1 Aŋ wuuŋ yaanja ti mäkkalaŋ a wïca yaaka Yeecüwa nüütkï kä mä Jalïïl yaaka nägi ḍugin Biilaatuc wääna iken äccete ïïllä wäämmä yok ti ye. 2 Aŋ iken luuŋŋe ogo, "Ikee ḍuuce ogo mä Jalïïl yaakka yiñ yeenen ogo mooye ke meken yaaka muure ke iken kä yaana wääccene kä yaanna? 3 Ba’ay, ikee nüütke, naana ikee batta ḍagde kä yiñ ye, ikee bi tüwe muurijaan bata iken. 4 Halla m’aka kä caay witken kä cunuuk yaaka ḍimgi witin än küüllü yen mä Cïlowaam aŋ tüwgïn ika, ikee ḍuuce ogo iken yiñ yeenen ogo mooye ko meken yaaka cääygo Oorcalïïm ika? 5 Ba’ay, ikee nüütke, naana ikee batta ḍagde kä yiñ ye, ikee muurijaan bi tüwe bata iken."

6 Aŋ iken päkki gäärrä yaanni ogo, "Oon cääygene jaan beel bata ŋoommu agee pïïton bal jï baanne aŋ ike äätin määjï jengä ṭulgen aŋ batta a käñon. 7 Aŋ ike jaajjin tïïco bal ti ogo, ‘Yooru, yuungu kä ḍäk i ika äätädä winni määjä jengä ṭulgen ŋoommu yaanni wic, aŋ ika batta käñdä! Tääyä ïñï. Nänṭä küümgede käpet bal jï.’

8 "Aŋ ike luugi ogo, ‘Men mooye, dalä bu yun yaanni ti cäänna ke küñgü daa kä ŋoy aŋ puukku gün. 9 Naana ïkï käññi ṭulge yun yaanja ti ye, i ŋeraŋ. Aŋ naana ïkï batta agä käñon ye, i tääyä ïñï.’"

10 Aŋ Ike nüütï daaŋmallä yen Yühüüṇṇï kalaŋ jï Äŋ jïñe Wääktäŋ ti. 11 Aŋ iiŋ yaŋkalaŋ bilti wïca a püündïnï kä wääktäŋ yaaññä yuungu kä caay witken kä cunuuk. Aŋ ŋäñe gooṇṇu aŋ batta lïïṭït kä ärcin ñaalok yore. 12 Aŋ wääna yoorene daa Yeecüwa ye, i bärkene ti Ike ti aŋ kiinne ogo, "Iiŋ, ïkï agä teeton woo kä yor carre yüünü." 13 Aŋ Yeecüwa ïṇte ḍoocce iiŋ ŋäñe ti aŋ kä ḍeeraŋ aŋŋi yore äṭṭe ñaalok, aŋ ike mäŋjin Jooŋ.

14 Aŋ wiñ yen daaŋmallä pennä kä wääna Yeecüwa ṭiiññee kä Äŋ jïñe Wääktäŋ ti ye, aŋ me kiinne ogo, "Nïïnkä kä ḍüügük a yek ñuugula, ääte aŋ ikee ṭeeñge me nïïnkä yaakki ti, aŋ ŋana Äŋ jïñe Wääktäŋ ti." 15 Aŋ luugi Pïṭo ogo, "Ikee lääñoni! Ikee ti m’ana cääyge yaan ke tüürüŋ Äŋ jïñe Wääktäŋ ti ye batta yoku gütke buun jï aŋ äje määtke piik? 16 Aŋ tiññaŋ winni iiŋ yaanni a ṭuul yen Abrayiim, a ḍiikon kä Wiñ yen Meŋkeekeni yuungu kä caay witken kä cunuuk. Aŋ batta yoku teetänä me woo Äŋ jïñe Wääktäŋ ti kä ḍiiŋŋä yaanna?"

17 Aŋ wääna ike jaaye kä aŋan ye, i ädäŋŋi yeeke ḍoocce loon gïtï aŋ me muure juuggen ñappä kä wakkä ŋerken yeeke yaaka naŋŋe ye.

