1 Aŋ waan yaanja ti wääna ṭoŋ ḍiirken yoken ḍüülene daa ti nänṭä keellä ke määrene kä gïtï pääken ye, Yeecüwa juwin ïïjjïn ti kä kiiṇdin baaddoni yeeke ogo, "Waŋgic tïïce kä ŋimin yek Pïrrïcïïnnï yaaka lääñï ye. 2 Baati gin’a a kümgon wic aŋ batta bi ükü woo ye, aŋ baati gin’a a paangon yok aŋ batta bi ŋäjjänä me ye. 3 Aŋ gin’a jaajjinii mïïllä gïtï ye, bi tiiŋgä me bownu gïtï aŋ gin’a jaayne liidid äräk ye, bi bargä me nänkä küülkü witin!

4 "Ikee kiine, müggü yeeki, ŋana ikee booje kä m’aka nääkä gaan aŋ batta lïïṭït näŋit ginkalaŋ ŋuca ye. 5 Aŋ ikee nüütke m’ana booje kä ye, booje kä Jooŋ yaana cääyge teynä naana ikee tüwe ye, i ikee yibje maccük ye. Ee, ikee kiine booje kä Ike!

6 "Aŋ yerñä kä duuc batta yääygä me kä tiilgälen kä yew? Aŋ baati yaana wiirtä Jooŋ iken ti ye. 7 Aŋ cäänna ke jiik witkic muure a pakin. Ŋana ikee booje, ikee kääṭe kä yaac kä yerñä ḍiirken.

8 "Aŋ ikee kiine, m’ana Ika gïmgana me ñomgen ti ye, i cäänna bi gïmgänä Minneni Mänbaan malaŋŋi yek Jooŋ ñomgen ti. 9 Aŋ m’ana Ika reecca woo mäbaan ñomgen ti ye, i cäänna bi reecä woo malaŋŋi yek Jooŋ ñomgen ti. 10 Aŋ m’ana jaay jiik yaackä Minneni Mänbaan ti ye, bi kulkunu Jooŋ aŋ m’ana aammä yok Wääktäŋ Laṇṇä ye batta bi kulkunu Jooŋ.

11 "Aŋ naana ikee äce me däŋkämalläni yek Yühüüṇṇï ti ke gütoni ti ke mügdoni ti ye, ŋana ikee payde jiik gïtkïc ogo ikee bi jaayje ogo ŋaaka halla jiik bi jaayje ogoo, 12 aŋ Wääktäŋ Laṇṇä yen Jooŋ ken bi ikee nüütke wuuŋ yaanja ti gin’a bi jaaye kä ye."

13 Mäŋkalaŋ ṭoŋ gïtï Ike kiini ogo, "Nüüto, määdo kiinä dalä yäṇṇäni yaaka cäkkonon kä wäyo ye päägon."

14 Aŋ ike luugi Yeecüwa ogo, "Muukonḍi, a ŋaani ken Ika naŋŋa agä güto ke ŋüüldo gïtï waak waadgic ti?" 15 Aŋ iken kiini Yeecüwa ogo, "Waŋgic tïïce aŋ ḍuuggic tïïje kä jon ḍuŋe, üṇṇü yen mänbaan batta pääygä me ke waak yeeke."

16 Aŋ iken pääjgene gäärrä kiinne ogo, "Ŋommañ yen oon yaana a ceeggon ye giit waak ṭeṭaŋ. 17 Aŋ ḍoŋe paŋŋe gïtï ogo, ‘Ika bi näŋjä ogoo? Ika batta cääygana nänṭä yaana ḍuccudu kä waak ergin yeeki ye.’ 18 Aŋ ike jaajjin ogo, ‘Ika bi näŋjä aŋŋi, tuucku yeeki liigä gïtï aŋ ika bätä yaaka gäpgaŋ ye aŋ bi ḍucu kä päk yeeki ke waak yeeki muure. 19 Aŋ ika bi ḍoŋi kiinä ogo, "Ḍoŋi, ïkï cääygi kä waak ḍoocin yek yuungu kä ḍiräk. Yïïkä aŋ ämä aŋ mätä aŋ cääyä jonü kä ñap."’

20 "Aŋ ike kiini Jooŋ ogo, ‘Ïkï oon amgonḍe, ïkï bi tüwü wïïrïn tiññaŋ aŋ waak’a agii kä tootin yaakka bi wäätï a yek ŋaani?’

