1 Nelyo izhuba Jesu wakabhuda mungumba, akanogala mumbali mwegungwa. 2 Ibunga igulwana lyakaumbunganila, zwikatisa kuti engwine mubwato akagala mukati, ibunga lyose lyakama pebhambo. 3 Wakababuja zwinhu zwinji nemikwejaniso, eti,

"Umbyali wakenda kunobyala. 4 Akale ebyala imwe imbeyu yakawila munzila, kova inyuni jizha, akale jikailya. 5 Imwe yembeyu yakawila pamwala, nokukambija yakamela sezwo pakaba pesina ivu inji, 6 asi izhuba palyakabhuda, yakapya ikahwihwinyala, nokuti yaluba isina miji. 7 Imwe imbeyu yakawila mumiwha, koga miwha ikakubuka ikayimanikija. 8 Imwe imbeyu yakawila muvu ibuyanana, ikazwala kasakasa, imwe izana, imwe makumi mashanu ane limwempela, imwe makumi matatu.

9 "Iye une nzebe ngewhe."

10 Kova balayijwa babe bezha beti kwaali, "Ini ulebeleka nemikwejaniso kwabali"

11 Akale wakabashandula eti, "Imwi mwakapiwa kuziba zwilosisika nezwobushe bokudenga, koga kwabali abajakapiwa. 12 Nokuti kunoyo unanazwo unoopiwa zwinji, koga yoyo usina, unootolelwa yozwo zwaananazwo. 13 Ndizwo ndilebeleka nabo nemikwejaniso, nokuti kojoba bebona, abatobonesesa, akale nokuwha abatowha, kana kuwhisisisa. 14 Zwipindila munaibo kuti kuzhajikijwe zwakapolofitwa naIzaya eti:

"Munoowha kasa, asi amutoowhisisa,

munoobona kasa, koga amutoobonesesa,

15 Nokudalo myoyo yabanhu yakaba mikukutu,

nenzebe jabo jinowhila kule,

akale balofwinya mesho abo.

Kutila kuti besibone

namesho abo,

nokuwha nenzebe jabo,

nokuwhisisa nemyoyo yabo,

akale kuti besishandukile kwandili kuti ndibachilise."

16 Koga alokombolelwa mesho enu, nokuti anobona, nenzebe jenu nokuti jinowha. 17 "Chokomende, ndinoti kwamuli banji bapolofeti nabanhu bakalulama bakaba beda kubona yezwi zwamubweni, asi abajakazwibona, akale nokuwha zwamuwhile, akale abajakazwiwha."

18 Iwhani unkwejaniso wombyali. 19 Kana unhu ewha iwhi lyobushe bokudenga, asi esinoliwhisisa, umbi unozha kova evupula zwakabyalwa mumwoyo uwe, yezwi ndizwo zwakababyalwa munzila. 20 Koga yeyo yakabyalwa pamwala ndiyo inowha iwhi, ikalitambula nokukambija nolushanto, 21 asi aana miji mwaali, unobhatilila pashoma, kungoswika masheto kana kuyangatiswa pezhulu pewhi, unokambija kulilasha. 22 Yeyo yakabyalwa pakati pemiwha, ndiye unowha iwhi, asi kunyajwa nozwenyika nokuchengela kwefuma kunojipa iwhi, nokudalo ayitozwala unchelo. 23 Kuneyo yakabyalwa muvu ibuyanana, ndiye unowha iwhi, kova eliwhisisa, unozwala michelo, zwinoba izana pamwe makumi mashanu ane limwe, pamwe makumi matatu.

24 Jesu wakabapa umwe unkwejaniso, eti, "Bushe bwedenga bungakwejaniswa nonhu wakabyala imbeyu imbuya muminda uwe." 25 Asi banhu belilele, chita chiche chakezha chikabyala idihwa mukati mwekoloni iye, chikenda. 26 Payakamela imbeyu, yakazwala zwilyo, neebo idihwa lyakaboneka bo. 27 Bashingi babe bakezha kuna iye bakati, ‘tezi amujakabyala imbeyu imbuya muminda wenu na? Ani biya idihwa lyakavapi?’ 28 ‘Wakati kwabali, zwakatiwa nombengi.’ Bashingi bakati kwaali, ‘Unoda na kuti tinde tinobhisa tibunganise idihwa na?’ 29 Asi iye wakati, "pe, nokuti pamuchaba mubunganisa idihwa, mungoobhisikija nekoloni. 30 Lekani zwose zwikubukile pamwempela kuswikila unshaji wokuvuna. Nonshaji wokuvuna ndinooti kubavuni, ‘tangisani kubunganisa idihwa, mulisunge pamwempela kuti lipiswe, koga ikoloni muyibige mugombana lyangu.’ "

31 Wakababuja umwe unkwejaniso, eti, "Bushe bwedenga bunokwelana nembeyu inhukutuku inowhi imasitadi yakatolwa nonhu akenda nayo akanoyibyala muminda uwe. 32 Iyo inhukutuku kasa kumbeyu jose, asi ingokubuka, inobehulwana kupinda matenje ose, kova iba unti, inyuni jomumpepo kova jizha jibaka zwizhumbo penhabi jawo."

