1 Nezwo Jesu wakatungamilwa noMpepo kugwegulu kuti enokwejwa naGuluzhanje 2 Akale wakazwiminya zwokulya kwamazhuba makumi mana nobusiku makumi mana akale mushule mwezwo wakaba nenzhala. 3 Akale unkweji wakezha kwaali akati, "Kana uli Mwananhulumyana waMwali buja mabwe yaya ebe zwinkwa."

4 Asi wakashandula eti, Zwilokwalwa kuti, "Unhu aatolalama nechinkwa chete, koga newhi lyose linova mundomo waMwali."

5 Nezwo Guluzhanje wakonsenga kuGuta iJena, akombiga pezhulu petempeli, 6 akale akati kwaali, "Kana uli Mwananhulumyana waMwali, zwiposele pasi", nokuti zwilokwalwa kuti.

"Unoolaya ingilozi nezwizwo akale

namaboko ajo jinookunyamulila pezhulu,

kuti usigubhulwe nebwe."

7 Jesu wakati kwaali, "Akale zwilokwalwa kuti, autokwelela kukweja Tezi Mwali uwo."

8 Akale, Guluzhanje wakonsenga pezhulu pedunhu ilefu kasakasa, akontondeja bushe bwopasi penyika yose nolukujo lwabo lwose, 9 akale wakati kwaali, "Zwose yezwi ndokupa, kana chete ungondifhugamila undinamate."

10 Nezwo Jesu wakati kwaali, "Ibhuda yopa, Satani!" Nokuti zwilokwalwa kuti, "Namata Tezi uwo, akale unokwelela kushingila iye chete!"

11 Nezwo guluzhanje wakava oonsiya, akale ilingani, ingilozi jakezha jikombhancha.

12 Ngweno paakawha kuti Joni wasungwa, wakanyamuka akenda kuGalili, 13 akale wakabhuda muNazaleta, akenda kunogala kuKapenaume, pelyo negungwa munyika yeZebhuloni neNafitali, 14 kuti yezwiya zwakabalebwa noMpolofeti Izaya zwizhajikijwe,

15 "Inyika yaZebhuloni nenyika yaNafitali,

zwinda kugungwa museli mweJolodani,

iGalili, nyika yaBokuzhe!

16 Banhu bakabeligele munhilima

babona mwenje unkulwana,

akale kunaabo bakabeligele munyika nomuntuzi wolufu,

mwenje wezha."

17 Kuvila nonshaji yoyo, Jesu wakatanga kupupula eti, "Shandukani, nokuti bushe bwedenga bwabapelyo!"

18 Eli mukukwenda mumbali mwegungwa lyeGalili, wakabona unkulu nonuna belibabili, Simoni unowhi Pita, naEndulu ununa uwe, beteya ivubo mugungwa, nokuti baluba bavubi behobe. 19 Wakati kwabali, "Nditobeleni, ndomuta bavubi babanhu." 20 Pakalepo bakasiya mavubo abo bakontobela.

21 Akale paakendila mbeli wakabona bamwe babili, unkulu nonuna, Jemusi mwananhulumyana waZebhedi, nonuna uwe Joni, mubwato natate babo Zebhedi, befhumulula ivubo jabo akale wakabashoba. 22 Pakalepo bakasiya bwato natate babo, bakontobela.

23 Akale wakakwendenda iGalili lyose, elayija mubugalo bokunamatila bwabaJuda bunowhi ma abo, akale epupula iNdebo iMbuya yobushe akale echilisa malwaji wose akale nobukosha bose mukati mwabanhu. 24 Sezwo impuwo yiye yakamwalalika muSiliya yose, akale bakabuza kwaali balwaji bose, naabo balunyajwa namalwaji alosiyanasiyana akale nokulwajilwa, baluba namadimoni, bezwisuntu, akale nabana bukosha, wakabachilisa. 25 Akale mabuta makulwana akontobela eva kuGalili, kumakuta igumi anowhi Dikapolisi, muJelusalema, muJudiya akale nomuseli mweJolodani.