1 Aŋ nïïnkä yaakca ti yätkä Aguctuc Kaycar, yaana mügït baan mooye, yaana battä me ogo Rooma ye, iccin jiik ogo me perjï me ŋommañ wic muure. 2 Aŋ paŋŋä yaanni a yaana ïïjgï me ti wääna Kïrïnyüc mügdee Cüürïya ye. 3 Aŋ mäŋkalaŋ daa ḍukcin ḍoŋe pere baan dänkä yurgen ti.

4 Aŋ Yuucip üŋü Jalïïl baan mä Naacira atï Yühüdïya baan mooye yätkä Daawüüt nänṭ’a battä me ogo Beetlaam ye, kä yaana ike agee kä kaaynä Daawüüt aŋ a mä yeeke ye. 5 Ike atï yoken pergä ke ṭuul Märïyam yaana yüṇṇe i laajï ye. 6 Aŋ wääna cääyene Beetlaam ye, nïïnkä yeeke yek giidä päjjin. 7 Aŋ giiṇṇä kaygon yeene a oon aŋ käṇṇe yok kä burŋu aŋ maaṭṭe kuun yaana äämene me ḍiik ye jï, nääŋka iken batta agene kä käñin kä än yaana kaacene kä jï ye.

8 Aŋ baan yaanja ti mäkkalaŋ a kaaydoni yek käbälgä woo ḍuŋ jï kä mïïllä. 9 Aŋ iken oji yokïn malak yen Pïṭo nüütkene woo yore, aŋ gällä yen Pïṭo diikin ïñï iken ti aŋ iken bojgin kä yaac. 10 Aŋ kiini malak ogo, "Ŋana ikee booje! Ikee päkkede Jiik Ŋerkä yaaka me muure juuggen bi ñabene ñap kä yaac ye. 11 Wïïrïn jïñe yaanni ti tiññaŋ ikee gitkene me Minneni yaana mäkï me ye baan mooye yätkä Daawüüt ti, aŋ Ike a Pïṭo Macii. 12 Aŋ gin’a bi nüütï ŋïje daa kä ye inni, Minneni bi miike a käton yok kä burŋu aŋ a maaṭon kuun yaana äämene me ḍiik ye jï."

13 Aŋ kä ḍeeraŋ aŋŋi malaŋŋi ḍiirken yek polloŋ jïñe üükïn woo aŋ yoken coori ke menen, aŋ mäṭï Jooŋ aŋ jayok ogo,

14 "Gällä Jooŋ yaana Küülaŋ kä Yaac ye,

aŋ ŋïïbbïn m’aka ñäpke jugin ye ti ŋommañ wic."

15 Aŋ wääna mañjene daa ïñï malaŋŋi aŋ ḍukcene polloŋ jï ye, i kaaydoni luugjin pääken ogo, "Ääte atïn Beetlaam jiik yaaka näŋŋä ḍuuggen nüütkïnïn kä Pïṭo ye, ookïn."

16 Aŋ attä kä bïraŋ, aŋ Yuucip ke Märïyam wääti i Minneni a maaṭon kuun yaana äämene me ḍiik ye jï. 17 Aŋ wääna Minneni yoorene daa ye, me päkki jiik’a nüütkene daa malak ogo Minneni ye. 18 Aŋ me muure yaaka tiiŋŋä ye, witken ḍiiktin kä jiik kaaydoni. 19 Aŋ jiik yaakka muure ḍooci Märïyam jone ti aŋ pagde gïtï. 20 Aŋ kaaydoni ḍukcin i mäŋï aŋ mäṭï Jooŋ kä yaac kä jiik’a tiiŋi aŋ yoori ye, bata yaana nüütkene daa malak ye.

21 Aŋ düüñïn nïïnkä ŋaṭükel ti, wääna ike erene daa me ye, i Ike äkki me ogo Yeecüwa a yäṇtäŋ yaana äbi kä malak Jïbïrïïn i batta mor laacene Märïyam Ike ye. 22 Aŋ wääna waan latcin woo yeenen ḍäägene kä ye, bata yaana jaajjene kä jiik ḍoocin yek Müüca ye, Yuucip ke Märïyam Ike koowi aŋ iji baan mooye Oorcalïïm icki Pïṭo. 23 Bata yaana daa agee kä pergon jiik ḍoocin yek Pïṭo jï ye ogo, "Minneni yaana a kaygon oone ye a yen Pïṭo." 24 Aŋ iken äccin wäämmä yok bata yaana agee kä pergon jiik ḍoocin yek Pïṭo jï ye, bääbgälen kä yewwe i naana ye gülküteni kä yewwe.

