1 Aŋ Poñ Bïggï Cotku cokulin ti, yaana battä me ogo Poñ Kaaldin Wic ye. 2 Aŋ ḍuuŋku däŋkä ke nüütoni jiik ḍoocin määjï päy ogo Yeecüwa nägjï ḍok, aŋ bojgin kä mäbaan.

3 Aŋ Wiñ yen Meŋkeekeni kaaccä Yahüüja yaana battä me ogo Garyüütï ye ti, aŋ ike a baaddoni yaaka kä caay witken kä yew ye ti yaŋkalaŋ. 4 Aŋ ike kaaccä woo aŋ jiik ḍooci ke ḍuuŋku däŋkä ke tïïconi yek änlaṇṇä ogo Yeecüwa müükkïï dako ogoo. 5 Aŋ iken juuggen ñappä aŋ jiik ḍooci ogo ïñjï tiil. 6 Aŋ ike gïmmïn aŋ uccin kä maawnä waan ogo müükkïï dako naana ṭoŋ baawgo ti ye.

7 Aŋ nïïnnä ḍäägin yen Poñ Bïggï Cotku yaana iṭene me kabal yaanele yen Poñ Kaaldin Wic ye. 8 Aŋ Yeecüwa Bütürüc ke Yuhanna tucce aŋ kiinne ogo, "Ate aŋ tute amma Poñ Kaaldin Wic amïn."

9 Aŋ taaji ogo, "Ïkï ṭäkä toodon wa?"

10 Aŋ luuŋŋe ogo, "Naana ikee kaacce ti baan jï ye, ikee bi purje ke oon kalaŋ ädit wäl piik. Aŋ baate ŋäc ke än yaana kaaccedee kä jï ye. 11 Aŋ män än nüütke ogo, ‘Nüüto jääyïdï ogo, "Wali än yen wilgä yaana ämä kä jï amma Poñ Kaaldin Wic ke baaddoni yeeki ye?"’ 12 Ikee bi nüütke än jïñe mooye ñaalok ḍaŋŋa a pïtkïnï jï, aŋ amma toode wïca." 13 Aŋ iken attä aŋ kañi bata yaana daa kiinene daa Yeecüwa ye, aŋ iken amma Poñ Kaaldin Wic toodi.

14 Aŋ wääna wuuŋ ḍäägenee kä ye, Yeecüwa cääjjin ïñï ammä ti ke tüüjgï yeeke. 15 Aŋ Ike jaajjin ogo, "Ika ṭäkä ämä amma Poñ Kaaldin Wic kä yaac ke ikee, i Ika batta mor wääcä pillä. 16 Ikee kiine, Ika batta bi ämä ŋuca ke ḍaake daa me Yätkïtïn Jooŋ ti."

17 Aŋ Ike kuññu ḍonṭule aŋ mäŋjin ñaalok, aŋ jaajjin ogo, "Yaanni koowe aŋ ñaage muurijaan. 18 Aŋ ikee kiine, Ika batta bi mäccä piik jaan yaana ṭulge belok bata lüütkon ye, ke Yätkïtïn yen Jooŋ ḍääge."

19 Aŋ Ike biŋŋan koowne aŋ mäŋjin ñaalok, aŋ wiṇṇe gïtï, aŋ jaajjin ogo, "A yori inni yaana äbi me ogo ikee ye. Naŋde aŋŋi payda kä."

20 Aŋ kä nääŋkä keelkä ḍonṭule koowne wääna ḍaŋŋene kä ammä ye, aŋ jaajjin ogo, "Ḍonṭule yaanni a yen puukin woo yïmgï ogo ikee aŋ a jiik ḍoocin kïccäŋgenen.

21 "Aŋ waŋgic tïïce, m’ana Ika ääkkada ŋäc ye, a m’ana ämï ke Ika ye. 22 Minneni Mänbaan bi tüw bata yaana daa ḍoocene daa me ye. Aŋ yaajaŋ oon yaana Ike ääkkätä ŋäc ye ti!" 23 Aŋ baaddoni yeeke jujjin kä tääjin pääken ogo ŋaani ken bi näŋo gin yaanna.

24 Aŋ cäänna riijin kääjin woo waadgen ti ogo ŋaani ken yäwoyäw. 25 Aŋ iken kiini Yeecüwa ogo, "Yätkäni yek ṭoŋ iken müktü, aŋ mügdoni ti battä ogo m’aka juuggen bowobow ye. 26 Aŋ ŋana beeljïdï aŋan ikee ti. Iiñca dale m’ana tälaŋ waadgic ti ye beeljï bata men ḍeerconḍe, aŋ woydo dale beeljï bata m’ana ñuugal ye. 27 A ŋaani ken yäwaŋ, a m’ana cääy ïñï ammä ti ye halla a m’ana ñuugal ye? Batta a m’ana cääy ammä ti ye halla? Aŋ Ika waadgic ti Ika beelä bata m’ana ñuugal ye.

