Mateus 4

Likwa kwaYesu

1 Meya yakatungamilila Yesu kutjilambanyika kuti anolikiwa nasatane. 2 Hule kwekuti atjiyila zodliwa kwemahhuba ali makumi mana, siku nesikati, wakawha hhala. 3 Nliki wakahha kuwunli, akati, "Sayikoku uli Nkololo weNdzimu, laya mabgwe iyawa kuti ahanduke abe zwinkwa."

4 Koga wakahandula eti, "Kwakakwagwa kuti, ‘Nhu atowhotjila netjinkwa tjoga, koga ngelimwe nelimwe dama linobhuda munlomo weNdzimu.’ "

5 Satane akakowuntola akawuyendisa kunzi-nkulu wakayengemala; akawunghadza patjilungwane tjethempeli, 6 eba eti kuwunli, "Hapa uli Nkololo weNdzimu, uzwiposele pasi, ngobe kwakakwagwa kuyi,

" ‘Unowholaya batumwa babe nekuko,

banowhokubhata mumaboko abo

kuyetila kuti usikunhiwe nebgwe.’ "

7 Yesu wakati kuwunli, "Kwakakwagwa kakale kuti, ‘Usilike He Ndzimu uwo.’ "

8 Satane akawuntola kakale, akawunsa pehhugwi kwedombo lefulefu, akawulakidza bumambo gwehango dzose kose negudzo lago. 9 Eba eti kuwunli, "Kose ikoku ndowhokupa, hapa ungandikotamila ukandinamata."

10 Yesu eba ehandula eti, "Yenda kutjena Satane! kwakakwagwa kuti, ‘Nowhonamata He Ndzimu uwo, iye yega ndiye wawunowhohingila.’ "

11 Satane akawunsiya, batumwa beNdzimu bakahha bakawumbhatsha.