1 Mandâ ərə səkɔ, mə djî ə̈bə̈ ərə mata tshema ə̈bə̈ âgbɔ̂ ə̂kpû azü mâ lafɔ, ə̂në ə pâ əpʉ tə âgbɔ̂ ə pa:

«Aleluya! A tɔ̈lɔ Əyïlingû!

Əpʉ kə she azü lə kuzu

də kə mbe ətshe gâ ndə awlra sə̈ tə ənə̂ Ndjapä nə̂ əzə̂,

2 mbrə ə̂në aəpʉ kə wa ngbanga nə̂ ye sə tə djatra kə wa ngbanga

â sə də äwänə.

Tshə wâ ngbanga gâ pâ yashe ə̂trû nə

ə̂në tshə ndɨ̂ tshepashɔ də ə̂trû nə̂ ye nə ə̂në tshə mbrə̂ gâ ye kɔ,

â tshə wâ ngbanga ə̈ndjï alayïkosəra nə̂ ye gâ ye,

ə̂në tshə yû tshuku nə lə kəna ye kɔ.»

3 Ə̂kpû azü nə pâ kwatəndje ə pa:

«Aleluya! A tɔ̈lɔ Əyïlingû!

Ngâwo əwo ə̂në ə ju gala nə kɔ,

ə sə kə da o na ye gâ lafɔ piii!»

4 Bale, aâgbɔ̂ azü nə zazü bale amanə vəna nə də asorô nə vəna nə yɔ̂ gâ tə̂ ashɔ ə vrɔ̂ Ndjapä nə ə̂në tshə sə gâ tʉ gâ pâ mbata ngerə nə kɔ ə pâ: «Asərəmə! A tɔ̈lɔ Əyïlingû!»

5 Ə̈bə̈ tshema tô lə mbata ngerə nə ə pâ əpʉ ə pa:

«E tɔ̈lɔ Ndjapä nə̂ əzə̂,

e-e nɔ̂ də̂ alayïkosəra nə̂ ye,

e-e ə̂në e kpe rawa ye kɔ,

aəngʉ azü də aâgbɔ̂ əndje!»

6 Mə djî ə̈bə̈ ərə mata tshema âgbɔ̂ ə̂kpû azü, mata əsərɨ âgbɔ̂ ə̂ngû, mata əkɨ âgbɔ̂ kə lea yavrɨ, ə̂në ə pâ:

«Aleluya! A tɔ̈lɔ Əyïlingû!

Mbrə ə̂në Əyïlingû, Ndjapä nə̂ əzə̂, tə Âgbɔ̂ Əyïworɔgbɔ,

zâ əpʉ ngerə nə̂ ye tɔ gâ lafɔ gâ ye.

7 A dü ə̂rû, tshelə əzə̂ mɔ̈,

a mbë ətshə!

Mbrə ə̂në alɔ sandaga kə to yashe nə̂ Aya Ndalimi nə lî gâ ye,

â yashe nə ə̂në tshə kê ətshə gâ ye kɔ,

tshə gâmba tə̂ ye gâ ye.

8 Əndje zâ äwä kə yashe nə ndə kə pa tshə yi ləba

ə̂në əndje mbrə̂ kʉ də lanə kɔ, ə̂në ə tshe ə tshe kɔ gâ ye.

Ləba lanə nə kə də̂ aərə ə̂në azü nə̂ Ndjapä nə ə mbrə də äwänə kɔ.»

9 Trawaya nə̂ Ndjapä nə pâ kə əmə ə pa: «Tä ə pa: "Ənə̂ əndje tə ə̂rɔ̂nə, azü ə̂në əndje ê əndje ndə rəgo sandaga kə to yashe nə̂ Aya Ndalimi nə kɔ!"» Bale, mandânə, tshə pâ kə əmə ə pa: «Adja djera aəpʉ nə̂ Ndjapä kə sə̂.»

10 Bale, mə tê gâ tshekudu ye ndə kə pa mə vrɔ tə̂ əmə gâ ətshi ye, bale tshə pâ kə əmə ə pa: «Mbə̈ mbrə̈ rə ne! Mə sə kʉ tə gbɔbəngâ zə də əyïkosəra də gbɔbəngâ alaye zə ə̂në əndje pa ndəma Jezu kɔ. Vrɔ̈ tə̂ zə gâ ətshi Ndjapä!»

Mbrə ə̂në djatra kə pa ndəma Ndjapä nə kə də̂ kə pa əpʉ nə̂ Jezu gashu.