28 "Aŋ ikee age m’aka yuddin ke Ika puuccinni yeeki ti ye. 29 Aŋ ikee iñe mügdïn bata yaana daa iñana kä Wäyo mügdïn yen Yätkïtïn ye, 30 nuŋko bi äme kä aŋ mäte kä nänṭä ba ammä Yätkïtïn yeeni ti, aŋ cääjje kä nooŋŋi yek mügdïn ti, güte äärgä tüggen yek mä Icärayiil yaaka kä caay witken kä yewwe ye ti."

31 "Ïkï Camaan, Camaan, Wiñ yen Meŋkeekeni ṭäkï ikee wäälede woo bata päk. 32 Aŋ Ika mäṭṭä kä ïkï ogo luggin yüünü ŋana ḍimmodo, aŋ naana ïkï ḍuukini ŋäjäk ye, i mädgic bi teeyä yokïn."

33 Aŋ Camaan jaajjin ogo, "Men mooye yeeni, ika yori agä yükkïnï kä wään ke Ïkï gaŋgar jï ke tüwnü ti."

34 Aŋ Yeecüwa jaajjin ogo, "Ïkï kiineni Bütürüc, i toon batta mor weekcï tiññaŋ Ika bi reecca woo ääŋkü kä ḍäk ogo Ika kujjada."

35 Aŋ iken taaji Yeecüwa ogo, "Wääna tucce kä woo i ḍïïggï tiil baawgene ti ke kücümgü wään ke waygä ina, ikee buunne ginkalaŋ?"

Aŋ iken luukcin ogo, "Ba’ay."

36 Aŋ kiinne ogo, "Aŋ tiññaŋ dale m’ana cääyge ḍeggon tiil ye koowe ke kücam wään. Aŋ dale m’ana batta cääyge gaaḍal ye buruŋgu yeeke yääjje woo aŋ kijee kä. 37 Ikee kiine, meeŋka bi ḍaakä me kä Ika ogo, ‘Ike a pakon ti ke mäddoŋŋi.’ Aŋ gin’a a pergon ogo Ika ye näŋit ḍoŋe."

38 Aŋ iken jaajjin ogo, "Pïṭo, yooru gaaḍalli ikki kä yew."

Aŋ kiinne ogo, "Ḍaŋŋä aŋan!"

39 Aŋ Ike kaaccä woo aŋ attä bata kamat pääm yaana wiñe a jengä jeytüünni ye ti, aŋ baaddoni yeeke bäätcin Ike ti. 40 Aŋ wääna Ike ḍäägenee ti nänṭä ti ye, i baaddoni yeeke kiinne ogo, "Mäṭe nuŋko ŋana ḍimjede puuccin gïtï."

41 Aŋ Ike wükcïn woo iken ti bata waan yen yiipcin guṇṇan, aŋ ḍüŋjïn ïñï aŋ mälcin ñaalok ogo, 42 "Wäyo, naana Ïkï ṭäkä ḍonṭule wääctäŋ yaanni koowdu Ika ti ye, batta kä ṭäktäŋ yeeni dalä wäätï kä ṭäktäŋ yüünü." 43 Aŋ wïca malak yaŋkalaŋ üükïn woo ñaalok polloŋ jï Ike küümgï kä teynä. 44 Aŋ Ike cääy ḍürjïn mooye gïtï aŋ kääccin kä mallä kä jone muure ke cannä yeeke ḍeme ŋomgu gïtï belok bata yïmgä.

45 Aŋ wääna Ike juwenee kä ñaalok mallä ti ye, Ike äätin baaddoni yeeke ti aŋ kaññe a ootin a bägin kä nüüjdüŋ. 46 Aŋ iken kiini ogo, "Ikee age ootin ina? Juwe aŋ mäṭe nuŋko ŋana ḍimjede kä puuccin gïtï."

47 Aŋ wääna Ike mor iiñjedee jaayee kä ye, i ṭoŋ äätin, aŋ oon yaana battä me ogo Yahüüja, yaana a baaddoni yaaka kä caay witken kä yewwe ika ti yaŋkalaŋ, ken iken woytu, aŋ wükcïn ti Yeecüwa ti kä cokal ṭäkï muckede gimgin.* 48 Aŋ Yeecüwa ike kiini ogo, "Yahüüja, Minneni Mänbaan ääkkädä ŋäc kä muckin gimgin?"

