1 Aŋ Yeecüwa baaddoni yeeke pääjgene gäärrä aŋ nüütkene ogo mäṭo kamat aŋ ŋana erdo. 2 Ike jaajjin ogo, "Baan yaŋkalaŋ ti wïca güto yaŋkalaŋ a m’ana batta booc kä Jooŋ aŋ mäbaan batta eemde ye. 3 Aŋ baan jï wïca boro yaŋkalaŋ äätïdï ike ti kamat ike kiiṇtä ogo, ‘Iñja woṇṇu ädäŋ yeeni ti.’ 4 Aŋ por güto yaakï, aŋ wääna ye, i ike ḍoŋe kiinne ogo, ‘A jïñe ika batta booju kä Jooŋ aŋ mäbaan batta eemdä. 5 Aŋ kä yaana boro yaanni lilga kä gitkin ye, iiñca iñä woṇṇu yeene kä yaana iiñjedee äätedee aŋ ika bi piila kä wic ye.’"

6 Aŋ Pïṭo jaajjin ogo, "Tiiŋe güto ṭäämconḍe jiike. 7 Aŋ Jooŋ batta bi äccï woṇṇu mä yeeke yaaka a wakin ye ti, m’aka wegok Ike ti äŋ jïñe ke mïïllä jïñe ye ti? Ike bi koor kä luuŋŋu iken? 8 Ikee kiine, iken bi iñe woṇṇu kä bïraŋ. Aŋ naana Minneni Mänbaan ḍuku ye bi käñï me ŋommañ wic yaaka cääygene kä luggin ye?"

9 Yeecüwa cäänna me pääjgene gäärrä yen m’aka juuggen agene ḍoocin ḍuuggen ti ogo iken wodowot, aŋ meken boonjï jugin ye. Aŋ jaajjin ogo, 10 "Ook kä yewwe attä änlaṇṇä jï mäṭï, keelok a Pïrrïïcï aŋ yaŋkalaŋ a ḍüṭo yaajgonḍe. 11 Aŋ Pïrrïïcï yuuttu ñaalok aŋ mäṭṭä kä ḍoŋe ogo, ‘Jooŋ, Ïkï maaŋeni yok, ika batta beelä bata mäkkalaŋ yaaka a käṭoni ke mäddoŋŋi ke balkä ye, aŋ cäänna batta bata ḍüṭo yaajgonḍe yaanni. 12 Aŋ ika büüṭü ääŋki kä yew, nïïnnä ŋaṭükel ti, aŋ ika äccädä caycayni yek waak muure yeeki yaaka kañdä ye.’

13 "Aŋ ḍüṭo tiilgä yuuttu kä utar, aŋ cäänna batta waŋge äärede ñaalok polloŋ jï aŋ jone jemme aŋ jaajjin ogo, ‘Jooŋ, ängaa ŋïngïn, ika agä men yaajgonḍe.’ 14 Ikee kiine, oon yaanni attä än yeene ti i wodaŋ batta bata menen. Aŋ m’ana ḍoŋe äärede ñaalok ye, i bi ḍuukunu me ïñï, aŋ m’ana ḍoŋe ḍuukcede ïñï ye, i bi ääränä me ñaalok."

15 Aŋ mäbaan merkälen yeeken äpätä Yeecüwa ti ogo tääbje yokïn. Aŋ wääna yoorene daa baaddoni yeeke ye, i iken geri.

16 Aŋ bärki Yeecüwa Ike ti aŋ kiinne ogo, "Dale merkälen ätä Ika ti aŋ ŋana ṭïïge nääŋka Yätkïtïn yen Jooŋ agee kä yen m’aka belok bata merkälen yaakki ye. 17 Ikee kiine a gïtken, m’ana batta Yätkïtïn yen Jooŋ gïmgede bata minneni ye, batta bi kaacï ti."

18 Aŋ woydo yaŋkalaŋ Yeecüwa kiinne ogo, "Nüüto ŋerconḍe, a ŋaaka ken naŋä ken yätä kä üṇṇü yaana ke cüle ye?"

19 Aŋ ike kiini Yeecüwa ogo, "Ika bäärja ogo men ŋerconḍe ina? Baati m’ana ŋeraŋ ye, a Jooŋ pare. 20 Ïkï ŋäjjä jiik ïïnïnï yaakki, ‘Ŋana ïkï näŋdä balkïtïn. Ŋana ïkï nääkä me. Ŋana ïkï käṭä. Ŋana me päkkädä yelkïtïn. Wääc ke miic eemdä.’"