18 Aŋ Ike jaajjin ogo, "Yätkïtïn Jooŋ beel bata ŋaaka? Aŋ bi iirjä ke ŋaaka? 19 Beel bata käwcan jallä yaana koowi oon, aŋ iññe pïïtte ïñï bal yeene jï, aŋ yüllü aŋ wäättä a jaan, aŋ ḍïïrgä näŋŋä kurken kimke ti ye."

20 Aŋ ŋuca Ike jaajjin ogo, "Yätkïtïn Jooŋ bi iirjä ke ŋaaka? 21 Beel bata ŋimin yaaka koowi iiŋ aŋ wäccee kä ḍon gïtke kä ḍäk yek kakin ke püüwene muure ye."

22 Aŋ Ike attä laaynä bänkä mäyken gïtï ke tuyku gïtï muure nüütï päy jï wääna atee kä Oorcalïïm ye. 23 Aŋ mäŋkalaŋ Ike kiini ogo, "Pïṭo, a me ḍeewken ken bi makä me?"

Aŋ luugi Yeecüwa ogo, 24 "Pucce kä yaac kä kaaccin kä äntüke ḍïïwconḍe, me ḍiirken bi püccï ogo iken kaaco aŋ batta bi lïïṭï. 25 Naana men mooye yen än äntüke üülje ye, ikee bi yudde üṇtük ṭume äntüke aŋ ñuje ogo, ‘Mügdo, kupkoon äntüke’. Aŋ Ike bi lüükcï ogo, ‘Ikee kuje, ikee ääte wa.’ 26 Aŋ ikee bi luukce ogo, ‘Ikoon ämmon aŋ ikoon mätton ke Ïkï, aŋ Ïkï nüüttï baan yoono jï.’ 27 Aŋ Ike bi lüükcï ogo, ‘Ikee kiine, ikee kuje, ikee ääte wa. Aŋge yokic Ika ti, ikee yaaka nääŋe yiñ ye.’

28 "Aŋ wïca ïwok ke ŋeeynä me leken bi bilti aŋ ikee bi yuṭe Abrayiim ke Icaak ke Yaagüüp, ke bäṭoni muure Yätkïtïn Jooŋ ti, aŋ ikee kä ḍuuggic age yibjïnï woo. 29 Aŋ mäbaan bi ätä ñomuk ke ŋäjäk ke ñaalok ke ïñï aŋ cääjjï ïñï därŋañ ammä ti Yätkïtïn Jooŋ ti. 30 Aŋ m’aka a düüñïn ye ken bi wäätï a ïïjjïn, aŋ m’aka a ïïjjïn ye ken bi wäätï a düüñïn."

31 Aŋ wuuŋ yaanja ti Pïrrïcïïnnï yakkalaŋ Ike kiini ogo, "Aŋgä yorü winni, Ïïrüüdüc ṭäkï nääkä Ïkï."

32 Aŋ kiinne ogo, "Ate aŋ wiiw yaanja kiine ogo Ika ñuulcodoo woo meŋkeekeni aŋ Ika ṭiiñjo mäbaan tiññaŋ ke tïṇṇäk, aŋ nïïnnä ḍäk ti ñuugula yeeni bi ḍaagjo. 33 Ee, tiññaŋ ke tïṇṇäk ke tïṇṇaana Ika bi wükcü, batta päjjïdï bäṭo tüw nääŋkalaŋ, a Oorcalïïm jï pare!

34 "Ay Oorcalïïm, Oorcalïïm, baan mooye yaana nääkä bäṭoni aŋ yibbä tüüjgï yek Jooŋ ye! Ääŋki aŋŋa ŋïṭṭä muure Ika ṭäkä ogo merkä yüükü ḍüljo yokïn bata aaṭṭä yaana ṭulge ḍülde yokïn bugge ti ye, aŋ Ika batta bääggadaa. 35 Aŋ yoore, än yeenic dälkene kä me ïñï aŋ Ika batta bi yoora ŋuca ke bi jaajje kä ogo, ‘Ŋüülkïn m’ana äätïdï kä yäṇtäŋ Pïṭo ye ti!’"