Marcos 9

17 Baho munhu imwe kulawa mdibumbila ijo kamwidika Yesu, "Mfundaji, nimgala mwanangu kumwako, kana kinyamkela yomtenda yawe bubu. 18 Mala zose yahamwingila, komgwisa hasi na komtenda yalawe mahovu mmulomo, kuno koluma meno na komtenda yakakamale lukuli lose. Niwapula waluko wako wamlave chinyamkela iyo mbali hawadahile."

19 Yesu kawalongela, "Mweye ulelo ulibule tumanilo! Nokala na mweye mbaka lini? Nowafunyila moyo mbaka lini? Haya ngalileni hano mwana iyo." 20 Nawo wamgala mbwanga ija kwa Yesu. Bahaja Chinyamkela viyamonile Yesu, kamgela utamu wa kugwa mbwanga ija, kagwa hasi, kabimbilika kuno mahovu golawa mmulomo. 21 Yesu kamuuza tata wa mawana ija, "Mwanago kasonga lini kulawililigwa na utamu uno?"

Nayo tata wa mwana ija kamwidika, "Tangia haudodo wake. 22 Mala zimwenga chinyamkela komgwisa mwana muumoto, hebu mmazi ili yamkome. Mbali kama kodaha kutenda jojose, chokupula chionele bazi uchitaze!"

23 Yesu kamlongela, "Seke ulonge kama uhadaha! Gose godahika kwaija yomtogola Mulungu!"

24 Bahaja tata yake mwana ija kaguta nyangi kalonga, "Nhogola. Nhaze kuleka kutogola kwangu!"

25 Yesu viyaonile bumbila da wanhu woiting’hanila kwa wingi hamwake, kamkomhokela ija chinyamkela, kamlongela, "Gweye chinyamkela yuutenda mbwanga ino kua bubu na uswamagutwi, nokulongela umlekese mbwanga ino na seke umbwelele kaidi!"

26 Chinyamkela ija kaguta nyangi, kamgela utamu wa kugwa kwa ludabwa na kamlawa. Ija mbwanga kakala kama mtufi, ivo wanhu wengi walonga, "Kadanganika." 27 Mbali Yesu kamgoga mkono mbwanga ija kamwinula, nayo kenuka.