1 Panoyo unshaji Jesu wakapinda nomuminda nezhuba lyokunyetutukwa lyabaJuda linowhi Sabata, balayijwa babe bakabeli nenzhala, nokudalo bakatanga kupulula zwilyo belya. 2 Asi baFalisi pabakazwibona yezwi bakati kwaali, "Bona, balayijwa babo bakumuta zwisinovumijwa nezhuba lyeSabata."

3 Wakati kwabali, "Amujanu mwabala na zwakatiwa naDavidi paakafa nenzhala eli naabo bakabeli naye" 4 Wakangwina mungumba yaMwali, akalya zwinkwa zwakabeli umpilo kunaMwali, pamwempela naabo bakabeli naye, kojoba zwisakabevumilwa mumulawo, kuzhe kwabatebuji chete. 5 Ani amujakabala mumulawo na kuti batebuji banotaluka mulawo weSabata muTempeli besinopiwa undandu? 6 Ndinomubuja kuti, yopa pana umwe unkulwana unopinda iTempeli. 7 Ngana mwaluziba kuti yezwi zwinolebani zwokuti, "Ndinoda ishe andidi umpilo, ngana musinobatonga basina undandu. 8 Nokuti Mwananhulumyana woNhu ndiye Tezi weSabata."

9 Wakava yopo akanongwina musinagogi yabo. 10 Yomo mwakabeli nonhu ulokokonyala luboko. Bakombhuza beti, "Kunovumijwa na kuchilisa nezhuba lyeSabata?" Betila kuti bompe undandu.

11 Wakati kwabali, "Ndiani pakati penu unoti eli nemhwizi imwempela inoti kana yawila mudizwa nezhuba lyeSabata, esinonda kunoibhisa na? 12 Unhu ulokosha kupinda imhwizi! Nokudalo zwinovumilwa kuta zwibuyanana nezhuba lyeSabata." 13 Kova eti kunoyo unhu, "Tambunuja luboko lulwo."

Wakalutambunuja, lukava lwachiliswa, lukaba solumwe. 14 Koga baFalisi bakabhuda bakanogala pasi bepota inzila yokuumbulaya.

15 Jesu paakazwiziba yezwi, wakabhuda yopo. Banhu banji bakontobela akabachilisa bose, 16 ekabalayila kuti besibuje banhu, nezwizwe. 17 Yezwi zwakabezhajikija zwakalebwa nompolofeti Izaya kuti, 18 "Bonani unshingi wangu unodikanwa, wandakashala iye unondishantisa. Ndobiga uMpepo wangu pezhulu pape, naiye unooshobelela indulamo kuna bokuzhe. 19 Aatonyenyeja, kana kuta izhoba, akuna uchawha iwhi lilye mumigwagwa, 20 Aatovuna lushanga lwakasubulwa, kana kujima kamunikiso kamumwinikija, kuswikila indulamo yazunda zwose. 21 Muzina lilye banhu bokuzhe banoobimba naye."

22 Bakabuza kwaali unhu waluba nedimoni, eli ibhofu akale esinotubula kulebeleka, wakonchilisa, mane unhu wakabesinolebeleka akalebeleka nokubona. 23 Banhu bose bakachenama bakati, "Angaba Mwananhulumyana waDavidi na yoyu"

24 Asi pabakati bazwiwha, baFalisi bakati, "Yoyu unhu unobhisa madimoni nesimba lyaBheluzabheli, tezi wemipepo mibi."

25 Wakazwiziba zwakabeli mundangalilo jabo akati kwabali, "Bwose bushe buloganulanwa pakati, bunopalajwa akale apana iguta kana ingumba iloganulwana ingoma." 26 Kana Satani ebhisa Satani, uloganukana nokukwe, bushe bubwe bungama chini? 27 Kana Imi ndibhisa madimoni nesimba lyaBheluzabheli, ani bana benu banowabhisa nesimba lyani? Nokudalo banooba batongi benu. 28 Koga kana eli uMpepo waMwali wandinobhisa naye madimoni, zibani kuti bushe bwaMwali bwaswika kwamuli.

