1 Aŋ wäättana Yeecüwa attä bänkä mäyken ti ke bänkä lïcken ti, päkï Jiik Ŋerkä yek Yätkïtïn Jooŋ. Aŋ tüüjgï yeeke yaaka kä caay witken kä yewwe ye ke Ike, 2 ke määngä yakkalaŋ yaaka cääygene kä wääktäŋŋi yaackä ke rackïtïn ye ṭeeññe. Aŋ Märïyam yen mä Majdalïïna a yaana ñuuṭenee kä woo meŋkeekeni kä ŋaṭükel ina, 3 aŋ Aanna iŋ Koojï a m’ana a müükkïdïnï wakkä än jïñe yek yätkä Ïïrüüdüc ye, aŋ Cüjaan ke meken yakkalaŋ ḍiräk yaaka iken yüükkütü ti kä wakkä yeeken ye.

4 Ääŋkalaŋ ti ṭoŋ yek bänkä yoken ḍülï kä ḍiräk, aŋ duurin Yeecüwa ti, aŋ nüütkene gäärrä yaanni ogo, 5 "Pïïto attä woo mäpï käwkä yeeke. Aŋ wääna mäpee kä ye, käwkä yakkalaŋ ḍiimdin ïñï päy jï aŋ määrji me ïñï aŋ ami ḍïïrgä. 6 Aŋ yakkalaŋ ḍiimdin ïñï karkar gïtï, aŋ wääna yüülene kä woo ye, batta a käñin piik, aŋ ïwnä. 7 Aŋ yakkalaŋ ḍiimdin ïñï küügü gïtï, aŋ yüülïn ñaalok ke küügü aŋ käwkä mäji pugin. 8 Aŋ yakkalaŋ ḍiimdin ïñï ŋommañ ŋerrä jï, aŋ yüülïn ñaalok aŋ ääcin woo käwkä ääŋken caykä kä caay." Aŋ Yeecüwa yaajjin ogo, "M’ana cääyge gitke ye, dale tïïŋï aŋ ooke gïtï!"

9 Aŋ taaji baaddoni yeeke ogo, "Gäärrä yaanna jaay ogo ŋaaka?" 10 Aŋ luuŋŋe ogo, "Ŋäjjin yen jiik paangin yokïn yen Yätkïtïn Jooŋ iñene kä me. Aŋ mäkkalaŋ nüüdü kä gäärräni, nuŋko meeŋkani ḍääkene ḍuuggen,

‘aŋ naana daamgä ye, i batta yoottu,

aŋ naana tiŋtä ye, i batta ookcutu gïtï.’"

11 "Gäärrä yaanni ogo aŋŋi, käwkä a Jiik Jooŋ. 12 Yaaka ḍiimdin ïñï päy jï ye, a m’aka tiŋit Jiik Jooŋ aŋ booŋïn ätä, aŋ koojje woo juuggen ti nuŋko ŋana lukkete aŋ ŋana käñdene määgin woo. 13 Aŋ yaaka ḍiimdin ïñï karkar gïtï ye, a m’aka tiŋit Jiik Jooŋ aŋ gïmkätä kä jon ñamme ye, aŋ iken batta cääyge bïcäŋgä, lüggïdï kä ḍeeraŋ, aŋ naana puuccin ätä ye, i ḍükcï ŋäjäk. 14 Aŋ yaaka ḍiimdin ïñï küügü gïtï ye, a m’aka tiŋit Jiik Jooŋ, aŋ nuuygu ŋïngïn cäwdä yen paydin jiik gïtken ke cekkïtïn ke ŋerräni, aŋ batta ääcïdï woo käwkä. 15 Aŋ yaaka ḍiimdin ïñï ŋommañ ŋerrä ti ye, a m’aka tiŋit Jiik Jooŋ aŋ tïïcä juuggen ti kä eemdin aŋ kä jon ŋerconḍe, aŋ äcä woo käwkä kä jon teyne."

16 "Aŋ baati m’ana diko paaŋe aŋ küme wic kä arwal halla ḍooce bür jï ye. Ike ṭääkcï diko ḍooce nänṭ’a yuddee kä ye, aŋ yoorgu m’aka kaaccïdï äräk ye. 17 Aŋ baati gin’a a paangon yok aŋ batta bi ükü woo ye, aŋ baati jiik’a tïïcä me juuggen ti, aŋ batta bi ükü woo aŋ ŋäjjänä me ye. 18 Aŋ waŋgic tïïccede naana ikee tiŋde ye, m’ana cääyge ginkalaŋ ye, bi ŋuckunu me ti, aŋ m’ana batta cääyge ginkalaŋ ye, i yaaka ḍooje ogo yeeke ye, bi ärge daa me yokïn."

