5 Ndizo Phethiro wakagadziwa mujele; koga gubungano letshipi lakawuntembezelela tjoselele kuNdzimu.
Phethiro Unosunungugwa Mujele
6 Busiku igo ntja Hherodi gwaaka ewhomuka ewundhusa, Phethiro waka alilele pakati kwebagwi bengwa babili, akasungwa neketane mbili, balindi baka bali pankoba bakalinda jele. 7 Linga, kwakakoboneka ntumwa waHe, kukapenya tjedza mun’umba yejele yose; akazunguza Phethiro nelubabvu ewumusa, eti, "Muka, libilidza." Ketane dzakawa dzibva pamaboko awe. 8 Ntumwa weNdzimu wakati kuwunli, "Mbala zwiyambalo umbale nembhatata dzidzo." Akathama sayikoko. Akati kuwunli, "Uzwipombele nejila lilo unditobele." 9 Wakabhuda akawuntobela; waka asingazibe kuti tjayetiwa nentumwa weNdzimu tjaka tjili lebeswa, koga wakakumbula kuti unobona tjilakidzilo. 10 Bakati bapinda balindi bekutanga nebebubili bakaswika pankoba wetshipi unongina munzi-nkulu. Wakahhulika woga, bakabhuda bakayenda, bakayenda bakatjuluka zila in’ompela; tjinyolotjo ntumwa weNdzimu akabe ewunsiya.
11 Kwakati Phethiro opedzisisa akati, "Ndatjibona kuti He watuma ntumwa uwe akandisunungula kubva mumaboko aHherodi nemuna kose kwakalingiligwa nemaJuta kuti kowhoyetikala."
12 Paakaziba kose ikoku wakayenda kun’umba yaMariya, mayi baJohane waka ana limwe zina linoyi Mako, paka pakakubungana banjinji betembezela.