ନେ, ଞେନ୍ ୟେୟେଡାଲନ୍ ଡାଙ୍ଗଡ଼ାଅଞେନ୍ ଆମସାନ୍ନିବାନ୍ ଜିର୍ତେ । କେନ୍ ଅନ୍ତମ୍ ଆପେୟନ୍ ଆନିନ୍ ଆସନ୍ ୟେୟେଡାଲନେ । 36 ତି ସିଲଡ୍ଲ୍ଲନ୍ ତି ଆ ମିଦିୟନିୟଞ୍ଜି ମିସର୍ ଡେସାନ୍ ପୋଟିପର୍ ଆଞୁମ୍ ପାରୋନ୍ ଆ କମ୍ୱାରି, ଆଗ୍ରାମ୍ଗାମ୍, ଡନୋବ୍ ମୁଡ଼ ସିପ୍ପାୟନ୍ ଆମଙ୍ ଜୋସେପନ୍ଆଡଙ୍ ତମେଞ୍ଜି ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)