19 Aŋ Yeecüwa meen ke mädgen äätin ükcïdï Ike, aŋ batta a lïïṭïn ḍakin ti kä ḍiirin ṭoŋ. 20 Aŋ kiini mäŋkalaŋ ogo, "Miic ke mädgic ika yudok üṇtük yaakca ogo Ïkï yoorjïda."

21 Aŋ luukke ogo, "Miyo ke mädgo iken a m’aka tiŋit Jiik Jooŋ aŋ ñuugelene ye."

22 Aŋ ääŋkalaŋ ti Yeecüwa baaddoni yeeke kiinne ogo, "Juwe koon mooye eṭïn woo kä taaŋŋañja." Aŋ iken taappä kuun jï aŋ ircin woo. 23 Aŋ Yeecüwa oodi kuun jï i iken atï. Aŋ jommuwiingä küütïn koon mooye jï, aŋ kuun cokilin yaana küümee kä piik ye, aŋ iken cääjjin yiñ gïtï. 24 Aŋ baaddoni yeeke kaaccä ïñï Ike ti aŋ cuujgi aŋ kiini ogo, "Mügdo, Mügdo! Ïkïïn ḍaŋŋa müñïn!" Aŋ Ike juwin aŋ jommuwiingä gerre ke buktuŋ piik, aŋ yuuttu ïñï yore luujgene. 25 Aŋ taaji Yeecüwa ogo, "Luggin yeenic wali?" Aŋ iken bojgin aŋ witken ḍiiktin, aŋ luugjin pääken ogo, "A ŋaani inni jommuwiingä ke piik ingene aŋŋa jiik yeeke tiiŋge daa yaakka?"

26 Aŋ iken ḍakkä ti baan yen mä Jadarayïïn ti, aaygon Jalïïl taaŋŋañja. 27 Aŋ wääna Yeecüwa kääjenee kä woo aaygon ye, pärjin ke oon yaŋkalaŋ näkä meŋkeekeni aŋ a män baan yaanna, aŋ cääyge nïïnkä kä ḍiräk batta eŋit buruŋgu, aŋ batta cääy paa, cäwdä yeene a kälkä witin. 28 Aŋ wääna Yeecüwa yooṭṭeeda kä ye, yaajjin aŋ ḍïmmïn ïñï kïïge ti aŋ yaajjin kä yaac ogo, "Yeecüwa, Minneni Jooŋ yaana Küülaŋ kä Yaac ye, a ŋaaka ken ṭäkkä ika ti? Buuckaa ḍok, ŋana ika joojja!" 29 Ina jaajjee kä aŋan yaanna a yaana Yeecüwa wääktäŋ yaaññä kiinnee daa kä ogo kääjo woo ike ti ye. Ike kamat batta wääkkätä yok wääktäŋ yaaññä. Aŋ ḍiikä me kä wingä ke wingä bïlkä aŋ tïïcä me, aŋ ike wingä muureen iire gïtï, aŋ ictä meŋkeeke woo käpet.

30 Aŋ taaji Yeecüwa ogo, "Ïkï batti me ogo ŋaani?" Aŋ ike luukcin ogo, "Lïjïyoon," nääŋka meŋkeekeni kaaccene yore ti kä ḍiräk ye. 31 Aŋ Yeecüwa malgä kä yaac ogo ŋana iken ïngïdïï aŋ ñoolcïdïi tulluŋ ti. 32 Aŋ kutuŋgu yakkalaŋ ḍiräk kuckon kääjï pääm wic. Aŋ meŋkeekeni Yeecüwa malgä yok ogo iken ato kaaco kutuŋgu ti, aŋ gïmgene. 33 Aŋ wääna meŋkeekeni kääjene woo men ti ye, attä kaaccä kutuŋgu ti, aŋ kun yen kutuŋgu düürjïn ïñï koon mooye jï aŋ bügjïn piitti aŋ müññü. 34 Aŋ wääna nääŋkä yaakka yoorene daa m’aka kääjï ye, iken buurcin woo attä me nüütkütü baan mooye jï ke bänkä ṭulgen ti. 35 Aŋ mäbaan kaaccä woo atï ükcïdï gin’a näŋŋä ḍoŋe yaanna. Aŋ iken äätin Yeecüwa ti, aŋ m’ana meŋkeekeni kääjin woo ike ti ye, wääti cääy ïñï Yeecüwa ñome ti, i eŋit burŋu, aŋ wääti wiñe a tütcïnï, aŋ iken mügï yokïn liin. 36 Aŋ m’aka yuṭṭu ye, iken nüütkï m’ana cääyge meŋkeekeni yaanna ṭeeñi Yeecüwa ogoo. 37 Aŋ mä baan yen Jadarayïïn Yeecüwa malgä ogo wükco woo iken ti, iken mügï yokïn liin kä yaac. Aŋ taappä kuun wina aŋ ḍukcin. 38 Aŋ m’ana meŋkeekeni kääjin woo ike ti ina, Yeecüwa male ogo iken ato ke Ike. Aŋ tuci Yeecüwa aŋ kiinne ogo, 39 "Dukcu paa me nüütkü nääŋkä yaaka näŋgini kä Jooŋ ye." Aŋ men attä päkï baan jïñe ti muure me nüüde kä nääŋkä yaaka näŋgene daa kä Yeecüwa ye.