11 Bale, bə pa bə dji, mə wû tshelafɔ ə krɔ̂ â ə̈bə̈ ə̂mbî mbrata wûtu. Ətshə ə̂në tshə ô gâ pâ ye kɔ, əɨrɨ ye kə də̂ «Awombrə ndəma ye» gâ ndə «Awopa djatra əpʉ». Tshə sə kə wa ngbanga ə tɔ kowɔ də äwänə. 12 Andila ye sə mata əwo ə̂në ə tshe ə tshe kɔ, â akpɔtɔ ngerə ngba ə ngba tə̂ akrɔ ye. Əndje tâ ə̈bə̈ əɨrɨ gâ tə̂ ye, ə̂në ə̈bə̈ əzü bale wusə̂ nə nə wu ne kɔ, bale ətshə tshî kə wusə̂ nə. 13 Tshə yî ə̈bə̈ ləba ə̂në əndje yî gâ lə ə̈ndjï. Əɨrɨ ye kə də̂ «Əpʉ Ndjapä». 14 Atrugu ə̂në əndje sə mâ lafɔ kɔ, əndje sə̂ kə za äwä ye na na ye pâ aə̂mbî ambrata, ə yî aə̂mbî aləba ə̂në əndje mbrə̂ kʉ də ə̂rɔ̂ lanə kɔ. 15 Ə̈bə̈ ə̈ngrʉ̈ kamba ə̂në ama nə ki ə ki kɔ wûtu lə ama ye gashu, ə̂në tshə lï ndə kə pa tshə da aəgɔ də nə kɔ. Ətshə kə yisə̂ äwä kə əndje də tshɔngblɔ kowɔ je. Ətshə kə sə kə do tshelə aə̂lê vinyə lə əgerə tshelə əkpʉ kə pʉ tshelə aə̂lê vinyə âgbɔ̂ əkɔ nə̂ Ndjapä nə, tə Âgbɔ̂ Əyïworɔgbɔ. 16 Ə̈bə̈ əɨrɨ ə̂në əndje tâ kɔ sə tə̂ ləba nə̂ ye də tə̂ ə̈kü ye, ə̂në ə pa: «Əyïngerə nə̂ alayïngerə də Âgbɔ̂ Əyïngerə nə̂ aâgbɔ̂ alayïngerə nɔ̂.»

17 Mandânə, mə wû ə̈bə̈ trawaya nə̂ Ndjapä ə̂në tshə kâ gâ lafɔ lə alɔ. Tshə tâ râwâ tə̂ ayanu nɔ̂ ə̂në əndje sə̂ kə rɨ mâ ngâ lafɔ kɔ ə pa: «E nä gâ əmə ə ngbö tə̂ e gâ tə̂ nə mbrə âgbɔ̂ rəgo nə̂ Ndjapä, 18 ndə kə pa e zɨ dɔ̂ngɔ̂ alayïngerə də akapita nə̂ atrugu də aawotɔ kowɔ də ənə̂ ambrata də azü ə̂në əndje kpe də ambrata nə kɔ, də ənə̂ azü nɔ̂, aamba azü də akanga, aəngʉ azü də aâgbɔ̂ əndje.»

19 Mə wû agia nə də alayïngerə tshepashɔ nə gâ ndə atrugu nə̂ əndje, ə̂në əndje ngbô tə̂ əndje gâ tə̂ nə ndə kə pa əndje tɔ kowɔ tə̂ ətshə nə ə̂në tshə ô gâ pâ mbrata nə də atrugu nə̂ ye nə kɔ. 20 Əndje zâ agia nə də awopandəma ndjapä əterə nə ə̂në tshə mbrə̂ aərə aə̈lü ətshi agia nə kɔ, ə̂në tə̂ äwä nə, tshə frɔ̂ azü ə̂në əndje tâ əɨrɨ agia nə gâ tə̂ əndje â əndje vrɔ̂ tə̂ əndje ətshi foto agia nə kɔ. Əndje kô əndje bishi nɔ̂ ə wlî əndje tə asorô nə gâ ala âgbɔ̂ kudû əwo abadja ə̂në ə sho ətshe ə sho kɔ. 21 Ə̂dû azü nə, ə̈ngrʉ̈ kamba nə ə̂në ə wûtu lə ama ətshə nə ə̂në tshə ô gâ pâ mbrata nə kɔ kə wô əndje, â tshelə ayanu nɔ̂ sû də adɔ̂ngɔ̂ əndje nə.