21 "Men a amgon kä ḍooññe waak ŋommañ wic aŋ batta cääyge cekkïtïn ke Jooŋ."

22 Aŋ Yeecüwa baaddoni yeeke kiinne ogo, "Ina ken kiiṇde kä ogo ŋana ikee payde jiik gïtkïc üṇṇü yeenic ti ogo ŋaaka ken bi amje aŋ cäänna yokic ti ogo ŋaaka ken bi eŋdee yaanna. 23 Aŋ üṇṇü büṭï witkin ginäämkä aŋ gaan büṭï witkin buruŋgu. 24 Yoore por gaaggaaŋŋi, iken batta pïïtï aŋ batta ïṭï aŋ batta kuutit yokïn waak äämkä äärgä gïtï ke tuucku gïtï aŋ Jooŋ ken äämï iken. Aŋ ikee büṭa kääṭe kä yaac kä ḍïïrgä! 25 Aŋ a ŋaani ken ikee ti kä paydin jiik jïñe yoku lïïṭï ŋüccï ti wuuŋ kä keelok üṇṇü yeene ti? 26 Aŋ naana ikee batta lïïlte näŋe gin’a ḍeeraŋ bata yaanna ye, ikee päje jiik gïtkïc yakkalaŋ ina?

27 "Yoore por deykä yül ogoo. Iken batta ñuugal aŋ batta wïñï uṇtalli, aŋ ikee kiine, Cïlïmaan gällä yeene ti muure batta a eŋdïnï bata yaŋkalaŋ iken ti. 28 Aŋ naana Jooŋ ïïŋkïdï luum yaaka a üdïn tiññaŋ aŋ tuñgunu me maañ tïṇṇäk ye, ikee bi iiŋke ogoo büṭa, ikee yaaka luggin yeenic ḍeeraŋ ye!

29 "Aŋ ŋana ikee määje gin’a ame ye ke gin’a maade ye. Aŋ ŋana ikee payde jiik gïtkïc ogo waak. 30 Aŋ mä ŋommañ wiñe muure ken kälit waak yaakka ŋätin, aŋ Wääc ŋäjjä ogo ikee ṭäkce waak yaakka. 31 Por ïïjje määje Yätkïtïn yen Jooŋ aŋ waak yaakka muure bi ŋuckene kä me ti."

32 "Ikee käbälgälen, ŋana ikee booje, Wääc yaana ñaalok polloŋ jï ye jone ñabaŋ kä iññä ikee Yätkïtïn.

33 "Waak yeekic yääjje woo aŋ iñe m’aka ṭäkï ye. Aŋ ḍuuggic tutke ḍïïggï tiil yaaka batta daandïdï ye, ke waak ŋerkä ñaalok polloŋ jï yaaka batta baakkïdï ye, nänṭ’a käṭoni batta käṭï aŋ ḍiiḍini batta cüüṭï gïtï ye. 34 Aŋ nänṭä yaana cääyene kä waak ŋerkä yüükü ye, i jonü a wïca cäänna."

35 "Iiŋce aŋ yokic yukke ñuugele kä aŋ dikoni yeekic dale käl, 36 aŋ wääte bata me yaaka kïïjjïdï men mooye yeenen yaana ḍüükïdï ätä ba' ñäänkä ye, aŋ ike bi kupkunu kä bïraŋ naana ätä aŋ äntüke ṭumge ye. 37 Ŋüülkïn ñuuguloni yaaka wäätätä men mooye yeenen i däämï ye. Ikee kiine a gïtken, ike bi ïïŋcï ñuugulee kä aŋ iken bi ḍooce ïñï däräŋgä ti aŋ ike bi ätä aŋ iken ñuugulunu. 38 Aŋ naana ike ätä wïïrïn kule gïtï ke i batta mor bur käjä aŋ kañe däämï ye, ŋüülkïn a ñuuguloni yaakka ti.

39 "Yaanni ooke gïtï, naana men mooye yen än ŋäjjä a wuuŋ yaana wali ken äätete käṭo ye, ike yoku än yeene batta bäägge liikä me gïtï. 40 Aŋ cäänna cääye yokic age tootin kä yaana Minneni Mänbaan bi äätee kä wuuŋ yaana batta payde daa kä ye."