21 Aŋ ike jaajjin ogo, "Yaakka muure bilti tïïjä wääna daa kä dürkïtïnï ti ye."

22 Aŋ wääna Yeecüwa tiiŋŋee kä aŋan ye, i kiinne ogo, "Mor buunu gin kä keelok. Waak yüükü muure yääjjä woo aŋ pääggä aangï, aŋ ïkï bi cääygini waak ŋerkä polloŋ jï. Aŋ wäättan bäätä Ika ti." 23 Aŋ wääna oon tiiŋŋee kä aŋan ye, i ike jone yaaññä kä yaac kä yaana agee kä ceeggon mooye ye. 24 Aŋ jon yiñe yeene yoori Yeecüwa aŋ jaajjin ogo, "Teyaŋ kä yaac kä kaaccin ti ceeggï Yätkïtïn yen Jooŋ ti! 25 Poṭulaŋ kä yaac kä kaaccin woo kalman kääl lïbära ti, kä kaaccin ti ceeggon Yätkïtïn yen Jooŋ ti!"

26 Aŋ m’aka tiiŋŋä ye jaajjin ogo, "A ŋaani ken bi käñï mäkkin?"

27 Aŋ Yeecüwa jaajjin ogo, "Waak’a batta a päyin mäbaan ti ye, i a päyin Jooŋ ti."

28 Aŋ Bütürüc jaajjin ogo, "Yooru, äärgä yooko muure mañjonon aŋ ikoon bäätonon Ïkï ti."

29 Aŋ Yeecüwa jaajjin ogo, "Ikee kiine a gïtken, m’ana paa baanne mañjene ïñï ke iiŋe ke mädgen ke wäyen ke meen ke merkälen ogo Yätkïtïn yen Jooŋ ye, 30 bi iñgä me ḍiräk kä yaac üṇṇü yaanni ti, aŋ bi cääygene üṇṇü ke cüle yuungu yaaka äätïdï ye ti."

31 Aŋ Yeecüwa baaddoni yaaka kä caay witken kä yew ye koowne ke Ike, aŋ kiinne ogo, "Tiiŋe, ïkïïn atïn Oorcalïïm nänṭä yaana wakkä muure yaaka peri bäṭoni ogo Minneni Mänbaan ye bi wäätee a jïñe ye. 32 Aŋ Ike bi müükkünü me boorgu aŋ bi ñiyene yok aŋ kirgä aŋ ŋüülgü yok kä ñaangä, 33 Ike bi ḍooygu aŋ bi näkä ḍok aŋ nïïnkä kä ḍäk bi juwu ñaalok tüwnü ti."

34 Aŋ baaddoni yeeke waak yaakka batta ookcutu gïtï gin’a nüütütü jiik yaakka ye, a paangin yok iken ti aŋ iken batta ŋäjjä ogo Ike jaayo ogo ŋaaka.

35 Aŋ wääna Yeecüwa äätenee kä cokal Ariya ye, wïca oon yaŋkalaŋ cääy päy taaŋ a uyku ñüjï. 36 Aŋ wääna ike tiiŋŋee kä ṭoŋ kaajdene kä ye, ike tääccin ogo, "A ŋaaka ina?" 37 Aŋ kiini me ogo, "A Yeecüwa yen mä Naacira ken kaajit." 38 Aŋ ike yaajjin ogo, "Yeecüwa, Minneni Daawüüt, ängaa ŋïngïn!"

39 Aŋ m’aka ñome ti ye ike geri, aŋ kiiṇtä ogo, "Tiiŋjä ïñï." Aŋ ike yaajjin kä yääw küülcende ogo, "Minneni Daawüüt, ängaa ŋïngïn!"

40 Aŋ Yeecüwa yuuttu ïñï aŋ iinjin ogo oon äbïï me Ike ti, aŋ wääna äätenee ti Ike ti kä cokal ye, i taaññe ogo, 41 "Ïkï ṭäkä ïkï näŋgeni ŋaaka?"

Aŋ ike luukcin ogo, "Mügdo, ika ṭäkä yuṭu ŋuca."

42 Aŋ ike kiini Yeecüwa ogo, "Yurcu woo! Luggin yüünü ïkï ṭeeññey." 43 Aŋ ojana ike yurcin woo aŋ bäätcin Yeecüwa ti, i Jooŋ maaŋŋe yok, aŋ ṭoŋ muure yaaka yuṭṭu ye, mäŋjin Jooŋ ti.