29 Kana unhu angangwina chini mungumba yonhu unesimba, epamba zwibiya zwizwe, kuzhe kwokuti etange asunga yoyo unamasimba? Ndipo paachapamba ingumba yiye.

30 Yoyo usiko kunami unokakabajana nami, nayoyo usinobunganisa nami ndiye unotataula. 31 Nokudalo ndinoti kwamuli, unhu unolekejelwa luchinyo lwose nokutuka Mwali, asi kutuka uMpepo uNchena akutolekejelwa. 32 Wose unolebeleka iwhi ibi pezhulu poMwananhulumyana woNhu unolekejelwa, koga yoyo unolebeleka iwhi ibi pezhulu poMpepo uNchena aatolekejelwa, nonshaji yono kana munshaji unozha.

33 "Itani kuti unti ube umbuyanana nemichelo yawo inooba mibuyanana, kana kuta kuti unti ube umbi, nemichelo yawo inooba mibi, nokuti unti zwauli unoboneka nemichelo yawo. 34 Imwi bana benyoka! Mungalebeleka chini mawhi mabuya imwi muli babi? Nokuti undomo unobhisa zwizhele mumwoyo. 35 Unhu umbuya unobhisa zwinhu zwibuya kuva mumwoyo uwe umbuya, nonhu umbi unobhisa zwinhu zwibi kuva mumwoyo uwe umbi."

36 "Ndinoti kwamuli, nezhuba lyokutongwa, banhu bose banoozwishandulila bomene pezhulu pamawhi asina unshingo abanolebeleka, 37 nokuti pezhulu pamawhi awo, unoosungunulwa, akale namawhi awo unoolashwa."

38 Bamwe babakwali nabaFalisi bakati kwaali, "Ndayiji tinoda kubona chichenamiso chinova kwauli."

39 Koga wakabashandula akati, "Chizekululu chababipisi nabapomboli chinoshaka chichenamiso, koga achitoopiwa chichenamiso, do chichenamiso chaJona umpolofeti. 40 Nokuti saJona waluba muntumbu mwehobe kwamazhuba matatu nobusiku butatu, neebo ndizwo zwichatikana kuMwananhulumyana woNhu unooba muvu mazhuba matatu nobusiku butatu. 41 Banhu bokuNinive banoonyamuka nezhuba lyokutongwa pamwempela nechizekululu yechi, akale banoochitonga, nokuti ibo bakashanduka pabakawha kubhaunula kwaJona, koga ilingani, pana unhu unkulwana kupinda Jona yopano. 42 Shekaji wokuChamhembe unoonyamuka pakutongwa kwechi chizekululu akale echilasha, nokuti wakava kumigano yenyika koowha buchenjevu bwaSolomoni, koga ilingani, pana unhu unkulwana kupinda Solomoni yopano."

43 "Kana umpepo umbi wabhuda ponhu, unokwendenda mugwegulu upyanga pokugala, uchiko pashayiwa. 44 Ngweno unoti, ‘Ndinobwilila kungumba yangu kwandakabhuda. Paunobwilila unowana musina zwimo, yakapyailwa akale yakalonganywa.’ 45 Unova wenda kunotola mimwe mipepo mishanu inamibili, mibi kupinda iwo, itukogala mukati, kumapejisilo onhu yoyo kunoba kubi kupinda pakutanga. Ndizwo zwichooba chizekululu yechi chibi."

46 Jesu echinolebeleka nabanhu, amai nabanuna babe bakabelimile pazhe beda kulebeleka naye. 47 Umwe wakati kuna iye, "Haba amai babo nabanuna babo bamile pazhe bamuda kulebeleka nawi."

48 Koga iye wakashandula yoyo wakombuja eti, "Amai bangu ndiani na? Nabanuna bangu ndibani na?" 49 Wakatambunuja luboko kubalayijwa babe eti, "Haba amai nabanuna bangu! 50 Nokuti aani naani unota kuda kwaTate bangu bokudenga ndiye nkazwaji wechinhulume, nowechinhukaji namai bangu."