33 Jesu wakababuja umwe unkwejaniso, eti, "Bushe bwedenga bunanga sonkukumuso wakatolwa nowechinhukajana, eshanganisa nenjela inhatu jekoloni, wakafufumusa injela jose."

34 Zwose yezwi Jesu wakazwileba kumabunga nemikwejaniso, chokomende apana chaakaleba pesina unkwejaniso kunaibo. 35 Nokuta alo yoku kwakabeli kuzhajikija zwakabalebelekwa nompolofeti,

"Ndoozhula undomo wangu nemikwejaniso,

ndoolebeleka zwakabakasisika kuvila kumatangisilo enyika."

36 Jesu wakasiya mabunga akangwina mungumba. Balayijwa babe bakondila, beti, "Tipandululile unkwejaniso wedihwa muminda."

37 Wakabashandula, eti, "Iye unobyala imbeyu imbuya Mwananhulumyana woNhu, 38 minda inyika, imbeyu imbuyanana ndibo bana bobushe, asi idihwa ndibo bana baGuluzhanje. 39 Umbengi wakaibyala ndiGuluzhanje, kuvuna ndiko kupela kwenyika, bavuni ingilozi. 40 Sokubunganiswa kunotiwa idihwa akale lipiswa nomoto, kunoba alo pakupela kwenyika. 41 Mwananhulumyana woNhu unootuma ingilozi jije, akale jinoobunganya jibhise mubushe bubwe zwose zwinobuza luchinyo naibo bose bachinyi, 42 jinoobaposela mubibi lyomoto, yokwo kunoba nokulila nokulya ntwino. 43 Kova bakalulama bepenya sezhuba mubushe bwaTate babo. Yoyo unenzebe ngewhe!"

44 Jesu wakati, "bushe bwokudenga bunanga sefuma ilosiswa muminda, yakawanikwa nonhu kova eyisisa, mulushanto lulwe kova etengesa zwose zwaananazo, etenga unda yoyo."

45 "Akale bushe bokudenga bunanga sonshambaji ukumupyanga bulungu bulokosha. 46 Abuwana bulungu bulokosha, wakenda akatengesa zwose zwaakabeli nazwo akabutenga."

47 "Akale bushe bwedenga bunanga sevubo lyakaposwa mugungwa, likabhata ihobe jenduji jose, 48 palyakati lyazhala, banhu bakalikakatila kumbali, bakagala pasi beshaluja imbuyanana bebiga muzwibigilo asi imbi bejilasha. 49 Kunooba alo pakupela kwenyika. Ingilozi jinoobhuda, jinda jishaluja babi mukati mwabakalulama, 50 jibaposela mubibi lyomoto, yomo banhu banoolila nokuluma ntwino abo.

51 "Mwazwiwhisisa zwose yezwi na"

Bakati kwaali, "Eya."

52 Akale wakati kwabali, "Nokudalo unkwali wose, wakalayijilwa bushe bwedenga, unanga somweni wonzi unobhisa muchuma chiche zwipya nezwantolo."

53 Jesu wakati apeja yeyi mikwejaniso, wakabhuda yopo akenda, 54 akale aswika kuNazaleta kubugalo bokunaibo, wakabalaija musinagogi lyabo, zwakabachenamisa, bakati, "Yoyu unhu wakabuwanapi buchenjevu bwakadai, neyi mishingo yamasimba makulwana? 55 Yoyu aatoba iye na mwana wombezhi? Amai babe abatowhi Mariya na? Akale banakwaina babe abatobeli Jemusi, Josefa, Simoni naJudasi na? 56 Akale bakazwaji babe bechinhukaji abagele nasu na? Yoyu unhu wakazwiwana kupi zwose yezwi?" 57 Bakonyemela.

Koga Jesu wakati kwabali, "Umpolofeti aana kukujwa kubugalo bokunaibo akale nokumhuli yokunaibo." 58 Aajakata zwishamiso zwinji yokwo, pezhulu pokusodimbwa kwabo.