1 Paakabhuluka mudunhu ibunga igulwana lyakontobela, 2 Pakalepo undwaji wamapelembuji wakezha kwaali, akafhigama mbeli kukwe, akati, "Tezi, kana muda mungandichenesa."

3 Akale wakatambunuja luboko lulwe akoonguma eti, "Ndoda, chena." Akale nokukambija bulwaji bwamapelembuji bwakashambijika. 4 Akale Jesu wakati kwaali, "Usibuje banhu banji asi inda kuntebuji, upile chipo chawakalayilwa naMozesi kuti chibe chitondejo kubanhu."

5 Engwina muKapenaume, kwakezha kwaali untungamili wabalwi izana, akombweta 6 akale eti, "Tezi, unshingi wangu ulele nobukosha kungumba mukunyajikana kukulwana kasa."

7 Wakati kuna iye, "Ndichezha koonchilisa."

8 Asi untungamili wabezana wakashandula eti, "She andilokwelela kuti mungwine mungumba yangu, koga ilebani iwhi chete unshingi wangu unochila. 9 Nezwo ndinhu upo pasi pobutongi, ndina balwi behondo bapo pasi pangu, akale kunomwe wabo ndinoti, ‘Inda!’ kova enda, kunomwe ndoti, ‘izha!’ unozha, akale kundanda wangu ndinoti, ‘ita yezwi!’ kova ezwita."

10 Jesu paakonwha, wakachenama akati kuna yabo bakabontobela, "Chokomende muIzilayeli andijanu ndawana kudimbwa kwakadai. 11 Ndinomubuja banji banoova kubuvezhuba nokubumililo banoogala petebuli naAbhulahamu, Isaki naJakobe mubushe bokudenga, 12 banhu bobushe banoolashwa munhilima yokuzhe, yoko banhu banoolila akale meno anogedageda." 13 Akale Jesu wakati kuNtungamili wabezana, "Inda, utilwe sokudimbwa kuko."

Akale unshingi wakachijwa nonshaji wakaleyo.

14 Akale Jesu paakangwina mungumba yaPita, wakabona amezwale baPita belilele, belwala bepisa mbili. 15 Wakababhata luboko, kupisa mbili kukapela, bakanyamuka bakonshingila nokuumpakulila. 16 Nobusiku yobo bakabuza kwaali banhu banji bakaba beli namadimoni, kova etatamila mipepo mibi, eshingisa iwhi chete, akale kova echilisa bose bakabelwala. 17 Yoku kwaluba kuzhajikija zwakalebwa nompolofeti Izaya kuti, "wakanyamula manyajo edu akatwiga malwaji edu."

18 Feno Jesu paakabona ibunga likonkombolojela, wakabuja balayijwa babe kuti ukumuda kunda kunelimwe ibhazu. 19 Umwe wabakwali wakezha kwaali akati, "Ndayiji, ndokutobela kwose kwaunonda."

20 Jesu wakati kuna iye, "Ihaba jina mapako, akale nenyuni jedenga jina zwizhumbo, asi Mwananhulumyana woNhu aana pokubiga unsholo uwe."

21 Umwe wabalayijwa wakati kwaali, "Tezi ndileke nditange ndanojika tate bangu."

22 Asi Jesu wakati kwaali, "Nditobele, akale lekeja bakafa bejike bafi babo."

23 Akale paakangwina mubwato, balayijwa babe bakontobela. 24 Hezwo, kwakanyamuka ibhepo igulwana mugungwa, nezwo bwato bwakabekupilwa namakampo, asi wakaba elilele. 25 Akale balayijwa bakenda bakoumusa beti, "She tichijeni, talobonwila ndondwe!"

26 Akale wakati kwabali, "Ini mutya, imwi banhu bokudimbwa kushoma?" Kova enyamuka, ekalalila ibhepo negungwa, kukaba nokunyalala kukulwana. 27 Akale banhu bakashamiswa nezwi bakati, "unhu wakata chini yoyu, unowhililwa nebhepo negungwa"

28 Akale Jesu paakaswika kunelimwe ibhazu, kunyika yabaGadalena, wakashangana nabanhu babili banamadimoni, beva kumakumbu, bakabetyisa zwokuti apana wakabepinda nooko. 29 Pakalepo bakashomeja beti, "unaneni zokuta nasu iwi Mwananhulumyana waMwali? wezha kotishunguluja unshaji usanu waswika na"

30 Feno idanga inji lyengulube lyakabechela, peli nakashizho kuva yopo pabakabeli. 31 Akale madimoni akombweta eti, "Kana mungotibhisa, mutisenge mudanga lyengulube."

32 Akale wakati kwaali, "Indani." akabhuda, akanongwina mungulube, akale idanga lyose lyakalabukila pebhilipili mane mugungwa, likanofila muvula.

33 Bacheji bakatizha benda kuguta, bakapupula zwose zwakabatikana akale nezwakatikana kubanhu banamadimoni. 34 Akale ilingani, iguta lyose lyakabhuda linda kunoshangana naJesu, pabakoombona bakonkumbila kuti ebhude munyika yabo.