1 Iwhalo yamatategulu aJesu Kristo, mwananhulumyana waDavidi, mwananhulumyana waAbhulahamu.

2 Abhulahamu wakaba elitate baIsaki, Isaki tate baJakobe, Jakobe tate baJuda nabanakwaina babe, 3 Juda tate baPelezi naZela bakazwalwa naTama, Pelezi tate baHeziloni, Heziloni tate baRamu, 4 Ramu tate baAminadabhi, Aminadabhi tate baNashoni, Nashoni elitate baSalimoni, 5 Salimoni tate baBhowazi, amai beli Rahabe, Bhowazi tate baObeti amai beli Lute, Obeti tate baJese, 6 Jese tate ba She Davidi. Davidi wakabeli tate baSolomoni nonkaji waYuliya, 7 Solomoni tate baRehobhoamu, Rehobhohamu tate baAbhija, Abhija tate ba Asa,

8 Asa tate baJehoshafati, Jehosafati tate baJolamu, Jolamu tate baUzia, 9 Uzia tate baJotamu, Jotamu tate baAhazi, Ahazi tate baHezekiya, 10 Hezekiya tate baManase, Manase tate baAmosi, Amosi tate baJosiya, 11 Josiya tate baJekoniya nabanakwaina babe, nonshaji wokutolwa kwabanhu mubuzike besengwa kuBhabhiloni. 12 Mushule mwokutolwa mubuzike besengwa kuBhabhiloni, Jekoniya wakabeli tate baShelatiyeli, Shelatiyeli tate baZelubhabheli, 13 Zelubhabheli tate baAbhiyudi, Abhiyudi tate baEliyakimu, Eliyakimu tate baAzo, 14 Azo tate baZadoki, Zadoki tate baAkimu; Akimu tate baEliyudi, 15 Eliyudi tate baEliyeza, Eliyeza tate baMatani, Matani tate baJakobe, 16 Jakobe tate baJosefa, undume waMariya iye wakazwala Jesu unowhi Kristo.

17 Zwose zwizekululu zwitangila pana Abhulahamu kuswikila kuna Davidi zwakabeli igumi nezwina, kuvila kunaDavidi kuswikila kutolwa kwabo mubuzike besengwa kuBhabhiloni, akale igumi nezwina, belimubuzike muBhabhiloni mane kunoswika unshaji waKristo, akale igumi nezwina.

18 Ngweno kuzwalwa kwaJesu Kristo kwakatikana neyinzila. Mai babe Mariya baluba bakatangilwa naJosefa, asi abajakabanu bashangana, Mariya wakawanikwa elinemimba yoMpepo uNchena. 19 Nokudalo Josefa, undume uwe, wakaba eli unhu wakalulama, ajakabeda kuumpisa ishoni kubanhu, wakayeya kuunshima musiswa. 20 Asi echinoyeya yezwi, ingilozi yaTezi yakaboneka kuna iye mumaloto, ikati, "Josefa, mwananhulumyana waDavidi usitye kutola Mariya kuti ebe unkaji uwo nokuti imimba yeyi ngiyoMpepo uNchena. 21 Unoozwala mwananhulumyana unoonshoba nezina linowhi Jesu, nokuti iye ndiye unoochija banhu babe muluchinyo lwabo."

22 Zwose yezwi zwakatiwa alo kuti kuzhajikijwe zwakalebwa naTezi, mumpolofeti eti, 23 "Lingani, imhandala inooba nemimba, inoochila mwananhulumyana, izina lilye unooshobwa ewhi Imanuweli" zwileba kuti, "Mwali unanasu."

24 Josefa paakamuka muhope, wakata zwaakababujwa nengilozi yaTezi, akoontola unkaji uwe, munsha uwe. 25 Koga aajakashangana naMariya pabulo, esanu azwala mwananhulumyana. Akale wakondundikila izina lyokuti Jesu.