Matewu 25

Tongwa Kwebupelo

31 "Hapa Nkololo wenhu obuya ali mugudzo lile, batumwa beNdzimu bose banaye, ipapo unowhogala patjigalo tjitje tjegudzo. 32 Njudzi dzose dzowhokubungana mbeli kukwe, iye unowhodzipalalanya senlisi ethewula mhwizi mumbudzi. 33 Unowhosa mhwizi kuludli gugwe, koga mbudzi unowhodzisa kulumehwe. 34 Mambo unowhoti kuna ibabo bakuludli gugwe, ‘Ihhani ngeno imwi bakakombolegwa baTate bangu, wamutjilani bumambo gwamakabaakanyigwa kubvila hango payakabumbiwa. 35 Ngobe ndaka ndinahhala mukandipa zodliwa, ndaka ndinanyota mukandipa vula, ndaka ndilimwezi mukandiwamutjila mumizi yenyu, 36 ndakandiyenda mbudlo mukandimbadza, ndakandigwala mukandikumba, ndaka ndili mujele mukahha kundili.’ 37 Bakalulama banowhohandula beti, ‘He, kati takamubona lini munahhala tikamupa zodliwa, kene munanyota tikamupa vula? 38 Takamubona lini mulimwezi tikamuwamutjila mumizi yedu, kene mulimbudlo tikamumbadza? 39 Takamubona lini mugwala, kene muli mujele timukumba?’ 40 Mambo unowhohandula eti, ‘Lebeswa, ndoti kumuli, sekwamakayeta kuwumwe untukunu wemakamu angu iyawa, makakuyeta kundili.’ "

41 "Unowhoti kuna ibabo bakulumehwe gugwe, ‘Yendani kutjena nami, imwi bakalongwa bhiso, muyende kumoto usingadzime, wakabaakanyigwa satane nebatumwa babe; 42 nekuti ndaka ndinahhala amuzondipa zodliwa, ndaka ndinanyota amuzondipa vula. 43 Ndaka ndilimwezi amuzondiwamutjila mumizi yenyu, ndilimbudlo amuzondimbadza, ndigwala nendilimujele amuzondikumba.’ 44 Banowhohandula bo beti, ‘He kati takamubona lini munahhala kene munanyota kene mulimwezi kene makati piti kene mugwala kene mulimujele, tikasamubhatsha?’ 45 Iye unowhobahandula eti, ‘Lebeswa, ndoti kumuli, sekwamusakayetila umwe ntukunu wayibaba, amuzokuyeta kundili.’ 46 Banowhoyendesewa kulangiwa kusigapele, koga bakalulama mubupenyu gusingapele."