49 Aŋ wääna baaddoni yeeke yaaka cokulaŋ ti Ike ti yuṭṭene kä gin’a näŋit ḍoŋe ye, i iken jaajjin ogo, "Pïṭo, iken tuujgon ti kä gaaḍalli?" 50 Aŋ yaŋkalaŋ iken ti kiingon ḍuuŋgon daaŋ küülconḍe gitke birrä tocce woo.

51 Aŋ Yeecüwa jaajjin ogo, "Ḍaŋŋä aŋan!" Aŋ oon tamme gitkin aŋ ṭeññä.

52 Aŋ Yeecüwa jaajjin ḍuuŋku däŋkä ti ke tïïconi yek änlaṇṇä ke me mäyken ti yaaka kääjin woo kä yiñ Ike ti ye ogo, "Ika agä mäddok yaana kääckada kä woo kä gaaḍalli ke läcäŋgä yaanni? 53 Aŋ nïïnkä muure Ika ke ikee änlaṇṇä ti, aŋ ikee ïnkïc batta age icin Ika ti. Aŋ wuuŋ yeenic inni nuŋko mïïllä mükee kä."

54 Aŋ wäättan iken Ike mügï aŋ wooyi än yen ḍuuŋgon daaŋ küülconḍe ti. Aŋ Bütürüc baadit kä utar. 55 Aŋ wääna iken kütcene maañ ṭeejjük kaal jï ye, i iken cääjjin ïñï nänṭä keellä, aŋ Bütürüc cääjjin ïñï waadgen ti. 56 Aŋ ṭuulle yaana ñuugal ye ike yoori kä yaana cääyee kä diktäŋ ti ye, aŋ ike daami kä cokal kuckon aŋ jaajjin ogo, "Oon yaanni ke Yeecüwa cäänna."

57 Aŋ ike riccin woo aŋ jaajjin ogo, "Iiŋ, Ike kuju."

58 Aŋ kä ḍeeraŋ aŋŋi mäŋkalaŋ ike yoori aŋ jaajjin ogo, "Ïkï cäänna agä iken!"

Aŋ Bütürüc jaajjin ogo, "Mugo, ika batta ke iken!"

59 Aŋ wääna wuuŋ näŋŋee kä keelok ye i mäŋkalaŋ ŋuca jaajjin ogo, "A gïtken, oon yaanni ke Ike, aŋ cäänna ike a män Jalïïl."

60 Aŋ Bütürüc jaajjin ogo, "Mugo, batta ŋäjjä ïkï jaayä ogo ŋaaka!" Aŋ ojana wääna ike jaayee kä ye i toon weekcin. 61 Aŋ Pïṭo yore yalle aŋ däämjin Bütürüc ti. Aŋ Bütürüc päjjin jiik yek Pïṭo yaaka kiinneeda kä ye ogo, "Tiññaŋ i toon batta mor weekcï Ika bi reecca woo ääŋkü kä ḍäk." 62 Aŋ Bütürüc kaaccä woo aŋ weeŋŋä kä kec.

63 Aŋ ook yaaka tïïcï Yeecüwa ye, Ike ñiyge yok i giipä. 64 Aŋ kümï waŋgin aŋ tactä ogo, "Nüütkoon! A ŋaani ken Ïkï gemmey?" 65 Aŋ jaygin wakkä kä ḍiräk kä yiñ Ike ti, i aammänä yok.

66 Aŋ wääna nïïnnä ḍäägenee kä ye, woydoni yek Yühüüṇṇï yoken ḍülï nänṭä keellä, ḍuuŋku däŋkä ke nüütoni jiik ḍoocin. Aŋ iken Ike kïïtï woo icä nänṭä cääjjin ïñï yeenen ti. 67 Aŋ iken jaajjin ogo, "Naana Ïkï agä Macii ye, nüütkoon."

Aŋ Ike jaajjin iken ti ogo, "Naana ikee nüütke ye, i ikee batta bi gïmme. 68 Aŋ naana ikee taaje ye, i Ika batta bi luuga. 69 Aŋ tiññaŋ Minneni Mänbaan bi cääjjï nänṭä teynä buŋ birrä yen Jooŋ ti."

70 Aŋ iken muure tääccin ogo, "Ïkï agä Minneni Jooŋ?"

Aŋ Ike luukcin ogo, "Ikee jaaye ogo Ika."

71 Aŋ iken jaajjin ogo, "A yoorru yaana wali ye ken ṭäkkïn ŋuca? Ïkïïn tïïŋŋïn kä gitko Ike lemme ti."