Mfano wa Mzenzi mbozi
13 Munhu imwe mdibumbila da wanhu kamlongela Yesu, "Go Mfundaji, mulongele mkulu wangu chiibagulile uhazi wetu."
14 Mbali Yesu akamlongela, "Mbwigaangu, yalihi yanikile niye kuwemila hebu munhu wa kuwabagulila mweye uhazi?" 15 Amala Yesu akawalongela wanhu hao, "Itiganyeni na chila maya, manake ugima wa munhu wahabule mvinhu vingi yelinavo munhu."
16 Amala Yesu akawalongela uno mfano, "Mgunda wa munhu imwe mzenzi ulela ng’hani. 17 Baho akasonga kutonga mmoyo wake, akalonga, nhendeze? Manake habule hanhu hakwika ndia zinigobole. 18 Amala iyo mzenzi akalonga vino 'chino icho chonda nisang’hane, "Nobena magulu gangu na kuzenga gamwenga makulu ng’hani, naumo nike ndia yangu ya mlao navinhu vimwenga. 19 Labaho noilongela mwenyego,"Oo! muhe wangu, vino vinhu vinogile vingi uvikile gonelo kwa milao mingi, sambi muhe wangu humula uje na ung’we na kudeng’helela!’ 20 Mbali Mulungu akamlongela, ‘Gweye kwa mbozi! Lelo ichilo wolondeka muhe wako, Na ivo vinhu vose vuwikile mmane vokua vanani?’ "
21 Mchikomelezo Yesu kalonga, "Ivoili kwa wanhu woikila uzenzi wao wenyego, mbali habule chinhu Mulungu yachionile chinoga ng’hani."
Mtumanile mulungu
Matayo 6:25-34
22 Amala Yesu akawalongela waluko wake, "Sekemgae kwa mbuli ya ugima wenu, kua moja choni, hebu ng’huli zenu kua movala choni. 23 Kwa vija ugima unoga kubita ndia na lukuli unoga kubita vivalo. 24 Amala waloleni ndege hawahanda hebu kugobola, wabule gulu hebu hanhu hakwika ndia, mbali Mulungu kowalisa. Ivo mweye motogoligwa ng’hani kubita ndege! 25 Ivo yalihi kumwenu kwa kuigaza kodaha kuyongezela mwenyego ugima wake hata kwa saa dimwe? 26 Basi kama hamdaha kusang’hana mbuli ndodo kama iyo, habali muigaze kwa mbuli zimwenga? 27 Galoleni gago malua vigakula, hagasang’hana sang’hano hebu kuizinga, mbali nowalongeleni hata Mfaume Selemani yakalile na unovu mkulu, hapatile kuvazigwa goya kama lua ijo dimwe vidili. 28 Basi kama Mulungu kogeka vino gago mayani ga kumgunda, vija lelo gabaha mbali igolo gokwasigwa mmoto, che! honda yawasang’hanile mweye ng’hani! Mweye mli na nhogoli chidodo!
29 Mweye seke muhunganike mmoyo moja choni hebu mong’wa choni, ivija seke mdumbe kwa mbuli iyo. 30 Wamhazi wogaya ng’hani kuzambwila vinhu vino vose. Mbali Tata yenu yeli kuulanga kavimanya kua movilonda vinhu vino. 31 Ivo zambwileni tanhu Ufaume wa Mulungu na vinhu vino navo mokwing’higwa ivija.
Kuikila Uzenzi wa Kuulanga kwa Mulungu
Matayo 6:19-21
32 "Mweye bumbila dodo sekemdumbe, kwa vija Tata yenu kaona goya kuweng’ha uja ufaume wake. 33 Guleni vinhu mlinavo, amala zisente muweng’he vikumbi muyega. Ilukeni goya Mikadi ya sente seke idegeke, muuikile usigavu kuulanga kwa Mulungu, hanhu wabavi hawadaha kwiba hebu ving’onyo havidaha kuubananga. 34 Kwa vija haja hauli uzenzi wako, baho honda moyo wako hauli ivija.