1 Aŋ Yeecüwa däämjin aŋ yurcin ceeggï iccinni yeeken ḍooccutu arwal iccinni jï. 2 Aŋ Ike yurcin boro anconḍe ḍuccin tiilgälen kä yewwe.

3 Aŋ Yeecüwa jaajjin ogo, "Ikee kiine a gïtken, boro anconḍe yaanni ḍuccin kä ḍiräk kä iken muure. 4 Kä yaana iken muure iccene kä yeeken yaaka a büccïnï ye ti, aŋ ike iccin kä annä yeene waak yaaka bilti muure üṇṇü yeene ti ye."

5 Aŋ wääna yakkalaŋ jaayene kä ogo änlaṇṇä ye, aŋ ogo tooton ko guygu ŋerken ke iccinni Jooŋ ti. Aŋ kiini Yeecüwa ogo, 6 "Kä wakkä yaaka yoodde yaakka nïïnkä bi ätä yaana baati ŋuca guṇṇan yaŋkalaŋ winni menen wic yaana batta bi ḍüümgü me gïtï ye."

7 Aŋ Ike taaji ogo, "Nüüto, waak yaakka bi näŋï ḍuuggen tooku? Aŋ a ŋaaka ken bi a gin’a nüütï ye, naana waak yaakka näŋï ḍuuggen ye?"

8 Aŋ Yeecüwa jaajjin ogo, "Waŋgic tïïce, ŋana ikee yääyte me. Me ḍiirken bi ätä kä yäṇtonḍi aŋ bi jayok ogo, ‘Ika agä Macii,’ aŋ jayok ogo, ‘Aŋ waan cokilin!’ Aŋ iken ŋana baadde. 9 Aŋ naana ikee tiŋde yääñdaŋŋi ke juwin yääñdaŋŋi ye, ŋana ikee booje, yaakka por bi näŋï ḍuuggen, aŋ düüñïn batta bi ätä kä bïraŋ."

10 Aŋ iken kiinne ogo, "Ṭoŋ bi juwu kä yiñ ṭoŋ ti, aŋ yätkïtïn bi juwu kä yiñ yätkïtïn ti. 11 Aŋ buktuŋ nänkä yäwconḍe ke kääjgä ke rackïtïnnï yaacken nänṭä muure, ke waak’a me yämtä ke waak’a nüütï yäwaŋ polloŋ jï ye, bi näŋï ḍuuggen.

12 "I batta por yaakka muure iken bi ïnken äcänä ikee ti, aŋ ikee putkene gïtï aŋ ikee ice me däŋkämalläni yek Yühüüṇṇï ti ke gaŋgarri gïtï. Aŋ ikee bi ice yätkäni ñomgen ti ke mügdoni ñomgen ti kä yäṇtonḍi. 13 Aŋ yaanna bi wäätï a waan yeenic yaana päkke daa kä ye. 14 Ŋana ikee ïïjjede payde jiik gïtkïc ogo me bi luugje ogoo. 15 Ikee bi iñe jigärgä ke ŋäjjin yaaka batta lïïlgä ädäŋŋi yeekic muure kä büldïn ke yüüllü ŋïngïn ye. 16 Ikee bi ääkkene ŋätin wäygä ke migä ke mädgä ke mä yeekic ke muggic aŋ mäkkalaŋ bi näkä me ḍugin ikee ti. 17 Me muure ikee bi putkene gïtï ogo yäṇtonḍi. 18 Aŋ baati jiikcan yen witkic yaana bi yääy ye. 19 Aŋ kä wääctäŋ yeenic ikee bi käñe üṇṇü.

20 "Aŋ naana ikee yuṭṭe Oorcalïïm ḍiigi ti kääygä ye, i wäättan ooke gïtï ogo ḍüümtin cokolono. 21 Aŋ dale m’aka baan Yühüdïya jï ye, lüdok pämkä witin. Aŋ dale m’aka Oorcalïïm jï ye kaacï woo, aŋ dale m’aka woo käpet ye ŋana kaaccïdï ti. 22 Aŋ yaakki bi wäätï a nïïnkä yek woṇṇu wic yaaka ḍääkit jiik’a a pergin kä Meeŋka Jiik Jooŋ ye. 23 Aŋ bi yaajaŋ kä yaac määngä yaaka lacok ye ti ke yaaka nïïtï nïïnkä yaakca ti ye. Aŋ yiñ bi yäwaŋ kä yaac ŋommañ wic aŋ piinkä yäwken mäbaan yaakki ti. 24 Aŋ iken näkä me ḍugin kä gaaḍal aŋ bi müükü ṭoŋ muure, aŋ Oorcalïïm bi määrjänä ïñï boorgu ke waan yen boorgu düüñe.

25 "Aŋ wïca waak’a nüütï ye bi wäätï äŋ ti, aŋ paan ke kirkä ti, aŋ ŋommañ wic ṭoŋ bi cääjjï tïñïdïn gïtï kä buktuŋ pii. 26 Mäbaan bi juuggen päyok kä gin’a äätïdï ŋommañ wic muure ye. Aŋ teynäni yek polloŋŋi bi bükcï. 27 Aŋ iken bi yürcï Minneni Mänbaan äätä curŋu gïtï kä teynä ke gällä yäwconḍe. 28 Aŋ naana waak yaakka näŋŋä ḍuuggen ye, i yuute ñaalok aŋ witkic ääre ñaalok nääŋka teetcin woo yeenic cokulenee kä ye."

29 Aŋ pääjgene gäärrä ogo, "Däämje jaan yaana beel bata ŋoommu ye ti, ke jengä yaakca ti muure. 30 Aŋ kä bïraŋ aŋŋi naana gitke ŋiimmin ye, i ikee kä ḍuuggic yurte aŋ ŋïjde ogo yïltüke cokolono. 31 Aŋ cäänna naana wakkä yaakka näŋŋä ḍuuggen ye, i ŋïje ogo Yätkïtïn yen Jooŋ cokolono. 32 Aŋ ikee kiine a gïtken, kil yaanni batta bi kaacï woo ke waak yaakka näŋene ḍuuggen muure. 33 Polloŋ ke ŋommañ bi wïïcï ïñï, aŋ jiik yeeki batta bi wïïcï ïñï.

34 "Ḍuuggic daame, ŋana juuggic bääggede ḍälaŋ kä wakkä yaaka a waanjï ke maaṇṇä aŋ ŋana ikee piilge üṇṇü yaanni, nïïnnä yaanja ikee bi oje yokïn bata wïïṇṇan i batta ŋäjje, 35 aŋ bi ätä m’aka cäyok ŋommañ wic ye ti muure. 36 Aŋ cääye dääme kamat. Aŋ mäṭe nuŋko tejje kä ïñï aŋ lïïṭe kälce kä woo kä wakkä yaaka atï näŋit ḍuuggen yaakka ti muure, aŋ yuute kä Minneni Mänbaan ñome ti."

37 Aŋ nïïnkä muure Ike nüütï änlaṇṇä ti, aŋ biigin ti aŋŋi Ike ḍükcïdï nïïn pääm yaana wiñe a jengä jeytüünni ye wic. 38 Aŋ kä tïṇṇäŋänä me muure äätin änlaṇṇä ti tiŋit Ike ti.