40 Aŋ wääna Yeecüwa ḍukcenee kä ye, paaki ṭoŋ kä jon ñamme kä yaana keeyge daa kä me muure ye. 41 Aŋ mäŋkalaŋ äätin Yeecüwa ti battä me ogo Yaayric, a wiñ yen daaŋmallä yen Yühüüṇṇï, aŋ ḍüŋjïn ïñï Yeecüwa ñome ti aŋ Yeecüwa ñujgene yok ogo ääto än yeene ti. 42 Nääŋka ṭuulle yeene dune yaana yuunge kä caay witken kä yewwe ye tüwee ye.

Aŋ wääna Yeecüwa atee kä ye, mïṭï me ñaalok. 43 Aŋ wïca iiŋ yaŋkalaŋ cääyge yuungu kä caay witken kä yewwe i yïmge püükï. Aŋ batta a käñon m’ana ike ṭeeñgä ye. 44 Aŋ wükcïn ti kä Yeecüwa ŋäñe ti, aŋ burŋu yeene tüke tamme yok, aŋ yïmgä witken eṭi ojana.

45 Aŋ Yeecüwa tääccin ogo, "A ŋaani ken Ika tamma yok?"

Aŋ wääna iken riccin woo muure ye, i kiini Bütürüc ogo, "Nüüto, ṭoŋ Ïkï mïṭïnï ñaalok aŋ Ïkï tïñïnï yok."

46 Aŋ Yeecüwa jaajjin ogo, "Mäŋkalaŋ Ika tamma yok, näkkänä teynä kääjin woo Ika ti." 47 Aŋ iiŋ wääna yore yoorreeda kä ye, i jone batta agee kä lïïlgon kä paannä yok Yeecüwa ti, äätin i yore tïïcïdï, aŋ ḍüŋjïn ïñï kïïge ti. Aŋ nüütkene me ñomgen ti muure Ike taptä yok ina aŋ ike ṭeññä kä bïraŋ ogoo. 48 Aŋ kiinne ogo, "Ṭuul yeeni, luggin yüünü ïkï ṭeeññey, aŋ atä kä ŋïïbbïn."

49 Aŋ wääna jaayee kä ye, mäŋkalaŋ ätä paa ba' Yaayric, yaana a wiñ yen daaŋmallä yen Yühüüṇṇï ye, aŋ ike kiini ogo, "Ṭuulle yüünü tüwnü, ŋana yoku Nüüto lilgä gitkin."

50 Aŋ tiiŋi Yeecüwa, aŋ Yaayric kiinne ogo, "Ŋana ïkï booju! Luggu, aŋ ṭuulle yüünü bi ṭeñ."

51 Aŋ wääna ḍäägene ti paa ba' Yaayric ye, me ṭïïŋŋe kä kaaccin ti, a Bütürüc ke Yuhanna ke Yaagüüp ke ṭuulle wäyen ke meen pääken. 52 Aŋ me muure wegok ogo ṭuulle i nüüjï. Aŋ me kiini Yeecüwa ogo, "Ŋana ikee weege, ike batta a tüwon a ooton."

53 Aŋ Ike yirkätä me, ŋäjjänä ṭuulle a tüwon. 54 Aŋ ṭuulle müŋŋe kä ïṇte aŋ bärkene aŋ kiinne ogo, "Ṭuul yeeni, juwu ñaalok!" 55 Aŋ wääktäŋ yeene ḍuukin ti yore ti, aŋ ojana juwin ñaalok, aŋ Yeecüwa me kiinne ogo ïñjï me ginäämkä. 56 Aŋ wäyen ke meen witken ḍiiktin, aŋ iingene ogo ŋana mäŋkalaŋ nüütkïdï ko nääŋkä yaaka näŋŋo ḍuuggen ye.