Ntembezelo Webagalimoyo
23 Bakati balekedzewa bakayenda kubamwe babo bakanoleba kuti baphirisiti bakulu nebawhola batini kubali. 24 Bamwe babo bakati bekuwha, bakamilidzila mawhi abo panhu pan’ompela kuNdzimu betembezela beti, "He Wemasimba, imwi makathama kudzimu nehango negungwa, nezwinhu zose zwimukati. 25 Makalebeleka ngeMeya Yakayengemala, ngenlomo watate bedu Davida nlanda wenyu, muti,
" ‘Bataya bakamon’welani;
nebanhu banokumbulilani zwinhu zwisina n’hingo?
26 Bomambo behango banolangana,
nebatongi bakakubungana
begwisana naHe nange Wakahhodzewa waHe.’
27 Ngobe lebeswa Hherodi naPhontiyu Pilatu bakahangana panhu pan’ompela neBataya nebanhu beIsirayeli bamunzi-nkulu uno kuti balangane bagwise nlanda wenyu wakayengemala Yesu, wakahhodzewa. 28 Bakayeta tjakatjabigwa neluboko gwenyu nendongoloso yenyu ntolontolo kuti tjowhoyetikala. 29 Kwangwenu ke He, lingani hlihlidzila kwabo, bvumilani balanda benyu balebe dama lenyu basingahle, 30 pakutambunudza luboko gwenyu mutjidze banogwala, muyete nezwilakidzilo nemakaabadzo ngezina lenlanda wenyu wakayengemala Yesu."
31 Hule kwekusinobe batembezela, bugalo gwabaka bali muguli gwakazunguzika. Bose bakahhala Meya Yakayengemala bakasumikila dama leNdzimu basingahle.