25 Aŋ oon yaŋkalaŋ bilti Oorcalïïm battä me ogo Camoon a men wotconḍe aŋ booc kä Jooŋ kïïjjïdï äätin yen Macii yaana mäkï Icärayiil ye aŋ Wääktäŋ Laṇṇä yen Jooŋ bilti ike ti. 26 Aŋ nüütkene daa woo Wääktäŋ Laṇṇä ogo ike tüwnü batta bi yoorje i batta mor Macii yen Pïṭo yoorje. 27 Aŋ attä kaal yen änlaṇṇä ti kä Wääktäŋ Laṇṇä, aŋ wääna Märïyam ke Yuucip kääjene kä ti äddene Minneni Yeecüwa ickete daa Pïṭo kä jiik ḍoocin ye, 28 i Camoon Yeecüwa koowne aŋ mäŋjin ñaalok Jooŋ ti, aŋ jaajjin ogo,

29 "Pïṭo, tiññaŋ kiingon yüünü dalä tüw kä ŋïïbbïn

bata yaana daa jaajjinii kä ye.

30 Ika waŋgi yuṭṭu maŋŋä yüünü,

31 yaana tutkini ṭoŋ muure ñomgen ti ye.

32 Diktäŋ nüütïdï woo ṭäktäŋ yüünü boorgu ti,

aŋ ääcïdï gällä mä yüükü Icärayiil ti."

33 Aŋ Yeecüwa wäyen ke meen witken ḍiiktin kä jiik yaaka kiinene daa kä me ogo Ike ye. 34 Aŋ iken ŋüülkï Camoon aŋ jaajjin Märïyam ti ogo, "Minneni yaanni a wakon kä ḍimmin ke juwin yek me ḍiirken Icärayiil jï, aŋ bi wäätï a gin’a nüütï ye yaana tuucu me yokïn ye. 35 Nuŋko paydinni yek me ḍiirken bi üükene woo ye. Aŋ jonü bi jecä gïtï gaaḍal cäänna."

36 Aŋ cäänna bäṭo Anna ṭul Panawiil a äntüke yen mä Acïïr bilti wïca, aŋ ike a ṭïïndïnï, aŋ wääna ḍeyene daa me ye cääygin ke oon yeene yuungu kä ŋaṭükel. 37 Aŋ wäättä a boro ke ḍake yuungu caykä kä cunuuk witken kä ŋan. I ike batta kaaccïdï woo kaal yen änlaṇṇä jï, mäŋï i büüṭï aŋ mäṭï Jooŋ wïïrïn jïñe ke äŋ jïñe. 38 Aŋ waan yaanja ti ike ḍäägin ti aŋ Jooŋ maaŋŋe yokïn aŋ jaaynä kä jiik Minneni yaana keeccätä me muure ogo maŋŋä yen Oorcalïïm ye.

39 Aŋ wääna Yuucip ke Märïyam näŋŋene kä wakkä muure bata daa jiik ḍoocin yek Pïṭo ye, i iken ḍukcin Jalïïl baan yeenen Naacira ti. 40 Aŋ Minneni pïr aŋ tey, i a küümon kä ŋäjjin, aŋ ŋüülkïn yen Jooŋ a Ike ti.

41 Aŋ yuungu muure Yeecüwa wäyen ke meen atcïdï Oorcalïïm Poñ Kaaldin Wic ti. 42 Aŋ wääna yuunge aŋŋene caay witken kä yewwe ye, iken attä poñ ti bata yaana daa naŋte daa kä kamat ye. 43 Aŋ wääna nïïnkä yek poñ baakkenee aŋ wäyen ke meen ḍukcene kä ye, durñu Yeecüwa dalji Oorcalïïm i batta ŋäjjänä, 44 aŋ iken ḍüücï ogo bilto ti bi äŋ jïñe yoommï atto ke m’aka äätïï ko ye. Aŋ kääcki kä maawnä mä yeeken gïtï ke mügge gïtï. 45 Aŋ wääna batta kañte daa kä ye, iken ḍukcin Oorcalïïm Ike maawgä. 46 Aŋ nïïnnä ḍäk ti Ike kañi kaal yen änlaṇṇä jï, cääy waadgä ŋäjjoni ti, aŋ Ike jiik yeeken tiŋde aŋ tajde tääctäŋŋi. 47 Aŋ me muure yaaka tiiŋŋä ye, witken ḍiiktin kä ookcenene gïtï ke luukcin yeene. 48 Aŋ wääna yorene daa wäyen ke meen ye, witken ḍiiktin, aŋ kiini meen ogo, "Minneni yeeni, ikoon naŋdoon aŋan ina? Wääc ke ika ikoon atton määjon Ïkï kä buñ mooye kä yaac."

49 Aŋ iken kiinne ogo, "Ika maawa ina? Kuje ogo Ika bilto ti än Wäyo ti?" 50 Aŋ iken batta ükcïdï gïtï gin’a kiindeeda kä ye. 51 Aŋ Ike ḍukcin Naacira ke iken, aŋ iken tiiŋkätä. Aŋ meen waak yaakka muure ḍoocce jone ti. 52 Aŋ Yeecüwa pïr kä ŋäjjin aŋ tälit aŋ käñit ŋerrä Jooŋ ti ke mäbaan ti.