41 Aŋ Bütürüc tääccin ogo, "Pïṭo, gäärrä yaanna nüütkodoon kä ikoon halla nüütküdü me muure?"

42 Aŋ luugi Pïṭo ogo, "A ŋaani ken a iinḍok yaana lukkete me aŋ a ŋäjjo ye, yaana müükkünü men mooye yeene än yeene jïñe muure, aŋ meken iñde waak äämkä kä wuuŋ yaana päjjïdï ye ti? 43 Ŋüülkïn ñuugulo yaana wäädänä men mooye yeene ñuugal naana ike ḍuku ye. 44 Ikee kiine a gïtken, men mooye ñuugulo yaanna bi müükke wakkä yeeke muure. 45 Aŋ naana ñuugulo payit jone ti ogo, ‘Men mooye yeeni bi kuru’ aŋ ike üccï kä giimmä ñuuguloni yaaka a ook ke määngä aŋ ämï aŋ mätï ke waŋge wïṭe woo. 46 Aŋ men mooye yen ñuugulo yaanna bi ḍuku kä nïïnnä yaana batta ŋäjje ye ti, ke wuuŋ yaana batta ŋäjje ye. Aŋ bi jooje kä jooññu yaajgonḍe, aŋ ḍooce ke m’aka batta cääygene kä luggin ye.

47 "Aŋ ñuugulo yaana ŋäjjä ṭäktäŋ yen men mooye yeene, aŋ yore batta agee tooton ñuugal daa kä ṭäktäŋ yeene ye, bi käñï giimmä yaajgonḍe. 48 Aŋ ñuugulo yaana batta ŋäjjä gin’a ṭäkkänä men mooye yeene aŋ ñuugal kärgit ye, bi ḍooygu me kä poṭal. Aŋ m’ana iñgä me kä yaac ye, i daa me ṭäkï ike ti kä yaac, aŋ m’ana müükkünü me kä ḍiräk ye, i daa bi ñuygu me ike ti kääṭï kä ḍiirin."

49 "Ika äätänä ŋommañ wiñe ḍooccudu maccük aŋ Ika ṭäkä ogo yoku ḍaŋŋä bilto ti waaŋo! 50 Aŋ Ika cääyga büüllü pilconḍe yaana büüṭü kä ye, aŋ tïñïdïn yeeni bi yäwaŋ ogoo ke ḍage. 51 Ikee ḍuuce ogo Ika äätonoo ääconoo ŋïïbbïn ŋommañ wic? Ba’ay, ikee kiine, a kiiptin. 52 Aŋ tiññaŋ ke ñomuk mä äntüke yaaka kä duuc ye bi kiiptit, m’aka kä ḍäk ye a ädäŋŋi m’aka kä yew ye ti, aŋ m’aka kä yew ye, a ädäŋŋi m’aka kä ḍäk ye ti.

53 ‘Aŋ wäy bi wäätï a ädäŋ minneni yeene,

aŋ minneni a ädäŋ yen wäyen

aŋ miy bi wäätï a ädäŋ yen ṭuulle yeene

aŋ ṭuulle bi wäätï a ädäŋ yen meen.

Aŋ ṭiinmiy yen oon bi wäätï a ädäŋ yen iŋ minneni yeene,

aŋ iŋ minneni yeene bi wäätï a ädäŋ yen ṭiinmeen oore.’"

54 Aŋ Yeecüwa ŋuca ṭoŋ kiinne ogo, "Naana ikee yurte polku kääjïdï äŋ waŋ ye, ikee jaaye ogo ñaal äätodo, aŋ daa wäätï. 55 Aŋ naana ikee yurte jommu mä ïñïnä kütï ye, i ikee jaaye ogo carrä bi wääto ko yaac, aŋ daa wäätï. 56 Ikee lääñoni, ikee ŋäjje ŋüüllü gïtï biilkä ŋommañ ke polloŋ, aŋ ikee wuuŋ yaana tiññaŋ yaanni batta lïïlde kä ŋüüllü gïtï ogoo?"

57 "Aŋ ḍuuggic batta jooje kä gin’a wodaŋ ye ina? 58 Bata yaana ate ke cïŋdo yüünü nänṭä ba küüllü ye, jiik toode i mor ikee ääte päy jï i batta mor ïkï ḍaakey ti güto ti aŋ güto ïkï müükkey tïïco, aŋ tïïco ïkï yeepey gaŋgar. 59 Ïkï kiineni, ïkï batta bi kääjä woo ke tiilñanle yüünü yaana buccin ye wanjeeda muure."